BIBLIA TAYOLMAJXITIA: “Amo xiktemojtinemikan de keniu nanmopaleuijtinemiske namejuan san. Ta, kachi ok xiktemojtinemikan de keniu xikinpaleuijtiyakan oksekin” (Filipenses 2:4).

TEIN KIJTOSNEKI: Komo tikinpaleuiaj oksekin uan amo tikchiaj maj techkepilikan, kuali timouikaskej iniuan. Sayoj ke, komo sayoj totech titanemiliaj amo uelis tiksentokaskej timouikaskej iuan aksa. Maj tiknemilikan nejin: komo aksa akin kipia inamik kitayekanaltia itanejnekilis, satepan xa auilnemis. Uan no, komo aksa moueyineki porin kipia oso kimati seki taman, amo akin kinekis iuan mouikas. Itech amatajkuilol El camino del carácter, moijtoua ke akin sayoj inintech tanemiliaj kipiaj miak kuejmolmej.

TEIN UELIS TIKONCHIUAS:

• Xikonpaleui oksekin. Oksekin kuali mouikaskej mouan komo tiontakuaujtamach uan nochipa tikontemoua tikonpaleuis. Moijtoua ke akin kinpaleuiaj oksekin uan amo kichiaj maj kinkepilikan, okachi amo tayokoyaj uan okachi kuali momachiliaj.

• Xikonajsikamati oksekin. Se kiajsikamatis aksa kijtosneki se kimachilis tein yejua kimachilia uan tein kipanoua. Komo tikonajsikamati oksekin, amo tikonijtos tein uelis kinyolxokolis maski tionauiltajtos.

  Komo tikinajsikamatij oksekin techpaleuis maj okachi kuali tikinitakan. Komo ijkon tikonchiua,  mitsonpaleuis amo xikonchikoita oksekin uan kuali xionmouika iniuan akin taman kemej moskaltijkej oso taman kemej nemij.

• Xionyeto iniuan oksekin. Komo tionyetok iniuan oksekin, okachi tikonixmatis. Uelis tionmouikas iuan aksa komo tikonsentoka iuan tionmonojnotsa. Yejua ika, kuali xikonkaki akin iniuan tionmouika uan ininka xionmotekipacho. Moijtoua ke akin kuali monojnotsaj okachi yolpakij.

BIBLIA TAYOLMAJXITIA: “Takan timouikatinemij iuan nekes ten amo yolchipauke, ijkuakon nojonkes techmajmauaske ika tajtakolme” (1 Corintios 15:33).

TEIN KIJTOSNEKI: Akin iniuan timouikaj uelis kichiuaskej maj kuali timonejnemiltikan oso amo. Seki motelmachtianij kijtouaj ke komo aksa mouika iniuan akin tachichinaj oso akin kikauaj ininnamik, yejua no ijkon kichiuas.

TEIN UELIS TIKONCHIUAS: Xikontemo tionmouikas iniuan akin kuali monejnemiltiaj ijkon kemej tejuatsin tikonuelitaskia tionmonejnemiltis. Uelis tionmouikas iniuan akin kuali taixejekouaj, tapoujkaitaj, kiuelitaj kitemakaskej teisa uan kualtakamej.

MAJ AMO SE KIJTO TAJTOLMEJ TEIN TEYOLXOKOLIAJ

“Tajtol tein amo se kinemilia tamati kemej ijkuak tetsoponiaj ika se espada.” (PROVERBIOS 12:18.)

MAJ SE KUALTAKAT

“Akin kualtakat kipias miak taman.” (PROVERBIOS 11:25.)

MAJ SE KINCHIUILI OKSEKIN KEMEJ SE KINEKI MAJ TECHIUILIKAN

“Xikinchiuilikan tokniuan ijkon keme nankinekij ke in tokniuan ma namechchiuilikan.” (MATEO 7:12.)