NE UEJKAUJ, se tayekankatakeual kiixyekanaya tekit itech ichan oso italpan aksa.

Keman José se ikoneuj Jacob, katka takeual ompa Egipto, iteko kiixtalij kemej tayekankatakeual itech ichan. Nejon takat egipcio “kikauilij José maj kiyekpia nochi tein iaxka” (Gén. 39:2-6). Satepan, keman José mochiuak se taixyekankej ompa Egipto, no kipiak se tayekankatakeual akin kiixyekanaya tekit tein mochiuaya ichan (Gén. 44:4).

Itech itonaluan Jesús, akin kipiayaj miak talmej okachi nemiaj itech uejueyi xolalmej uan amo itech kali tein kipiayaj inintalpan. Yejua ika kinixtaliayaj tayekankatakeualmej maj kiixyekanakan tekit tein mojmostaj kichiuayaj takeualmej.

¿Keniuj monekia yeski se tayekankatakeual? Columela, se tajkuilojkej kayot Roma akin nemik itech inintonaluan tatitanilmej, kijtoj ke aksa akin kiixtaliskiaj kemej tayekankatakeual monekia yeski se “akin kuali kimatia keniuj kichiuas tekit”. Monekia “momachtis [...] keniuj kinextis kualneskayomej, ijkon kuali kitekitiltiskia tanauatil tein kipiaya”. Columela no kijtoj: “Tein okachi moneki itech se tayekankatakeual yejua maj amo kinemili ke kimati teisa tein amo yekmelauj kimati, uan maj nochipa mochikaua momachtis tein amo kimati”.

Biblia ika tajtoua se tayekankatakeual keman kimelaua seki tekimej tein mochiuaj itech inechikol Dios. Kemej neskayot, tatitanil Pedro kiniluia akin kichiuaj kemej Cristo maj mochiuakan kemej tayekankatakeualmej. Yejua kijtoj: “Xikintekitilikan in oksekin taneltokani [...] ika nochi tataman uelilis ten Dios namechtayokolij ya” (1 Ped. 4:10).

Jesús no ika tajtoj se tayekankatakeual keman kimelauak neskayot tein moajsi itech Lucas 16:1-8. Uan no, keman kijtoj tein kinextiskia ke peuaskiaya tekiuajtiskia, motenkauak iniuan imomachtijkauan ke kiixtaliskia se “takeual ten yolkuali uan ten kuatamatke”. Tekit tein okachi tayekantoskia tein kichiuaskia nejon tayekankatakeual, yejua kinmakas tamachtilis akin kichiuaj kemej Cristo, tein kinpaleuiskia itech nejin itamian tonalmej (Mat. 24:45-47; Luc. 12:42). Semi timotasojkamatij tikseliskej amaixmej tein takeual takuaujtamach kichijchiua uan kimoyaua noyampa taltikpak tein kichikaua totakuaujtamatilis.