Keniuj se kinmelauas konemej
“Nochipa keman nikakia panouaya se carro, semi amo kuali nimomachiliaya. Ika nejin expaya Jordan mokepaya kalijtik okachi tiotak ke hora tein tikiluijkaj maj ejkoni. Niknemiliaya: ‘¿Kani yetok? ¿Teisa kipanok? ¿Amo kitekipachoua maj semi titanemilijtokan?’. Semi nikualantoya keman ejkok.” (GEORGE)
“Semi nechmoujtij keman nikakik tsajtsiteuak nosiuapil. Keman nikitak, chokatoya uan mokuakitskijtoya. Iikniuj okichpil akin kipia naui xiuit, kimaak.” (NICOLE)
“Tosiuapil Natalie akin kipia chikuasen xiuit techiluij: ‘Amo nikichtekik anillo ta nikajsik’. Itech iixtololouan moitaya ke melauak tein kijtouaya. Semi techyolkokoj maj kijtouani ke amo tachtekik, hasta peuak tichokaj porin tikmatiaj ke techkajkayaujtoya.” (STEPHEN)
¿MITSONPANOUANI kemej moijtoua nikan? Keman tikonpanoua ouijkayomej kemej nejon, ¿tionmotajtania keniuj moneki tikonmelauas mokonetsin oso ox monekiskia tikonchiuas? ¿Amo kuali yetok maj se kinmelaua konemej?
¿TONI KIJTOSNEKI MAJ SE KINMELAUA KONEMEJ?
Keman itech Biblia moijtoua ke kimelauaj aksa amo sayoj kijtosneki tatsakuiltilis. Ta okachi kijtosneki ke kimachtiaj uan kimelauaj. Nion keman kijtosneki ke kitajyouiltiaj oso kikokouaj (Proverbios 4:1, 2).
Keman kinmelauaj konemej tamati kemej ijkuak kiyekpiaj xochit tein kitokaj. Se tekitikej kichiua maj tal moajsi kemej moneki, kiatekia tatok, kitapalauia, amo kikaua maj chauisyoua nion maj xiujpachiui, uan kemansa kimateki ta ijkon uelis moskaltis kemej moneki. Yejua kimati ke moneki kichiuas nochi nejon komo kineki maj kualtsin moskalti tatok. No ijkon, tetatmej tataman nepaleuil kikuij ijkuak kiniskaltiaj ininkoneuan. Kemej neskayot, kemansa monekis kinmelauaskej uan ijkon keman nojnelmejok peuas kinpaleuiskej maj kipatakan seki amo kuali tanemilil tein kinextiaj uan ijkon moskaltiskej kemej moneki. Sayoj ke, ijkon kemej akin kitoka xochit moneki ika nejmachkayot kimatekis tatok uan ijkon amo kijtakos, tetatmej moneki kinmelauaskej ininkoneuan ika netasojtalis.
Dios Jiova, akin kitemaka Biblia, kinmaka se kuali neskayot tetatmej itech nejon. Keman yejuatsin kimelaua aksa semi tel tapaleuia uan yejua ika itekitikauan tatakamatinij kiteltasojkamatij (Proverbios 12:1). Kiseliaj keman kinmelaua uan amo kimajkauaj (Proverbios 4:13). Dios kimelaua aksa 1) ika netasojtalis, 2) kemej moneki uan 3) amo kipapata. Komo tikonneki maj mokonetsin kuali kiseli keman tikonmelauas, xikonchiua kemej Jiova uan xikontojtoka nejin eyi tayolmajxitilis.
IKA NETASOJTALIS
Dios kimelaua aksa ika netasojtalis uan kichiua porin kitasojta. Biblia kijtoua ke “Jiova kimelaua akin kitasojta, ijkon kemej kichiua se tepopaj iuan ikonetsin akin kiselia” (Proverbios 3:12). Uan no, Jiova amo tetajyouiltia, ta “teiknelijkej uan kineki tapaleuis, amo niman kualani” (Éxodo 34:6). Amo tekejkeloua, amo kikui tajtolmej tein teyolxokolia nion teijijtoua, ta nejon kemej yeskia tetsopitiskia “ika se espada” tein semi teijtakoua (Proverbios 12:18).
XIKONKAKI
Semi melauak ke nion se tepopaj uelis tel kuali kinextis ke amo yolijsiui kemej Dios ueli kichiua. Kemansa tikonmachilis ke amo ueliok tikontsakuilia mokualanyo, sayoj ke ijkuak panos nejon, xikonelnamiki ke ijkuak se kinmelaua konemej keman se tel kualantok oso amo kuali se momachilia, miakpa, amo se kichiua kemej moneki uan senkis amo tapaleuia. Nejon amo kijtosneki se kinmelauas konemej ta kijtosneki ke amo ueli se motsakuilia.
Sayoj ke komo se motsakuilia uan se kinmelaua konemej ika netasojtalis, okachi tapaleuis. Maj tikitakan keniuj kinmelaujkej ininkoneuan George uan Nicole, ome tetatmej akin ininka titajtojkej achto.
XIKONCHIUA NETATAUJTIL
“Keman Jordan ejkok kalijtik, nonamik uan nejua titelkualantoyaj, sayoj ke tiktsakuilijkej tokualanyo uan tikakkej tein techiluiaya. Kemej youakya katka, tikixtalijkej titajtoskej kualkan. Tiksenchiujkej netataujtil uan tikochitoj. Mostika okachi tiyolseujtoyaj uan uelik kuali tikmelaujkej kuejmol uan uelik tikpaleuijkej maj ajsi itech iyolo tein tikiluiayaj. Yejua kiajsikamatik ke amo kuali tein kichiujka uan kiselij tatsakuiltilis tein tikmakakej. Tiktasojkamatij maj tikitanij ke ijkuak se kichiua teisa keman se kualantok, semi amo tapaleuia. Keman achto tikinkakiaj, okachi kuali tikinpaleuiayaj.” (George.)
XIONTAJTO
“Semi nechkualantij keman nookichpil kiteuij iikniuj, sayoj ke amo nikauak maj nechyekana nokualanyo, ta nimotsakuilij uan niktitanik kampa kochi hasta maj nimoyolseuiskia. Keman uelik nimoyolseuij, nikyekiluij ke amo kuali maj se tateui uan nikitaltij ke kikokoj iikniuj. Nejon semi tapaleuij, ta kitajtanij maj kitapojpoluiani uan kinauaj.” (Nicole.)
Kemej tikitaj, semi tapaleuia komo tikinmelauaj tokoneuan ika netasojtalis, maski kemansa monekis se kintatsakuiltis.
KEMEJ MONEKI
Jiova nochipa kimelaua aksa sayoj “kemej monekis” (Jeremías 30:11; 46:28). Yejuatsin kiita nochi tein teuika maj se kichiua teisa, hasta tein amo moyekita. ¿Keniuj uelis no ijkon kichiuaskej tetatmej? Stephen, akin achto ika titajtojkej, kimelaua: “Maski semi timoyolkokojtoyaj uan amo tikajsikamatiaj keyej Natalie techkajkayauak, tikitakej xiujmej tein kipiaya uan tein ueliaya kiajsikamatia”.
Robert, itakauj Nicole, no kitemoua kiitas keyej ikoneuan kichiuaj teisa. Nochipa ke amo kuali monejnemiltiaj, motajtania: “¿Yekinika kichiujkej nejon oso momatkejya ijkon kichiuaskej? ¿Sioujtokej? ¿Amo kuali momachiliaj? Nejon tein kichiujkej ¿kinextia ke xa kipiaj okse kuejmol?”.
Tetatmej akin kipiaj kuali taixejekolis amo kichiaj maj ininkoneuan monejnemiltikan kemej akin uejueykejya. Pablo, akin katka itatojtokakauj Cristo, kijtoj nejon keman kijkuiloj: “Kuak nejua nipiliok nikatka, ijkuakon nitajtojtinemia keme se pili. Uan no nitanemiliaya sayo keme se pili” (1 Corintios 13:11). Robert kijtoua: “Nechpaleuia maj nikita teisa kemej moneki uan maj amo nitelkualani komo nikelnamiki tein nejua nikchiuaya keman katka nikonet”.
Motelneki maj tetatmej amo kichiakan maj ininkoneuan kichiuakan tein amo taixejekol, sayoj ke moneki maj amo sayoj kinitakan komo kichiuaj teisa tein amo kuali oso kinextiaj se amo kuali tanemilil. Komo tikonita tein mokonetsin ueli kichiua uan tein amo, ijkon kemej okseki taman tein kipanotos, uelis tikonmelauas kemej moneki uan ika taixejekolis.
MAJ AMO MOPAPATA
Malaquías 3:6 kijtoua: “Nejua niJiova; amo nimopatani”. Itekitikauan Dios takuaujtamatij itech nejon tanemilil tein melauak uan amo omeyolouaj. Konemej no ijkon amo omeyolouaj ika tein moneki kichiuaskej komo tetatmej amo kipapataj kemej kinmelauaj. Komo tetatmej kitaliaj seki taman tanauatilmej keman amo kuali momachiliaj uan kipataj keman kuali momachiliaj, kinpojpoloua konemej uan amo kimatijok toni kichiuaskej.
Maj tikelnamikikan ke Jesús kijtoj: “Kuak tiknekis tikijtos ‘kemaʼ, sayo xikijto ‘kema’. Uan kuak tiknekis tikijtos ‘amo’, sayo xikijto ‘amo’”. Nejin tajtolmej uelis semi kinpaleuis tetatmej keman kiniskaltiaj ininkoneuan (Mateo 5:37). Amo xionmotenkaua tikonchiuas tein amo tikonnemilia tikonchiuas. Komo tikonnejmachtia mokonetsin ke tikonmakas se taman tatsakuiltilis porin kichiuak teisa tein amo kuali, ijkon xikonchiua.
Tetatmej moneki monojnotsaskej uan ijkon amo kipapataskej kemej kinmelauaskej ininkoneuan. Robert kijtoua: “Kemansa nokoneuan nechtajtanikij maj nikinkaua maj kichiuakan teisa uan nikiniluia ke kemaj. Sayoj ke amo nechiluiaj ke kiluijkajya ininmomaj sayoj ke amo kinkauak. Keman nikmati nejon, nochipa nimotajtolkepa porin nikneki nikpaleuis tein yejua kijtoj”. Komo tetatmej tataman tanemilil kipiaj ika se taman, semi kuali maj moyektenkauakan keman yetoskej ininselti.
MOTELNEKI MAJ SE KINMELAUA
Komo tikonchiua kemej Jiova uan tikonmelaua mokonetsin ika netasojtalis, kemej moneki uan amo tikonpapata, uelis tikonyekmatis ke semi kipaleuis. Komo tikontasojta uan tikonyekana, keman ueyias monejnemiltis kemej moneki, yeski takuaujtamach uan nochi kichiuas ika taixejekolis. Ijkon kijtoua Biblia: “Xikmachti konetsin itech ojti kampa moneki yas, uan keman mochiuas ueyi amo kikauas” (Proverbios 22:6).
