Itech panoua 200 altepemej, itaixpantijkauan Jiova kichiuaj tekit tein mouika ika inintaneltokalis uan tapaleuiaj keman mochiua se ouijkayot. Maski noyampa kichiuaj nejin tekit, sayoj itech 35 altepemej uelij kiixtauaj tein moneki ika nepaleuil ika tomin tein kitemakaj tokniuan. Komo ijkon, ¿keniuj kiixtauaj tein moneki itech altepemej kampa semi tatasojti?

 Oloch Taojtokaltianij akin kinixyekanaj itaixpantijkauan Jiova kiitaj toni kinpoloua tokniuan noyampa taltikpak tein kipaleuis maj ueli taueyichiuakan uan maj tanojnotsakan. Ika miak nejmachkayot kitemouaj kitekitiltiskej nepaleuil ika tomin. Komo itech se sucursal kiselia okachi nepaleuil ika tomin ke tein moneki, ueli kikuij nejon nepaleuil okseki sucursales kampa semi tatasojti. Ijkon mochiua kemej yekinika itatojtokakauan Jesús kichiuayaj: ‘kimajxitiayaj ne tapaleuilis ten kinpolouaya’ oksekin (2 Corintios 8:14). Ijkon, akin kipiayaj miak, kinpaleuiayaj akin kinpolouaya.

 ¿Keniuj momachiliaj tokniuan keman kiseliaj nepaleuil ika tomin tein motemakak itech okseki sucursales? Kemej neskayot, ompa Tanzania, kampa sayoj ika 2 dólares itech tonal moixpanoltiaj miakej, mokuik nejon nepaleuil ika tomin uan ika moyankuilij kalnechikol Mafinga. Nejin tokniuan kijtojkej: “Satepan ke tikyankuilijkej kalnechikol, okachi miakej mosentiliaj. Tiktasojkamatij inepaleuil Jiova uan ininnepaleuil tokniuan noyampa taltikpak. Axkan tikpiaj se kualtsin kali kampa titaueyichiuaj”.

 Nejin ueyi kokolis COVID-19, kichiuani maj seki tokniuan akin kayomej Sri Lanka amo kipiakan tein kimajseuaskej. Ijkon moajsikej tokniuj Imara Fernando uan ikonetsin, Enosh. Ika nepaleuil ika tomin tein kitemakanij okseki sucursales, uelik kiselijkej nepaleuil tein monekia. Itech se amatsin kijkuilojkej nejin: “Semi tikintasojkamatiliaj tokniuan akin kinextianij ke semi techtasojtaj. Semi techyolpaktia maj tipoujtokan iniuan nejin ueyi kalyetouanij uan tiktataujtiaj Jiova maj kisentoka kinpaleui nochin tokniuan itech nejin itamian tonalmej”.

 Kampa yeski tokniuan nemiskej, kinpaktia kitemakaskej tein kipiaj. Kemej neskayot, Enosh, mochijchiuilij se cajita kampa kitalia tomin tein no kitemakas uan ijkon kinpaleuiskej akin semi kinpoloua. Guadalupe Álvarez no ijkon kitemaka tein kipia. Yejua nemi México kampa semi tatasojti uan semi tepitsin kintaxtauiaj kampa tekitij. Sayoj ke yejua kitemoua tapaleuis nochi tein uelis. Guadalupe kijtoua: “Jiova semi kualtakat uan semi tetasojta. Semi niktasojkamatilia nejon. Nikmati ke nonepaleuil ika tomin mosentilia ika ininnepaleuil oksekin uan ika kinpaleuiaj akin semi kinpoloua”.

 Sucursales akin kititanij nepaleuil ika tomin kampa okachi moneki, kinyolpaktia kichiuaskej. Anthony Carvalho, semej akin taixyekana itech sucursal ompa Brasil, kijtoua: “Miak xiujmej monekik techpaleuiskej okseki sucursales. Nejin tapaleuij maj momiakilianij tanojnotsanij. Axkan ke tokniuan okachi uelij kitemakaj nepaleuil ika tomin, techyolpaktia tikinpaleuiskej oksekin. Tokniuan kiitaj ke nejin tekit mochiujtok noyampa taltikpak uan kinemiliaj keniuj uelis tapaleuiskej, kemej yekmelauj imomachtijkauan Jesús.

 ¿Keniuj itaixpantijkauan Jiova uelis kinpaleuiskej tokniuan akin semi kinpoloua? Okachi kuali maj nepaleuil motitani kemej nepaleuil ika tomin tein ika mochiua tekit noyampa taltikpak uan amo maj motitani itech sucursales tein moajsij itech okseki altepemej. Uelis kitaliskej itech cajontomin kampa kijtoua “Obra mundial” oso kampa kijtoua donate.dan124.com. Semi tiktasojkamatij nochi nejin nepaleuil ika tomin.