Itech xiuit 2015, kemej 175,000 kikalpanotoj sucursal de Centroamérica ompa México kampa kiixyekanaj tekit tein kichiuaj itaixpantijkauan Jiova. Nejin kijtosneki ke itech se tonaltekit takalpanotij kemej 670 taltikpakneminij. Miakej yajkej kemej oloch itech autobuses uan uejkaujkej seki tonalmej ajsiskej. Sekin kiixtalijkej seki metsti achto ijkuak yaskiaj.

Sekin akin kikalpanotoj sucursal, tein no kitokaytiaj Betel, monekik mochikauaskej uan ijkon ueliskia yaskej. Kemej neskayot, miakej akin pouij itech se nechikol ompa Veracruz amo kipiayaj tomin tein ika yaskiaj kemej 550 kilómetros itech autobús. Yejua ika kinemilijkej kichiuaskej se taman uan ijkon yaskej Betel. Kiixtalijkej kichijchiuaskej takual uan kinamakaskej. No kisentilijkej uan kinamakakej botellas tachijchiuj ika plástico. Itech eyi metsti kisentilijkej tomin tein ika ueliskiaj yaskej.

¿Tapaleuij tein kichiujkej? Yejuan kijtouaj ke kemaj. Kemej neskayot, se telpoch akin itokay Lucio, akin poui itech nechikol kijkuiloj “Niyas Betel nechpaleuij maj nikixtali nikajsis seki tekimej itech nechikol uan maj nikchikaua nokuali uikalis iuan Dios. Axkan okachi nitapaleuia itech nonechikol”. Uan Elizabeth, akin kipia 18 xiujmej, kijtoj: “Ompa Betel nikitak uan nikmachilij yekmelauj netasojtalis kinixnextia itekitikauan Dios. Nejon necholinij maj nikmaka Jiova tein okachi kuali uan maj nikteixmatilti Jiova nochi tonalmej”.

Onkakej tonalmej keman youij tel miakej taixmatitij Betel. Akin ixyetokej kinseliskej takalpanouanij, mochikauaj kuali kiseliskej. Lizzy kijtoj: “Semi nechyolchikaua nikinitas tel miakej takapalpanouanij. Notakuaujtamatilis mochikaua keman nikita keniuj kipatiuitaj kiixmatiskej Betel uan no tein moneki kichiuaskej uan ijkon uelis ualaskej”.

Akin kipiaj okse taman tekit itech Betel no tapaleuiaj keman moneki kinixmatiltiskej sucursal. Maski nejin kichiua maj kipiakan okachi tekit, kinyolpaktia kinseliskej. Juan kijtoua: “Nechyolpaktia nikitas keniuj yolpakij uan no nikakis tajtolmej tein ika motasojkamatij. Nejon kichiua maj niyolpaki nochi tonal”.

Konemej no kinyolpaktia yaskej Betel. Noriko, akin tekiti itech Departamento de Computación, kijtoua: “Nikintajtania konemej ox kiuelitaskiaj tekitiskej Betel, uan nochin kijtouaj: ‘¡Kemaj!’”. Kampa okachi kiuelitaj yaskej konemej yejua kampa moajsi Rincón de Caleb ompa uelij mokixtiliaj se taixkopin iniuan uejueyi taixkopimej tein kipiaj Caleb uan Sofía tein nesij itech videos Kuali ximouika iuan Jiova. Noriko kijtoua: “Konemej kiteluelitaj”.

Miakej konemej kinextiaj ke kipatiuitaj tekit tein mochiua Betel. Kemej neskayot, Henry akin kayot México, kisentilijtoya tomin tein kitemakaskia kemej netetayokolil keman yaskia Betel. Uan no kijkuiloj: “Ika kualtakayot xikuikan nejin tomin uan ika xikinchijchiuakan okachi amaixmej. Miak tasojkamatik porin nankitekitiliaj Jiova”.

Komo aksa kineki kiixmatitiuj se sucursal kampa tekitij itaixpantijkauan Jiova, amo moneki taxtauas. Timitsonyoleuaj xikonkalpano semej sucursales. Senkis tikmatij ke mitsontelyolpaktis. Komo tikonneki tikonmatis okachi, xikontemo kampa kijtoua TIAKONIMEJ > XIKONIXMATI SUCURSALES.