¿Tleka ualeua toTajtsin Dios amo kichiua tlen tiktlajtlaniliaj?
Jehová kipaktia techkakis ijkuak tiktlatlaujtiaj ika nochi toyolo. Pero amo nochipa kichiua tlen tiktlajtlaniliaj. ¿Tleka amo kichiua? ¿Tlen moneki tikilnamiktoskej ijkuak timotlatlaujtiaj? Xikita tlen kijtoua Biblia.
“Ijkuak nonmotiotsajtsiliskeh, amo san ompa xikojpatilijtokah nomotlajtol” (Mateo 6:7).
Jehová amo kineki san se tlamantli ma tikijtojtokan ijkuak tiktlatlaujtiaj nion kineki ma tiktlajtoltikan itech se amochtli nochi tlen tikijtoskej. Ye kineki ma tiktlatlaujtikan ika nochi toyolo. Ximokuayejyeko se moyolikni nochipa san se tlamantli mitstlapouia. ¿Kox mitspaktiskia? Akinmej kuali mouikaj, motlapouiaj miak tlamantli. Noijki ijkon, moneki tikiluiskej toTajtsin Dios nochi tlen techpanoua tla tiknekij iuan timouikaskej.
“Tlan nonkitlajtlanih amo nonkiseliah. Amo nonkiseliah porke nonkitlajtlanih san para nonkipaktiskeh nomokuerpo” (Santiago 4:3).
ToTajtsin Dios amo kichiuas tlen tikiluiaj tla amo kipaktia tlen tiktlajtlaniliaj. Ma tikijtokan se tlakatl mauiltia para kitlanis tomin uan kitlatlaujtia toTajtsin Dios ma kipaleui. ¿Kox kipaleuis? Ye yokijto amo kipaktia ma titlaixnekikan nion ma titlaneltokakan itech suerte (Isaías 65:11; Lucas 12:15). Ik non, amo techpaleuis. Tla tiknekij ma technankili, moneki tiktlajtlaniliskej tlen kipaktia ijkon ken kijtoua Biblia.
“Tla ikaj amo kineki kitlakamatis tlanauatil, toTajtsin Dios amo kikakis ijkuak kitlatlaujtis” (Proverbios 28:9).
Yiuejkika toTajtsin Dios amo okinkakiaya akinmej amo okitlakamatiayaj uan axkan noijki ijkon kichiua (Isaías 1:15, 16; Malaquías 3:6). Tla tiknekij ma techkaki, moneki tiktlakamatiskej. Uan tla yiuejkika otikchijkej itlaj amo kuali, ¿kijtosneki amo techkakis? Amo. Ye kineki techtlapojpoluis tla timoyolkopaj uan tikchiuaj tlen techiluia (Hechos 3:19).
