Miakej tlen yomonamiktijkej amo motlapouiaj ijkuak san sekan katej. ¿Tleka ijkon kinpanoua?

•  ¿Tleka yetoskia ken amo nanmoixmatij maski san sekan nankatej?

•  ¿Tlen uelis nankichiuaskej?

•  ¿Tlen kijtouaj sekimej tlen yomonamiktijkej?

•  Seki tlamantli tlen uelis nankichiuaskej

•   “Sapanoua tisotlauaj”

   Anna okijto: “Ijkuak timajxiliaj san sekan tiyetoskej uan timotlapouiskej, ne sapanoua nisotlaua noso nonamik sotlaua. Ne nochi nechkuejsoua ijkuak nisotlaua. Ikinon san tikitaj televisión”.

•   “Tecnología techtonalpoloua”

   Katherine okijto: “Internet uan redes sociales techtonalpolouaj. Ompa uelis nitlachixtos miak horas maski amitlaj nikiluis nonamik. Noijki ualeua ijkuak tikitaj yitikatej itech okse cuarto”.

•   “Amo techpaktia tikchiuaskej san se tlamantli”

   Jane okijto: “Ijkuak nonamik ejko kalijtik, kichiua seki tlamantli tlen kipaktia uan kichiua kuali mamomachili. Kuali tlen kichiua porque chikauak tekipanoua uan moneki moseuis. Pero niknekiskia okachi matimotlapouikan ijkuak san sekan tikatej”.

•   “Sapanoua titekipanouaj”

   Mark okijto: “Tecnología ayakmo techkauilia matikitakan kox okachi ipati toteki noso tofamilia. Ualeua nikinnankilia mensajes noso correos tlen nechintitlaniliaj kanin nitekipanoua ijkuak uelis niyetoskia iuan nosiua”.

•   Nochipa xiyeto iuan monamik noso mosiua uan amo san ijkuak timajxilia.

   Principio bíblico: ‘Nochipa xikmatikah ken ijki nonkipejpenaskeh tlan okachi kuali’ (Filipenses 1:10).

   Ximokuayejyekokan nin tlamantli: ¿Tlen nankichiuaj uan tlen nanmokuayejyekouaj kiteititia okachi nankipatioitaj namoteki noso okseki tlamantli? ¿Tika iuan mosiua noso monamik san ijkuak timajxilia?

   Xikchiuakan nin tlamantli: Nochipa san sekan xiyetokan uan amo san ijkuak nanmajxiliaj.

   Anna okijto:“Niyolpaki ijkuak nonamik kijtoua san sekan itlaj tikchiuaskej. Nikita nechpatioita uan nikita kipaktia nouan yetos. Non kichiua okachi maniktlasojtla”.

•   Ayakmo san xikitokan namocomputadora, namocelular noso namotableta.

   Principio bíblico: “Nochi moneki tikitaskej keman tikchiuaskej” (Eclesiastés 3:1).

   Ximokuayejyekokan nin tlamantli: ¿Keski uelta ayakmo nanmotlapouiaj iuan namosiua noso namonamik ijkuak ajsi se mensaje itech namocelular?

   Xikchiuakan nin tlamantli: San sekan xitlakuakan maski san se uelta se tonal uan oksekan xikintlalikan namoteléfonos. Ijkon uelis nanmotlapouiskej tlen namechpanoua sejse tonal.

•   Tla uelis san sekan ximotlakouitij uan san sekan xitlachipauakan namokalijtik.

   Principio bíblico: “Okachi kuali ome uan amo san se porque kipiaj kuali intetliokolil porque chikauak tekitij” (Eclesiastés 4:9).

   Ximokuayejyekokan nin tlamantli: ¿Keski uelta monamik noso mosiua san iselti yaui tlatlaxtlauati noso kichiuati okseki tlamantli?

   Xikchiuakan nin tlamantli: San sekan ximopaleuikan maski ualeua amo moneki.

   Nina okijto: “Xikpatioitakan san sekan ximotlakouitij, san sekan xitlapajpakakan, san sekan xikkuelpachokan tlakemitl, san sekan ximotlachpanikan noso san sekan xikmaluikan namojardín... Xikpatioita xiyeto iuan monamik uan amo xikita ken amitlaj ipati”.

•    Ximoajsikamatikan uan amo xikchiakan tlen amo keman panos.

   Principio bíblico: “Nochteh manomechixmatikah non teajsikamatkeh” (Filipenses 4:5).

   Ximokuayejyekokan nin tlamantli: ¿Ken nankiteititiskej amo nankichiaj makichiua miak tlamantli namonamik noso namosiua?

   Xikchiuakan nin tlamantli: Ximotlapouikan tlen moneki nankichiuaskej. Xikitakan ken uelis nankichiuaskej uan xipakikan ijkuak san sekan nanyetoskej.

   Daniela okijto: “Nonamik amo keman sotlaua pero ne nimokokoua uan nisotlaua. Ualeua nikiluia makichiua tlen kipaleuis kuali mamomachili uan ne nimokaua kalijtik. Ye kichiua ejercicio uan ne nimoseuia. Ijkon tiome tikchiuaj tlen techpaktia”.

 Achto, sejse namejuan xikinnankilikan ninmej tlajtlanilmej. Satepan ximotlapouikan tlen onantlanankilijkej.

•    ¿Timajxilia tiyetos iuan monamik noso mosiua?

•   ¿Tlen tlamantli tiktlasojkamatilia monamik noso mosiua ijkuak san sekan nankatej?

•   ¿Tlen mitspaktiskia makichiua monamik noso mosiua?

•   ¿Keski uelta amo kuali tikkaki monamik noso mosiua porque tikitok mocomputadora, mocelular noso motableta?

•   ¿Tlen uelis nankichiuaskej tla nankinekij nankiteititiskej nanmoajsikamatij?

•   ¿Tlen uelis nankichiuaskej nin semana para nanmotlapouiskej ijkuak san sekan nanyetoskej?