Sapanoa miakej tlaltikpaktlakamej otlaixmatitoj itech Feria Internacional 2014 itech altepetl Ruán (ik norte itech ueyi altepetl Francia), ompa okitlalijkej itlaj tlen okinpakti tlaltikpaktlakamej, itoka: “Biblia: yiuejkika, axkan uan satepan”.

Ik itech kanin okatka, noijki okintlalijkej seki pantallas pampa kiteititiskej se video tlen tlajtoa itech tlen yiuejkika omoijkuilo itech Biblia, nin tlamantli sapanoa okinpakti tlaltikpaktlakamej. Noijki, ninmej tlaltikpaktlakamej omomachtijkej itech tlanojnotsalmej tlen kipia Biblia uan ken tlapaleuia, okajsikamatkej melauak tlen yiuejkika opanok uan mouika ika tlen kijtoaj ixtlamatkej uan noijki sapanoa moxexeloa.

Noijki okiteititijkej ken amo ikaj ueli kipojpoloa Biblia uan axkan kajki pampa uelis kitlajtoltiskej sapanoa miakej tlaltikpaktlakamej ika miakej formatos noso ika amatl. Okintliokolijkej Traducción del Nuevo Mundo, se Biblia tlen kichijchiuaj iTlaixpantijkauan Jehová ika kanaj 130 tlatlamantli tlajtolmej.

Miakej tlaltikpaktlakamej okitlasojkamatkej pampa iTlaixpantijkauan Jehová okintemakakej Biblias. Se siuatl tlen kinpaleuia telpokamej, oyajkej otlachiatoj uan okijto: “Biblia se totetliokolil. Se amochtli tlen yoltok. Nochipa nikmati ken nikyektlalis ouijkayotl tlen nikpia ijkuak niktlajtoltia.”

Se siuatl tlen kipia 60 xiuitl sapanoa okitlajtlachialti kimatis uelis kiselis se Biblia uan amo kitlaxtlauas. Nin siuatl okijto: “Nochtin moneki tiktlajtoltiskej pampa ma techpaleui”.