Graham Browne, se iTlaixpantijka Jehová, yikipia 80 xiuitl, okipaleui se tlakatl tlen amo kuali omokuayejyekoaya uan okinekiaya momiktis itech se torre tlen itoka Sky Tower tlen kipia 328 metros uejkapa itech altepetl Auckland (Nueva Zelanda). Browne kijtoa: “Ijkuak nin tlakatl okijto okinekiaya motlapouis iuan se iTlaixpantijka Jehová, policías san niman onechnotskej pampa ma nitlapaleui”.

“Akinmej tekitij itech Sky Tower onechilpijkej uan noijki onechilpilijkej se Biblia ika se mekatl. Policías onechuikakej kiauak kanin otikatkaj 192 metros uejkapan. Sapanoa sesek okatka ejekatl. Uan tlakatl tlen okinekiaya momiktis ompa omotlali itempa nin kali, pampa motitlaniskia.

”Oniknotski uan onikilui ne niiTlaixpantijka Jehová uan nikneki nikpaleuis. San niman onikchi se tlatlaujtilistli itech noyolo uan opejki iuan nimotlapouia ika Biblia.

”Kuali onikilui yolilistli sapanoa ipati, pampa nin tlamachtil onikpanolti itech tlapoualistli itech Kali kanin monechikoaj iTlaixpantijkauan Jehová.

”Onikilui: ‘ToTajtsin Dios sapanoa mitspatioita, uan omitstliokoli itlaj tlen sapanoa ipati: moyolilis. ¿Tikneki tikititis tikpatioita tlen omitstliokoli? Nimitstlatlaujtia xiuiki nikan pampa amo itlaj ma mitspano’.

”Oniktlajtoltili miakej tlaxelolmej itech Biblia, ken Juan 3:16 tlen kijtoa: ‘Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami’.

”Ik non, onikilui: ‘ToTajtsin Dios mitstlasojtla miak uan kineki xiyolto’.

”Achto onikitaya amo onechkaktoka non tlakatl. Oksepa oniktlatlaujti Jehová ma nechpaleui pampa uelis nikpaleuis non tlakatl. Saiktlami, yolik opejki notech motokia. Omotaya sapanoa omotekipachoaya.

”Ye onechilui: ‘Yikin onechtlajpalotoj iTlaixpantijkauan Jehová pero amo onikinseli. Amo kuali nimomachilia pampa ijkon onikchi. Nimitstlatlaujtia xinechtlapojpolui’.

”Onikilui: ‘Amo ximotekipacho, sekimej noijki ijkon otikchijkej ijkuak ayamo otimochiuayaj tiiTlaixpantijkauan Jehová. Jehová melauak mitstlapojpoluia’.

”Onechilui: ‘Tlasojkamati miak, nin kichiuas ayakmo okachi ma nimotekipacho’.

”San niman onikilui: ‘Nikneki itlaj nimitsiluis, ne niilpitok pampa amo itlaj ma nechpano, pero tla te otiuetski uelis timikis. Uan sapanoa kiyolkokos Jehová. Nimitstlatlaujtia xiuiki nikan itech tepamitl’.

”Ijkuak okachi kuali omomachiliaya tlakatl, okijto: ‘Kuali, ompa ma nio’.

”Ijkuak yopanok itech tepamitl, policías san niman okiuikakej uan okipaleuijkej. Iuan onimotlapoui kanaj se hora”.

ITlaixpantijkauan Jehová kinpaleuiaj tlaltikpaktlakamej ika miak tlasojtlalistli, okachi akinmej sapanoa moyolkokoaj. Itech nochi Tlaltikpak kinyolseuiaj ika tlen kijtoa Biblia uan kinmakaj se chialistli, uan kinyekiluiaj toTajtsin Dios melauak intech motekipachoa.