IQula Elikhokhelayo lizimisele sibili ukusebenzisa iminikelo esiyitholayo ukuze kwakhiwe futhi kulungiswe izakhiwo ezisetshenziswa ukusekela umsebenzi woMbuso. Ngokwesibonelo ngomnyaka wenkonzo ka-2023, oFakazi bakaJehova basebenzise imali edlula 500 miliyoni ukuze kuthengwe, kulungisiswe njalo kugcinwe amaWolu oMbuso lamaWolu Emihlangano Emikhulu esesimeni esihle. a Imali le kayihlanganisi imali esetshenziswa ngamabandla atshiyeneyo ukuze anakekele amaWolu awo oMbuso.

 Kuphinda kusetshenziswe iminikelo ukuze kwakhiwe njalo kunakekelwe amagatsha emhlabeni wonke okuyiwo ahlela futhi asekele umsebenzi wokutshumayela. Kutshintshwe lendlela eminye imisebenzi ebisenziwa ngayo emagatsheni ukuze kongiwe imali. Imali leyo ibisisetshenziswa ekwakhiweni kwamaWolu oMbuso lamaWolu Emihlangano Emikhulu. Kufuneka imali enengi okuzwayo ukuze kulungisiswe amagatsha njalo kwakhiwe amanye amatsha. Kungani umsebenzi wokwakha izakhiwo lezi uqakatheke kangaka? Okwenziwa emaBhetheli kunceda njani ukuthi umsebenzi wokutshumayela uphumelele?

 Amagatsha amanengi aseleminyaka engu-30 kusiya kwengu-40 akhiwa. Umfowethu uNicholas okuHlangothi Lokudweba Amaplani Lolokwakha olusemawofisini ethu amakhulu uthi: “Lanxa isakhiwo sigcinwe kuhle futhi sinakekelwa, siyaguga ngokuhamba kwesikhathi. Ukulungisisa izakhiwo kuyazivuselela ukuze ziqhubeke zisetshenziswa okwesikhathi eside.”

 Amagatsha kuyabe kumele alungisiswe ukuze aqhubeke esekela umsebenzi wenhlanganiso olokhu usiba mnengi. Phela inani labamemezeli liqansile kakhulu emazweni atshiyeneyo kusukela ngesikhathi kusakhiwa amagatsha emazweni la. Ngenxa yokwanda lokhu sekufuneka abantu abanengi ukuthi bazosebenza emaBhetheli okutsho ukuthi lezakhiwo lezo sokumele ziqheliswe ukuze abantu benele.

 Okunye esikukhangelayo ngezakhiwo lezi yikuthi azisoze zilimaze abantu abazisebenzisayo yini. Lokhe kusiba lezingozi zemvelo ezinengi njengoba sesingene sacwila ezinsukwini zokucina. (ULukha 21:11) Yikho ukwakha silandela izindlela esezisetshenziswa kulezinsuku kwenza ukuthi izakhiwo zethu ziqine futhi zihlale okwesikhathi eside. Ukuthuthukiswa kwezakhiwo lezi kuphinda kuncede ukuthi abafowethu labodadewethu abancedisa nxa kube lomonakalo wemvelo bathole indawo abangasebenzela kuyo.

 Ngomnyaka wenkonzo ka-2023 iQula Elikhokhelayo lanika imvumo yokuthi kulungisiswe njalo kuvuselelwe amagatsha angu-43. Lokhu kutsho ukuthi umsebenzi wokwakha lowokulungisa izakhiwo wenziwe emagatsheni amanengi. Ake sixoxe ngezibonelo ezimbili nje kuphela ezitshengisa ukuqakatheka komsebenzi lo.

 E-Angola. Umfowethu uMatt olilunga lekhomithi yegatsha e-Angola uthi: “Sizibonele ngawethu indlela isiphrofetho esi kuHagayi 2:7 esigcwaliseka ngayo elizweni lakithi. Inani labamemezeli liqanse ngamaphesenti angu-60 eminyakeni engu-10 nje kuphela. Ukuqansa kwenani leli kutsho ukuthi labasebenza eBhetheli sokumele babe banengi. Kodwa ngenxa yokuthi izakhiwo zethu zincane kakhulu, sasingenelisi ukubanxusa ukuthi babuye bazosebenza lapha. Lokhu bekubangela ukuthi abasebenza lapha eBhetheli babe lemisebenzi eminengi kakhulu njalo bacine besebenza i-overtime.”

 Kulabafowethu abacelwayo ukuthi bakhangele ukuthi kuyini okwakungenziwa ukuze igatsha liqheliswe. Ekuqaliseni babebona angani ukulungisa izakhiwo zegatsha yikho okwakuzalungisa uhlupho lolo. Kodwa kwathi ngemva kokuhlolisisa indaba le okwesikhathi eside bananzelela ukuthi ukulungisisa izakhiwo zegatsha kwakungasoze konge kangako imali. Yikho babona kungcono ukuthi kuthengwe esinye isakhiwo besesilungisiswa. Umfowethu uMatt uqhubeka esithi: “Ngesikhathi sisizwa ukuthi sasingenelisa ukuthenga lokulungisa isakhiwo esasiseduze khonapho, ikhomithi yegatsha yakhathazeka ngokuthi isakhiwo leso sasingasoze sibe njengaleso thina esingabe sizakhele sona. Kodwa kuyazikhanyela ukuthi uJehova wasibusisa isinqumo sethu ngoba isakhiwo lesi sesisihle okwamagama.”

 Kungenzakala ukuthi igatsha le-Angola lidinge ukuqheliswa eminyakeni emilutshwane elandelayo. Kodwa ukusebenzisa amakhonteyina kanye lesakhiwo lesi esisanda kulungiswa lokurenta kwezinye indawo kwenza labo abasebenza eBhetheli benelise ukuqhubeka besekela umsebenzi wokutshumayela.

 EJapan. Izakhiwo zakuqala zegatsha leJapan zakhiwa eminyakeni engu-40 eyadlulayo futhi zazingakaze zilungisiswe okuzwayo. Kunengi sibili okwakusenziwa ukuze izakhiwo lezi zigcinwe zisesimeni esihle kodwa iqiniso yikuthi sezindala futhi sezisebenze isikhathi eside. Lokhu kubangele ukuthi kuqaliswe umsebenzi omkhulu wokulungisisa izakhiwo lezi.

 Indlela izinto ezinengi ezenziwa ngayo eBhetheli layo isitshintshile. Ngokwesibonelo kungakafiki umnyaka ka-2015, imuli yonke yeBhetheli yayiphekelwa ukudla kwekuseni, okwemini lokwantambama. Yikho izindlu ezisetshenziswa yilabo abahlala eBhetheli yeJapan zazilungiswe zaba lokulikhitshi okuncane. Kodwa khathesi abanengi abasebenza eBhetheli sebeziphekela ukudla kwabo. Ukulungisiswa kwesakhiwo lesi sokunike ithuba lokuthi kufakwe amakhitshi amakhudlwana ukuze kube lula ukuthi bapheke ukudla kwabo. Udadewethu okuthiwa nguKumiko osebenza egatsheni leJapan uthi: “Sokulula kakhulu ukuphekela ekhitshini leli elitsha. Lokhu kungenza ngenelise ukusekela intshintsho ezenziwa yinhlanganiso.”

 Umsebenzi owenziwa egatsheni leJapan unceda amagatsha asemhlabeni wonke. (UMathewu 28:19, 20) Igatsha leJapan liphakathi kwamagatsha amabili kuphela aphrinta iBhayibhili eligcweleyo. Okunye okwenziwa ngesikhathi kulungisiswa igatsha leli yikufaka umtshina obamba amaphepha angasasebenziyo kanye lothuli olubakhona nxa kuphrintwa. Kusetshenziswe imali engafika 1 miliyoni ukuze kuthengwe njalo kufakwe umtshina lo. Umtshina lo uqakathekile ngoba uyanceda ukuthi kuqhubeke kuphrintwa ukudla okusiqinisa ukholo.

 Lanxa kwakusenziwa umsebenzi wokwakha, saba leqiniso lokuthi umsebenzi wokuphrinta amaBhayibhili awumi. Umfowethu uTrey olilunga lekhomithi yegatsha eJapan uthi: “Ngesikhathi sisenza umsebenzi wokwakha, inhlanganiso yethu yayikhipha amaBhayibhili amanengi ngezindimi ezitshiyeneyo futhi lomsebenzi wokudinda wawulokhu usiba mnengi. Ukuze umsebenzi wokudinda amabhuku lamaBhayibhili ungaphambaniseki ngesikhathi sokwakha, sasisiba leqiniso lokuthi amadiphathimenti atshiyeneyo esilawo eBhetheli ayabambisana ukuze labo ababeqhatshiwe ukuthi benze umsebenzi bewenze kuhle.” Senelisa ukuphrinta amaBhayibhili aphose afike 220 000 inyanga ngayinye kusukela ngoMarch kusiya ku-August 2023 lanxa ngalezonyanga sasilomsebenzi omkhulu wokulungisa indawo esiphrintela kuyo. Umsebenzi wonke lo wenziwa singazange sidlulise imali esasihlele ukuyisebenzisa.

 Okunye esizama ukukwenza nxa sisakha yikuthi singasebenzisi izinto ezidla amagetsi amanengi. Kuzafakwa ama-solar azanceda ukuthi songe imali engaba yi-120 000 dolazi umnyaka ngamunye. Umhlobo wamawindi esizawafaka lawo uzasinceda ukuthi singasebenzisi amagetsi amanengi futhi lokhu kutsho ukuthi sizonga imali engafika ku-10 000 dolazi umnyaka ngamunye. Lanxa indlela lezi zizangezelela imali esiyisebenzisa khathesi, ngokuya kwesikhathi zizasinceda ukuthi songe imali edlula 3.5 miliyoni ngoba ama-solar lawo lamawindi kuzahlala isikhathi eside. Ukusebenzisa indlela lezi kuyasinceda lokuthi singangcolisi umkhathi.

 Ukulungisiswa kwegatsha le-Angola leleJapan kutshengisa ukuthi mkhulu kakhulu umsebenzi okumele wenziwe lakwamanye amaBhetheli ukuze aqhubeke esekela umsebenzi wokutshumayela. Umfowethu u-Aaron okuHlangothi Lokudweba Amaplani Lolokwakha Emawofisini ethu amakhulu uthi: “Kunengi sibili osekwenziwe kodwa usasemkhulu kakhulu umsebenzi ophambili.” Manje uzakwenziwa njani umsebenzi lo omkhulu kangaka? U-Aaron uqhubeka esithi: “Siyabonga kakhulu ngeminikelo esilokhe siyithola ngoba imali yakhona isetshenziswa ukulungisisa izakhiwo zenhlanganiso. Siphinda sibabonge bonke abafowethu labodadewethu abazinikelayo labaqhubeka bezinikela ukuze bancedise emsebenzini wokwakha owenziwa emhlabeni wonke. Indlela elisekela ngazo umsebenzi wokwakha itshengisa ukuthi uJehova uyasibusisa sibili.”—IHubo 110:3.

 Wonke umsebenzi wokwakha lowokulungisisa izakhiwo zethu usekelwa ngeminikelo yokuzithandela eliyenza lisebenzisa donate.dan124.com. Siyalibonga kakhulu ngeminikelo yenu.