OFakazi bakaJehova bayabathanda labo abakhonza labo. (1 Phetro 2:17) Abanengi bethu sizizwa njengodade ohlala eKenya okuthiwa nguTannis. Uthi: “Ngiyakuthanda ukuzwa ngalokho okwenzakala kubafowethu labodadewethu emhlabeni jikelele.” UTannis labanye oFakazi bakaJehova emhlabeni wonke bazithola ngaphi izindaba mayelana lokwenzakala kubafowethu labodadewethu? Kusukela ngo-2013 besikhangela engxenyeni ethi Newsroom etholakala kuwebhusayithi yethu i-jw.org.

 Ku-Newsroom kutholakala imibiko ephathelane lemisebenzi eyabe yenziwe ngoFakazi bakaJehova, njengokwethulwa kwamaBhayibhili, ukunceda labo abehlelwe ngumonakalo, umsebenzi wokwakha lokunye okuqakathekileyo. Sitshelwa langabafowethu labodadewethu abasemajele ngenxa yokholo lwabo. Kutholakala lemibiko ephathelane lemikhankaso yokutshumayela kanye leSikhumbuzo. Ngobani abaqoqa imibiko yonke le futhi ilungiswa njani.

 I-Newsroom ikhangelwa yiwofisi yePublic Information (OPI). Uhlangothi lolu lusemawofisini amakhulu futhi luqondiswa yiKhomithi Yabahleli yeQula Elikhokhelayo. Kulabafowethu labodadewethu abadlula 100 abasebenza kuhlangothi lwe-OPI futhi abanengi babo ngabancedisa emsebenzini weBhetheli besezindlini. Okunye abakwenzayo yikubhala, ukuchwayisisa, ukukhangela ngemifanekiso lokuhumutsha. Abanye baxhumana leziphathamandla zikahulumende, izikhwicamfundo, uhlangothi lwezemfundo kanye labezindaba. I-OPI incediswa zinhlangothi zePublic Information Desk (PID) ezedlula 80 emagatsheni atshiyeneyo emhlabeni jikelele.

 Nxa kubhalwa indaba ethile, i-OPI isebenzelana le-PID. Nxa abafowethu bangakhetha ukubhala ngendaba ethile, bayachwayisisa bedingisisa kabanzi ngendaba yakhona. Lokhu kungagoqela lokuxoxa labantu abatshiyeneyo kanye lezingcitshi. Nxa bangathola konke mayelana lendaba, bayayibhala, bayilungise, bayihlole, bafake imifanekiso besebeyithumela kuKhomithi Yabahleli ukuze ibanike imvumo.

 Abafowethu labodadewethu bathini ngezinto ezitholakala ku-Newsroom. Udade ohlala ePhilippines uthi: “Ekuseni ngingakenzi lutho ngithanda ukuqalisa ngokubala izindaba mayelana lenhlanganiso kaJehova labantu bakhe.”

 Ababali abanengi bakhuluma ngomehluko okhona phakathi kwezindaba ezibhalwa ku-Newsroom eku-jw.org kanye lalezo ezibhalwa ngabanye nje abezindaba. UTatiana ohlala eKazakhstan uthi: “Ngiyathokoza ngoba izindaba eziku-jw.org ziliqiniso. Ngingazithemba.” Udade ohlala eMexico okuthiwa ngu-Alma uthi: “Izindaba eziku-Newsroom ziyakhuthaza kulalezo ezibhalwa ngabezindaba ezikhuluma ngezinto ezimbi ezenzakala emhlabeni.”

 Izindaba eziku-Newsroom ziphinda zisiqinise ukholo. UBernard ohlala eKenya uthi: “I-Newsroom ingincede ukuthi ngizibone ngilunga lemuli yabafowethu labodadewethu abasezindaweni ezitshiyeneyo emhlabeni.” Nxa ngithandaza ngiyenelisa ukubaqamba ngamabizo lokutsho izimo abakizo. Udade okuthiwa nguBybron laye ohlala eKenya uthi: “Ngiyathokoza kakhulu ngaso sonke isikhathi nxa ngibona izihloko ezikhuluma ngokwethula kwamaBhayibhili ngezindimi ezitshiyeneyo. Izihloko lezi zingikhumbuza ukuthi uJehova kakhethi.”

 Izindaba eziphathelane lokuhlukuluzwa kwabafowethu lazo zingasikhuthaza. UJackline ohlala eKenya uthi: “Ukucabangisisa ngesibindi sabo kuluqinisile ukholo lwami. Ngiyazama ukufunda ngokuthi kuyini okubanceda ukuthi baqinisele. Senginanzelele ukuthi lezinto abanengi abazibona zizincane ezinjengomthandazo, ukubala iBhayibhili, lokuhlabela zibancede njani abafowethu ukuthi bahlale bethembekile.”

 Udade ohlala eCosta Rica okuthiwa nguBeatriz uyaziqakathekisa kakhulu izindaba ezimayelana lomonakalo wemvelo. Uthi: “I-Newsroom inginceda ngibone ukuthi inhlanganiso yethu ibancedisa njani abafowethu labodadewethu. Lokhu kungenza ngingathandabuzi ukuthi le yinhlanganiso kaJehova.”

 Kuyasithokozisa ukuthola izindaba eziyabe zisanda kwenzakala eziphathelane labafowethu emhlabeni wonke. Iminikelo yenu eliyenzela umsebenzi womhlaba wonke yiyo enceda ukuthi senelise ukwenza lokhu futhi eminengi liyenza lisebenzisa i-donate.dan124.com. Siyabonga kakhulu.