ISIHLOKO ESISEKUQALISENI | UNKULUNKULU ULENDABA LAWE YINI?
UNkulunkulu Ufuna Ube Lobuhlobo Obuhle Laye
“Kakho ongeza kimi ngaphandle kokuthi uBaba ongithumileyo amsondeze.”—UJOHANE 6:44.
KUNGANI ABANYE BETHANDABUZA? Abanye abantu bakubona kunzima ukuthi basondele kuNkulunkulu lanxa bekholwa kuye. Omunye umama wase-Ireland okuthiwa nguChristina wayengalovi esontweni. Uthi: “Ngangikwazi ukuthi uNkulunkulu nguye owadala zonke izinto, kodwa ngangingamazi. Ngangingakaze ngitsho ngizizwe ngiseduze laye.”
ILIZWI LIKANKULUNKULU LISIFUNDISANI? UJehova kasikhalali nxa sizizwa singenelisi ukusondela kuye. UJesu wasitshengisa ukuthi uNkulunkulu ulendaba lapho esithi: “Uma indoda ilezimvu ezilikhulu enye iqambuke kwezinye, kayiyikuzitshiya yini lezo ezingamatshumi aficamunye lesificamunye ezintabeni iyoyidinga leyo eqambukileyo?” Nansi isifundo: “Ngaleyondlela uYihlo ezulwini kafisi ukuthi lamunye walaba abancinyane alahleke.”—UMathewu 18:12-14.
“Lamunye walaba abancinyane” uqakatheke kakhulu kuNkulunkulu. ‘Uyayidinga leyo eqambukileyo.’ Njani? Umbhalo osekuqaliseni kwesihloko lesi uthe uyabasondeza kuye abantu.
Ake sibone ukuthi uNkulunkulu wabasondeza njani abanye ababelesifiso sokumkhonza. Ekhulwini lokuqala C.E., wathuma umfundi ongumKhristu uFiliphu ukuthi anqamekele inqola yesikhulu esingumTopiya esasibala isiphrofetho esiseBhayibhilini. Wayefuna ayesichazela ukuthi isiphrofetho leso sitshoni. (ImiSebenzi 8:26-39) Waphinda wathi uPhetro avakatshele uKhoneliya owayengumlawuli webutho lamaRoma. UKhoneliya wayekade ethandaza njalo ezama ngamandla onke ukuthi akhonze uNkulunkulu. (ImiSebenzi 10:1-48) Kanti njalo wakhokhela uPhawuli labanye bakhe ukuthi baye emfuleni owawuphandle kwedolobho laseFiliphi. Befika lapho bahlangana loLidiya ‘owayengumkhonzi kaNkulunkulu,’ njalo “iNkosi yayivula inhliziyo yakhe ukuba emukele ilizwi.”—ImiSebenzi 16:9-15.
Yikho-ke kuyakhanya ukuthi uJehova kazange ayekele ukunika ababefuna ukumkhonza ithuba lokumazi. Lamuhla ngobani abavakatshela abantu emakhaya abo lasendaweni ezitshiyeneyo ezihlala zilabantu ukuze babatshele ukuthi iBhayibhili lithini ngoNkulunkulu? Abanengi bangathi: “NgoFakazi bakaJehova.” Yikho lawe zibuze ukuthi uNkulunkulu usebenzisa bona yini ukuthi akuncedise ukuthi ube lobuhlobo obuhle laye. Siyakukhuthaza ukuthi uthandaze kuNkulunkulu umcele ukuthi akuncede ukuze uvume nxa ezama ukukusondeza kuye. *
^ indima 8 Ukuze uthole okunengi bukela ividiyo ethi Kungani Kumele Ulifunde IBhayibhili? ku-www.dan124.com.
Nanku Okunye
OKUMAYELANA LATHI
Kungani Kumele Ulifunde IBhayibhili?
IBhayibhili linceda izigidi zabantu emhlabeni wonke ukuthi zithole izimpendulo zemibuzo ehluphayo ekuphileni. Ungathanda ukuthi lawe uthole izimpendulo?
