Liyini IJerusalema Elitsha?

KHALISA

Impendulo yeBhayibhili

Umutsho othi “iJerusalema Elitsha,” utholakala kabili eBhayibhilini futhi uyabe usitsho amaKhristu azabusa loJesu ezulwini. (ISambulo 3:12; 21:2) IBhayibhili liphinda libize amaKhristu la ngokuthi ngumlobokazi kaKhristu.

Okungasinceda sazi ukuthi liyini iJerusalema Elitsha

IJerusalema Elitsha lisezulwini. IBhayibhili likhuluma ngeJerusalema Elitsha njengedolobho elehla livela ezulwini lapho izingilosi ezilinde khona emasangweni edolobho leli. (ISambulo 3:12; 21:2, 10, 12) Ubukhulu bedolobho leli butshengisa ukuthi ngeke libe semhlabeni. Lidolobho elingamakhilomitha angaba ngu-2 200 ubukhulu. (ISambulo 21:16) Imiduli yalo ingaba ngamakhilomitha angu-560 ukuya phezulu.
IJerusalema Elitsha libunjwa ngabalandeli bakaJesu ababizwa ngokuthi ngumlobokazi kaKhristu. IJerusalema Elitsha libizwa ngokuthi “ngumlobokazi, umkaWundlu.” (ISambulo 21:9, 10) IWundlu okukhulunywa ngalo lapha nguJesu Khristu. (UJohane 1:29; ISambulo 5:12) “UmkaWundlu” kumbe umlobokazi kaKhristu umela amaKhristu azakuba loJesu ezulwini. IBhayibhili lifanisa ubuhlobo obukhona phakathi kukaJesu lamaKhristu la lalobo obukhona phakathi kwendoda lomkayo. (2 KwabaseKhorinte 11:2; Kwabase-Efesu 5:23-25) IJerusalema Elitsha lilezisekelo ezilitshumi lambili njalo phezu kwazo kulamabizo ‘abaphostoli beWundlu abalitshumi lambili.’ (ISambulo 21:14) Ivesi le isinceda sibone ukuthi amaKhristu azakuya ezulwini yiwo amela iJerusalema Elitsha, ngoba iBhayibhili lithi “lakhelwe phezu kwesisekelo sabaphostoli labaphrofethi.”—Kwabase-Efesu 2:20.
IJerusalema Elitsha lidolobho elingcwele. UDavida, uSolomoni lamanye amakhosi akoJuda ayebusa eseJerusalema esigodlweni sako-Israyeli. IBhayibhili lithi ayebusa ‘embusweni kaJehova.’ (1 ImiLando 29:23) Lokhu kutsho ukuthi iJerusalema kumbe idolobho elingcwele lalimela ubukhosi bukaJehova. (UNehemiya 11:1) IJerusalema Elitsha elibizwa langokuthi lidolobho elingcwele, libunjwa yilabo abazabusa loJesu besezulwini.—ISambulo 5:9, 10; 21:2.
IJerusalema Elitsha liletha izibusiso ebantwini. ISambulo 21:2 sithi iJerusalema Elitsha labonakala “lisehlela phansi liphuma ezulwini.” Lokhu kutsho ukuthi uJehova uyalisebenzisa ukuze asincede. IJerusalema Elitsha liyingxenye yoMbuso kaNkulunkulu azayisebenzisa ukuze afeze injongo yakhe emhlabeni. (UMathewu 6:10) Nanzi ezinye izibusiso ezizatholwa ngabantu emhlabeni:
- Ukukhitshwa kwesono. “Umfula wamanzi okuphila” ugeleza usuka eJerusalema Elitsha futhi uthelela ‘izihlahla zokuphila’ ezisetshenziswa ‘ukwelapha izizwe.’ (ISambulo 22:1, 2) Ukusiliswa lokhu kuzakhipha isono ebantwini futhi kubenze baphile phakade.—KwabaseRoma 8:21.
- Ukuba lobuhlobo obuhle loNkulunkulu. Ukuba lesono kwenze abantu behlukana loNkulunkulu. (U-Isaya 59:2) Ukukhitshwa kwesono kuzagcwalisa amazwi la: “Khathesi ikhaya likaNkulunkulu selisebantwini, uzahlala labo. Bazakuba ngabantu bakhe, njalo uNkulunkulu yena uqobo uzakuba labo.” —ISambulo 21:3.
- Ukuqedwa kokuhlupheka lokufa. UNkulunkulu uzasebenzisa uMbuso ukuze ‘esule zonke izinyembezi emehlweni abantu. Uzaqeda ukufa lokulila kanye lokukhala lobuhlungu.’—ISambulo 21:4.