Rosie ota ti: “Iinima mbyoka nda kala nokwiipula nayo, onda li ndi wete ya nayipala pakudhiladhila kwandje, ihe hasho yi li ngawo.” Omanyolo geni ge mu kwathele? Limwe lyomugo oMateus 6:34 ngoka ta ti: “Inamu sila esiku lyanofu oshimpwiyu, oshoka esiku lyanofu otali isile lyo lyene oshimpwiyu. Oshoka esiku kehe olya gwana nuudhigu walyo.” Rosie ngashingeyi ota ti kutya oohapu dhaJesus ndhoka, odhe mu kwathela e ethe po okukala ti ipula naashoka tashi vulu okuningwa ongula. Okwa gwedha ko a ti: “Ondi na nale omaupyakadhi, inaaku gwedhwa omaipulo kombinga yiinima mbyoka inaayi ningwa natango nenge nokuli tashi vulika itaayi ka ningwa.”

Yasmine naye okwa li a gwililwa po kiimpwiyu. Okwa ti: “Onda li handi lili omasiku gontumba moshiwike, nomausiku gamwe kanda li handi kotha. Onda mono kutya omadhiladhilo omawinayi otaga yono po onkalamwenyo yandje.” Enyolo lini lye mu kwathele? Okwa ti oPetrus gwotango 5:7 ngoka ta ti: ‘Tsikeni Kalunga iimpwiyu yeni ayihe, oshoka oye omusilishimpwiyu gweni.’ Yasmine okwa ti: “Mokweendela kwethimbo onda kala handi galikana Jehova nokwa li a yamukula omagalikano gandje. Onda li ndu uvite nda fa nda kuthwa omutengi omudhigu komapepe gandje. Ethimbo nethimbo omadhiladhilo omawinayi oga kala haga galukile ndje, ihe ngashingeyi ondi shi nkene ndi na okuungaunga nago.”

Omukiintu gumwe omugundjuka Isabella, ota ti: “Ondi wete kutya okuundulila komeho iinima mbyoka nda pumbwa okuninga onde ku thigulula, oshoka natate osho e li. Ohandi kaleke okuninga iinima mbyoka ya simana, opo ndi kale owala nda thuwa nenge tandi tala otiivii. Omukalondjigilile nguno ogwa nika oshiponga, oshoka ohagu ku ningitha wu kale wa gwililwa po komadhiladhilo nokuu longe sha shomupondo.” Ekotampango ndyoka lye mu kwathele otali adhika muTimoteus omutiyali 2:15, ngoka ta ti: “Kambadhala, u kale omulongihapu a hokiwa kuKalunga, ongaangoka inaa sa ohoni iilonga ye.” Isabella ota ti: “Kanda li nda hala Jehova a kale a sa ohoni iilonga yandje, molwaashoka handi yi undulile komeho.” Ngashingeyi okwa hwepopala lela.

Sha faathana, Kelsey ota ti: “Ohandi kala ndi na iilonga yontumba mbyoka yi na okupwa pethimbo lyokondandalunde, ihe ohandi ke yi longa owala komunute gwahugunina. Onda li handi kala tandi lili, ihaandi kotha notandi ipula. Osha li hashi etele ndje uupyakadhi.” Kelsey okwa li a kwathelwa kOmayeletumbulo 13:16 ngoka taga ti: “Omunamayele ohe ende pandunge, ihe omusama oha taandelitha uugoya.” Ota yelitha shoka i ilongo sho a tedhatedha kenyolo ndyoka, ta ti: “Oshi li pandunge okuninga shoka shi na oshilonga nokuunganeka iinima kuyele. Ngashingeyi ondi na embo moka handi nyola iinima mbyoka ndi na okuninga, naashoka ohashi kwathele ndje ndi unganeke nawa iinima yandje, kaandi tegelele sigo okomunute gwahugunina.”

Kirsten ota hokolola ta ti: “Omusamane gwandje okwa thigi po ondjokana yetu, a thigi ndje po naanona yane aashona.” Mbela enyolo lini lya li lye mu kwathele? Omayeletumbulo 17:17 ngoka taga ti: “Kuume oku na ohole aluhe, nomumwayina okwa valwa, opo a kwathe moluhepo.” Kirsten okwa li a kongo ekwatho kuyalwe megongalo. Oya li ye mu kwathele ngiini? Ota ti: “Ookuume kandje oya ambidhidha ndje momikalo odhindji. Yamwe oye etele ndje iikulya noongala. Iikando itatu onda li nda kwathelwa kongundu yaantu tu tembukile kegumbo lilwe pamwe naamwandje. Gumwe okwa kwathele ndje ndi mone iilonga. Ookuume kandje oya li aluhe haya kwathele ndje.”

Delphine ngoka a tumbulwa metetekelo naye okwa li ta kondjo nuuwike. Konima sho a li a taalelwa komaupyakadhi ga landulathana, ota hokolola ta ti: “Onda li ndi wete owala yakwetu taya nyanyukilwa onkalamwenyo yawo nayalwe, ihe ngame ondi li ongame awike noinandi nyanyukwa.” Enyolo limwe ndyoka lye mu kwathele olyo Episalomi 68:6 ndyoka tali ti: “Oye ta pe omapongo omagumbo.” Ota yelitha ta ti: “Onda li ndi shi kutya ovelise ndjoka itayi popi owala egumbo lyo lyenelyene. Ihe onda li nda tseya kutya Kalunga okwe tu pa egumbo lyopambepo, ehala moka twa gamenwa lela notu na ekwatathano lyolela nayalwe mboka ye mu hole. Onda li ndi shi kutya opo ndi kale ndi na ekwatathano lyopothingo nayo, ondi na tango okukala nekwatathano lyopothingo naJehova. Onkee ano, Episalomi 37:4 olya kwathele ndje mwaashoka, sho lya ti: ‘Konga uulinawa pOmuwa, note ku pe shoka wa yuulukwa.’”

Ota hulitha ta ti: “Onda li nda mono kutya onda pumbwa okukala ndi na ekwatathano lya kola naJehova. Oye Kuume a dhenga mbanda. Onda ningi omusholondondo gwiinima mbyoka tandi vulu okuninga nayalwe, opo ndi pange uukuume naamboka ye hole wo Jehova. Ondi ilongo okutala komaukwatya omawanawa gayalwe nokwaa tala kokwaagwanenena kwawo.”

Odhoshili kutya ookuume mboka haya longele Kalunga nayo inaya gwanenena. Oonzapo dhaJehova nadho otadhi kondjo owala nomaupyakadhi ngaashi aantu ayehe. Ihe edheulo lyOmbiimbeli ohali inyengitha aantu ya kwathele yalwe ngaashi tashi vulika. Oshi li pandunge okupanga uukuume naantu ya tya ngaaka. Ihe mbela omakotampango gOmbiimbeli otaga vulu ngaa okukwathela aantu nomaupyakadhi ngoka itaaga vulu okukandulwa po kunena, ngaashi omikithi dhoshinamenena noluhodhi?