1-2. (a) Oshike hashi tu kwathele tu idhidhimikile omamakelo esiku nesiku? Shi yelitha. (b) Oshike tatu ka kundathana moshitopolwa shika?

“UUNA tandi dhiladhila kombinga yemakelo ndyoka nda li mulyo, ondi shi kutya kanda li nde li idhidhimikile koonkondo dhandje mwene.” Mbela owa popya nale oshinima sha tya ngawo? Oyendji yomutse, otwe shi popya. Otashi vulika we shi popya konima sho wa li wa mono nkene wi idhidhimikile uuwehame wa kwata miiti nenge eso lyaangoka gwopopepi nangoye. Uuna to dhiladhila kemakelo ndyoka, oho kala wu uvite kutya owa li wa vulu okwiidhidhimika esiku nesiku, omolwekwatho owala lyombepo ondjapuki yaJehova, ndjoka ye ku pe “oonkondo dhi vule ndhoka dhopaunshitwe,” (NW). — 2 Kor. 4:7-9.

² Otwa pumbwa wo ombepo ondjapuki yi tu kwathele tu kondjithe okunwethwa mo kuuyuni mbuka wa kolokosha. (1 Joh. 5:19) Shimwe ishewe, otu na okukondjitha “oonkondo dhuuwinayi.” (Ef. 6:12) Tu na iinima mbyoka momadhiladhilo, otatu ka kundathana omikalo mbali moka ombepo ondjapuki hayi tu kwathele. Opo nduno, otatu ka kundathana shoka tatu vulu okuninga, opo ombepo ondjapuki yi tu kwathele pakuudha.

3. Omomukalo gumwe guni Jehova he tu kwathele tu idhidhimikile omamakelo?

³ Ombepo ondjapuki yaJehova ohayi tu kwathele, moku tu nkondopaleka tu vule okugwanitha po iinakugwanithwa yetu, nonando otu li momamakelo. Omuyapostoli Paulus okwa li e uvite kutya okwa li ta vulu okutsikila okulongela Jehova, molwaashono okwa li i inekela ‘moonkondo dhaKristus,’ nonando okwa li momayeleko. (2 Kor. 12:9) Pethimbo lyolweendo lwe olutiyali lwuutumwa, ka li owala a longo nuudhiginini miilonga yokuuvitha, ihe nomokwiikwathela wo pashimaliwa. Okwa li a kala muKorinto, megumbo lyaAkula naPriskila, mboka ya li aatungi yootenda. Omathimbo gamwe, okwa li ha longo pamwe nayo, molwaashoka naye okwa li wo omutungi gwootenda. (Iil. 18:1-4) Paulus okwa li a nkondopalekwa kombepo  ondjapuki a longe iilonga yokwiikongela omboloto noku gwanithe po uukalele we.

4. Shi ikolelela kAakorinto aatiyali 12:7b-9, uupyakadhi wuni Paulus a li e na?

⁴ Lesha 2 Aakorinto 12:7b-9. Moovelise ndhika, Paulus okwa li ta ti shike, sho a ti kutya okwa li e na “uuwehame uunene wopalutu” nenge tu tye ekwega monyama? Uuna wu na uuwehame wopalutu, oho kala wu uvite uululume owundji. Onkee ano, Paulus okwa li ta ti kutya okwa li e niwe kuuwehame, omolwemakelo lyontumba. Emakelo ndyoka okwe li ithana “omutumwa gwaSatana,” ngoka a kala noku mu ‘dhenga.’ Satana nenge oompwidhuli dhe, otashi vulika hayo ya li ya etitha omamakelo ngoka ga li ga adha Paulus, ngoka ga fa ekwega monyama. Ihe sho oombepo ndhoka dhuuwinayi dha mono “uuwehame” we, otashi vulika dha kala dha halelela oku wu pimbilitha, opo wu kale wa kwata miiti. Paulus okwa ningi po shike?

5. Omomukalo guni Jehova a li a yamukula omagalikano gaPaulus?

⁵ Petameko, Paulus okwa li a hala Jehova a kuthe po “uuwehame” mboka. Okwa ti: ‘Onda galikana Omuwa Jehova lutatu nonde mu indile, e wu kuthe ndje.’ Nonando okwa li a galikana, uuwehame owa tsikile okukala po. Mbela shika otashi ti kutya Jehova ka li a yamukula omagalikano gaPaulus? Hasho dha li. Okwa li e ga yamukula. Jehova ka li a kutha po uupyakadhi we, ihe okwa li e mu pe oonkondo e wu idhidhimikile. Jehova okwa ti: “Oonkondo dhandje odho oonenenene kwaamboka aankundi.” (2 Kor. 12:8, 9) Kekwatho lyaJehova, Paulus okwa li a vulu okukaleka po enyanyu lye nombili yokomwenyo. — Fil. 4:4-7.

6. (a) Jehova otashi vulika a yamukule ngiini omagalikano getu? (b) Omashilipaleko geni taga adhika momanyolo ngoka ge li mokatendo, ge ku tsa omukumo?

⁶ Ngaashi Paulus, mbela nangoye opu na esiku wa indilile Jehova e ku kuthe mo muudhigu? Otashi vulika wa li wa indile wa mana mo kombinga yaashoka iikando oyindji, ihe inawu za po nenge nokuli wa pimbile owala. Mbela shoka osha li she ku ningitha wu dhiladhile kutya Jehova ine ku hokwa? Ngele osho, dhimbulukwa oshiholelwa shaPaulus. Ngaashi owala Jehova a li a yamukula omagalikano ge, odhoshili kutya ota ka yamukula wo goye. Jehova otashi vulika kaa kuthe po uupyakadhi woye. Ihe ota vulu oku ku kwathela ombepo ye ondjapuki, yi ku nkondopaleke wu vule oku wu idhidhimikila. (Eps. 61:3, 4) Otashi vulika to “hepekwa unene,” ihe Jehova ite ke ku ekelahi. — 2 Kor. 4:8, 9; Fil. 4:13.

7-8. (a) Omomukalo guni ombepo ondjapuki ya fa ombepo ndjoka hayi pepe? (b) Petrus okwa hokolola ngiini okulonga kwombepo ondjapuki?

⁷ Omomukalo gumwe guni ombepo ondjapuki hayi tu kwathele? Osikepa ohayi vulu okweendithwa kombepo ndjoka tayi pepe ya uka hoka tayi yi sigo ya thiki, nonando mefuta omu na oshikungulu. Sha faathana, ombepo ondjapuki otayi vulu oku tu kwathela tu vule okulongela Jehova, nonando opu na omaupyakadhi, sigo twa thiki muuyuni uupe mboka a uvaneka.

⁸ E li omuyuli gwoohi, omuyapostoli Petrus okwa li e shi oshindji kombinga yomalweendo gomefuta. Onkee ano, oshi li oshindhindhilikwedhi, sho a hokolola okulonga kwombepo ondjapuki, ta longitha uutumbulilo mboka tashi vulika wa faathana nokweenda nosikepa mefuta. Okwa nyola a ti: “Kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.” Oshitya shOshigreka shoka sha tolokwa “wilikwa,” paulelalela otashi ti “endithwa.” — 2 Pet. 1:21.

9. Petrus okwa li a hala aantu ya dhiladhile shike, sho a popi kutya aantu oya li ya “wilikwa” kombepo ondjapuki?

⁹ Petrus okwa li a hala aantu ya dhiladhile shike, sho a popi kutya aantu oya li ya “wilikwa” kombepo ondjapuki? Oshitya shOshigreka shoka sha tolokwa ngawo, osha li sha longithwa momukalo gwa faathana kuLukas, omunyoli gwemboMbiimbeli lyIilonga, sho a hokolola osikepa ndjoka ya li ya ‘falwafalwa’ kombepo. (Iil. 27:15) Onkee ano,  omulongwantu gumwe gwOmbiimbeli okwa ti kutya sho Petrus a nyola kutya aanyoli yOmbiimbeli oya li ya “wilikwa” kombepo ondjapuki, okwa longitha uutumbulilo mboka tawu ningitha aantu ya dhiladhile kombinga yokweenda mefuta nosikepa. Petrus okwa ti kutya ngaashi owala osikepa hayi endithwa kombepo, opo yi ka thike hoka tayi yi, aahunganeki naanyoli yOmbiimbeli oya li ya wilikwa kombepo ondjapuki ya vule okugwanitha po oshilonga shawo. Omulongwantu oye tuu ngoka okwa ti: “Aahunganeki oya li ya yalaleke oothaila dhawo pathaneko.” Jehova okwa li a ningi shoka a pumbwa okuninga. Okwa li e ya pe ‘ombepo’ nenge tu tye ombepo ondjapuki. Aanyoli yOmbiimbeli oya li ya ningi shoka ya pumbwa okuninga. Oya longo metsokumwe newiliko lyombepo ondjapuki.

10-11. Iinima iyali yini twa pumbwa okuninga, opo tu kale nuushili kutya otatu wilikwa kombepo ondjapuki? Gandja oshiholelwa.

¹⁰ Odhoshili kutya kunena Jehova iha longitha we ombepo ondjapuki, yi wilike aantu ya nyole omamboMbiimbeli. Nonando ongaaka, ohe yi longitha yi wilike aapiya ye. Sigo okunena, oha ningi shoka a pumbwa okuninga. Ombepo ye otayi vulu ngiini oku tu kwathela? Ongele tatu shilipaleke kutya otatu tsikile okuninga shoka twa pumbwa okuninga. Otatu shi ningi ngiini?

¹¹ Dhiladhila keyelekanitho ndika. Opo omweendifuta a kwathelwe kombepo, oku na okuninga iinima iyali. Shotango, oku na okuukitha ombautu ye mpoka ombepo tayi pepe. Ngele hasho, ombautu itayi ka ya komeho, ngele okwa kala petulilosikepa e li kokule naampoka ombepo tayi pepe. Oshitiyali, okwa pumbwa okuyalaleka nokupatulula oothaila dhe dha pwa ko, ngaashi tashi vulika. Nokuli nonando ombepo oyi kale tayi pepe, ombautu ye otayi ka ya owala komeho, ngele oothaila dha yalalekwa kombepo. Sha faathana, otatu ka vula owala okutsikila okulongela Jehova kekwatho lyombepo ondjapuki. Opo yi tu kwathele, otu na okuninga iinima iyali. Shotango, otu na okukala mewiliko lyombepo yaKalunga, mokulonga iilonga mbyoka yi li metsokumwe nayo. Oshitiyali, otwa pumbwa “okuyalaleka oothaila dhetu” pombanda, opo tu vule okukutha ombinga miilonga  mbyoka ngaashi tatu vulu. (Eps. 119:32) Ngele otwe shi ningi, ombepo ondjapuki otayi ke tu wilika tu idhidhimikile omapataneko nomamakelo notayi ke tu kwathela wo tu tsikile okulongela Jehova nuudhiginini sigo twa thiki muuyuni uupe.

12. Oshike tatu ka kundathana ngashingeyi?

¹² Sigo opo mpaka, otwa kundathana omikalo mbali moka ombepo ondjapuki hayi tu kwathele. Ohayi tu nkondopaleke nohayi tu kwathele tu kale aadhiginini, manga twa taalela omamakelo. Ohayi tu wilike wo nohayi tu kwathele tu longe iilonga mbyoka Jehova a hala tu longe, naashoka otashi ke tu petha omwenyo gwaaluhe. Ngashingeyi otatu ka kundathana iinima ine, mbyoka twa pumbwa okuninga, opo tu kwathelwe kombepo ondjapuki pakuudha.

13. Shi ikolelela kuTimoteus omutiyali 3:16, 17, Omanyolo otaga vulu oku tu ningila shike, ihe oshike tu na okuninga?

¹³ Shotango, natu kale hatu konakona Oohapu dhaKalunga. (Lesha 2 Timoteus 3:16, 17.) Oshitya shOshigreka shoka sha tolokwa “nyolithwa kOmbepo yaKalunga,” paulelalela otashi ti “Kalunga okwa li a fudha.” Kalunga okwa li a longitha ombepo ye, a “fudhile” omadhiladhilo ge maanyoli yOmbiimbeli. Uuna tatu lesha Ombiimbeli nokutedhatedha kwaashoka twa lesha, omalombwelo gaKalunga ohaga gumu omitima dhetu nomadhiladhilo getu. Ohage tu inyengitha wo tu kaleke onkalamwenyo yetu metsokumwe nehalo lyaKalunga. (Heb. 4:12) Ihe opo ombepo ondjapuki yi tu kwathele pakuudha, otwa pumbwa okwiitulila po ethimbo lyokukonakona Ombiimbeli pandjigilile nokudhiladhila muule kwaashoka twa lesha. Opo nduno, Oohapu dhaKalunga otadhi ka nwetha mo ashihe shoka tatu popi naashoka tatu ningi.

14. (a) Omolwashike tatu vulu okutya “ombepo ohayi pepe” pokugongala kwetu kwopaKriste? (b) Ongiini tatu vulu okukala twa “yalaleka oothaila” dhetu pokugongala?

¹⁴ Oshitiyali, natu longele Kalunga pamwe. (Eps. 22:22) Oku shi popya pathaneko, “ombepo ohayi pepe” pokugongala kwetu. Sha hala okutya, ombepo yaJehova opo hayi kala pokugongala kwetu. (Eh. 2:29) Omolwashike tatu tile ngawo? Omolwaashoka uuna twa gongala pamwe nAakriste ooyakwetu, ohatu galikana tu pewe ombepo ondjapuki, ohatu imbi omaimbilo gUukwaniilwa gi ikolelela kOohapu dhaKalunga nohatu pulakene komalombwelo gopaMbiimbeli, ngoka hatu pewa kaamwatate mboka ya langekwa po kombepo ondjapuki. Ombepo oyo tuu ndjoka, ohayi kwathele aamwameme yi ilongekidhe noya gandje iitopolwa yawo. Ihe opo ombepo ondjapuki yi tu kwathele pakuudha, otwa pumbwa okwiilongekidha oku ka kutha ombinga pokugongala. Kungawo, ohatu kala pokugongala twa “yalaleka oothaila” dhetu pathaneko.

15. Ombepo ondjapuki ohayi tu kwathele ngiini miilonga yokuuvitha?

¹⁵ Oshititatu, natu kale hatu kutha ombinga miilonga yokuuvitha. Uuna tatu longitha Ombiimbeli miilonga yokuuvitha noyokulonga aantu, kungawo otatu etha ombepo ondjapuki yi tu kwathele muukalele wetu. (Rom. 15:18, 19) Ihe opo yi tu kwathele pakuudha, otu na okukala hatu kutha ombinga pandjigilile miilonga yokuuvitha nokulongitha Ombiimbeli ngaashi tashi vulika. Omukalo gumwe to vulu okuhwepopala muukalele, omokulongitha iiholelwa yoonkundathana mOkafo Onkalamwenyo yopaKriste niilonga yetu yokuuvitha.

16. Omomukalo gumwe unene guni hatu pewa ombepo ondjapuki meukililo?

¹⁶ Oshitine, natu kale hatu galikana kuJehova. (Mat. 7:7-11; Luk. 11:13) Omukalo gumwe unene moka hatu pewa ombepo ondjapuki meukililo, oku yi pula Jehova megalikano. Kapu na shoka tashi vulu okwiimba omagalikano getu ga uvike kuJehova nenge tashi vulu okwiimba tu pewe ombepo yaKalunga ndjoka yi li omagano omawanawa, kutya nduno ondholongo nenge nokuli Satana. (Jak. 1:17) Omomukalo guni tu na okugalikana, opo yi tu kwathele pakuudha? Opo tu mone eyamukulo, natu konakoneni muule kombinga  yokugalikana, mokutala keyele limwe ndyoka tali adhika owala mEvaangeli lyaLukas. *

17. Oshike tatu ilongo shi na ko nasha nokugalikana, meyele ndyoka li li muLukas 11:5-9, 13?

¹⁷ Lesha Lukas 11:5-9, 13. Eyele lyaJesus otali tu kwathele tu mone nkene tu na okugalikana tu pewe ombepo ondjapuki. Meyele ndyoka, omulumentu okwa li a pewa shoka a pumbwa, ‘omolwuudhiginini we wokwiindila.’ Ka li a tila okupula kuume ke ekwatho, nonando osha li mokati kuusiku. (Tala uuyelele wokukonakonwa wa kankamena kuLukas 11:8.) Jesus okwa ti shike meyele ndyoka ngele tashi ya pokugalikana? Okwa ti: “Indileni, e tamu pewa; kongeni, e tamu mono; konkoleni, e tamu egululwa.” Shoka otashi tu longo shike? Otashi tu longo kutya, opo tu pewe ombepo ondjapuki, otu na okugalikana nuudhiginini.

18. Shi ikolelela keyele lyaJesus, omolwashike tatu vulu okukala neinekelo kutya Jehova ote ke tu pa ombepo ye ondjapuki?

¹⁸ Eyele lyaJesus otali tu kwathele wo tu mone kutya omolwashike Jehova te ke tu pa ombepo ondjapuki. Omulumentu gwomeyele okwa li a hala a yakule omuyenda gwe nawa. Okwa li e uvite kutya okwa pumbwa okulongekidhila omuyenda gwe iikulya ngoka e ya mokati kuusiku, nonando ka li e na sha shoku mu pa. Jesus okwa ti kutya omushiinda ngoka okwa pe omulumentu ngoka oshikwiila, molwaashoka okwa tsikile noku mu indila. Jesus okwa li ta ti shike? Okwa li ta ti kutya ngele omuntu inaa gwanenena oha kala e na ehalo lyokukwathela omushiinda ngoka a kala noku mu indila, osha yela kutya Tate yetu gwomegulu omunalukeno, ota ka kala wo a hala okukwathela mboka haye mu pula nuudhiginini ombepo ye ondjapuki. Onkee ano, otatu vulu okugalikana Jehova tu na einekelo kutya ota ka yamukula omagalikano getu ga endelela, e tu pe ombepo ondjapuki. — Eps. 10:17; 66:19.

19. Omolwashike tatu vulu okukala nuushili kutya otatu ka sindana?

¹⁹ Otatu vulu okukala nuushili kutya otatu ka sindana, nonando Satana na kale te tu kondjitha shi thike peni. Omolwashike? Omolwaashoka ombepo ondjapuki ohayi tu kwathele momikalo mbali. Gwotango, ohayi tu nkondopaleke tu vule okwiidhidhimikila omashongo. Omutiyali, oyi li oonkondo ndhoka hadhi tu kwathele tu tsikile okulongela Jehova, sigo twa thiki muuyuni uupe. Onkene natu kale twa tokola toko okweetha ombepo ondjapuki yi tu kwathele ngaashi tashi vulika!