OMUMWAMEME Sylviana, ngoka e li omukokolindjila noku na omimvo 27, okwa ti: “Sho nda pulakene kiimoniwa yookuume kandje, mboka ya longela hoka kwa li ku na ompumbwe onene yaakokolindjila, onda kala nda halelela okumona enyanyu ndyoka wo.” Okwa gwedha ko a ti: “Ihe onda li nda tila oku ka longa hoka ku na ompumbwe onene, oshoka onda li ndi wete itaashi wapa kungame.”

Mbela nangoye oho kala wu uvite ngaashi Sylviana? Mbela nangoye owa halelela oku ka longa koshitopolwa hoka ku na ompumbwe yaauvithi yUukwaniilwa, noho kala to ipula ngele ono ka adhe ngaa elalakano lyoye? Ngele osho, kala wu na omukumo! Kekwatho lyaJehova, aamwatate naamwameme oyendji, oya sinda omashongo ngoka ga li tage ya imbi ya tamunune mo uukalele wawo. Opo tu mone nkene Jehova a li e ya kwathele, natu ka taleni kwaashoka sha ningwa moMadagascar, ontuntu ontine yomoontuntu oonene muuyuni.

Uule womimvo omulongo dha ka pita, aauvithi naakokolindjila aalaadhi, ye vulithe po 70 ya za kiilongo 11, * oya ka longela moshitopolwa shomenenevi Afrika shi na aantu oyendji haya pulakene noya simaneka Ombiimbeli,. Natango, aauvithi oyendji yomoshitopolwa, oya kala ye na ehalo lyokutembuka, opo ya ka kwathele mokutaandelitha etumwalaka lyUukwaniilwa muMadagascar alihe. Natu ka taleni shoka yamwe yomuyo taya ti.

Louis naPerrine, aaihokani ye na omimvo 30 nasha, oya tembukila koMadagascar okuza koFulaanisa. Uule womimvo, oya kala taya dhiladhila kombinga yokutamununa mo uukalele wawo mokuya kiilongo yilwe, ihe Perrine okwa kala ta kakadhala okutembuka. Okwa ti: “Onda li nda tila okuya kokuma kaandi shi ko. Onda li tandi ipula kombinga yokuthiga po aanegumbo yetu, egongalo, ehala lyetu, omahala agehe ngoka tu shi nosho wo shoka twi igilila okuninga. Odhoshili kutya shoka nda li tandi ipula nasho, osho sha li einda enene ndyoka nda li ndi na okusinda.” Mo 2012, Perrine okwa tula omwenyo mombinzi, e taya tembuka. Etokolo ndyoka ya ningi, okwa li e li uvitile ngiini? Okwa ti: “Okutala kethimbo ndiya, otandi vulu okutya osha li sha koleke eitaalo lyetu okumona Jehova te tu kwathele monkalamwenyo yetu.” Omumwatate Louis okwa gwedha ko a ti: “Osha li oshihokithi okumona aakonakonimbiimbeli yetu ye li omulongo, pEdhimbuluko lyetu lyotango moMadagascar!”

 Oshike sha li sha kwathele aaihokani mbaka ya tsikile noshinakugwanithwa shawo, uuna pwa holoka uupyakadhi? Oya galikana kuJehova, e ya pe oonkondo yi idhidhimike. (Fil. 4:13) Omumwatate Louis okwa ti: “Otwa li twe shi mono kutya Jehova okwa yamukula omagalikano getu nokwe tu pa ‘ombili yaKalunga.’ Otwa li twa gandja eitulomo kenyanyu ndyoka twa mono muukalele. Shimwe ishewe, ookuume ketu yokoFulaanisa, oya li ye tu tumine oo-email noontumwafo, taye tu ladhipike kaatu teke omukumo.” — Fil. 4:6, 7; 2 Kor. 4:7.

Jehova okwa yambeka noonkondo Louis naPerrine, omolweidhidhimiko lyawo. Omumwatate Louis okwa ti: “MuKotoba 2014, otwa yi kOsikola yOmbiimbeli yOkudheula Aaihokani Aakriste * koFulaanisa. Okuhita osikola ndjoka, okwa li omagano kaage shi okudhimbiwa, ga za kuJehova.” Konima sho osikola ya pu, aaihokani mboka oya li ya nyanyukwa, sho ya tuminwa koMadagascar.   

Omumwatate Didier nomukadhi Nadine, ye na omimvo 50 nasha, oya tembukile koMadagascar okuza koFulaanisa mo 2010. Omumwatate Didier okwa ti: “Otwa tameke okukokola ondjila manga aagundjuka, notwa li twa mono aanona yatatu. Sho ya ningi aakuluntu, otwa dhiladhila tu ka longele kondje yoshilongo.” Omumwameme Nadine okwa ti: “Edhiladhilo lyetu lyokuthiga po aanona yetu olya ningitha ndje ndi ongaonge, ihe oye tu lombwele ya ti: ‘Ngele omwa tembukile kiilongo yilwe mu ka longele hoka ku na ompumbwe onene, otatu ke mu nyanyukilwa!’ Oohapu dhawo odhe tu tsu omukumo tu tembuke. Nonando ngashingeyi otu li kokule naanona yetu, otwa pandula sho hatu popi nayo aluhe.”

Osha li eshongo komumwatate Didier nomukadhi Nadine, okwiilonga elaka lyOshimalagasi. Omumwameme Nadine okwa popi ti imemeha ta ti: “Katu na we omimvo 20.” Oya li ye shi pondola ngiini? Tango, oya kala haya yi kegongalo lyOshifulaanisa. Konima sho ya mono kutya oyi ilongekidha okwiilonga elaka lyomoshitopolwa, oya tembukile kegongalo lyOshimalagasi. Omumwameme Nadine okwa ti: “Aantu oyendji mboka hatu uvithile, oye hole okukonakona Ombiimbeli. Olundji ohaye tu pandula, sho hatu ya talele po. Petameko, onda li ndi shi otandi yaguma. Ondi hole okukokola ondjila moshitopolwa muka. Ongula onene ngele nda penduka, ohandi ilombwele te ti: ‘Iyaloo, sho tandi ku uvitha nena!’”

Omumwatate Didier ohi imemeha, uuna ta dhimbulukwa ethimbo a tameke okwiilonga Oshimalagasi. Okwa ti: “Onda li tandi kwatele komeho okugongala, ihe kanda li ndu uvite ko omayamukulo agehe ngoka aamwatate naamwameme taya gandja. Onda li owala handi ti: ‘Tangi.’ Konima sho nda pandula omumwameme gumwe sho a yamukula, mboka ya li ya kuutumba konima ye, oyu ulike kutya eyamukulo lye kali li mondjila. Nziya ondu ulike omumwatate gumwe a gandje eyamukulo, nonda li ndi inekela kutya okwa gandja eyamukulo li li mondjila.”

Koshigongi shoshitopolwa mo 2005, omumwatate Thierry nomukadhi Nadia, oya tala oshinyandwa shedhina: “Pursue Goals That Honor God” (Lalakaneneni omalalakano ngoka taga simanekitha Kalunga). Oshinyandwa shoka shopaMbiimbeli kombinga yaTimoteus, osha li she ya gumu komutima, noya kala ya halelela oku ka longela hoka ku na ompumbwe yaauvithi yUukwaniilwa. Omumwatate  Thierry okwa ti: “Konima sho oshinyandwa sha pu ko, manga tatu hakele, onde egamene komukulukadhi gwandje e tandi mu pula te ti: ‘Otatu yi peni?’ Okwa ti kutya naye oti ipula noshinima sha faathana.” Okuza mpono, oya tameke okukatuka oonkatu, opo ya adhe elalakano lyawo. Omumwameme Nadia okwa ti: “Kashona nakashona, otwa shonopeke iinima yetu sigo twa thigala po owala naambyoka ya gwana mookofa ne!”

Mo 2006 oya yi koMadagascar, noya tyapula okuuvitha hoka okuza ngaa sho ya thiki mo. Omumwameme Nadia okwa ti: “Aantu mboka tu uvithile oyi inyenge momukalo omwaanawa noshe tu nyanyudha.”

Konima yomimvo hamano, aaihokani mboka oya adhika keshongo limwe. Yina yaNadia, Marie-Madeleine, ngoka a li ha kala koFulaanisa, okwa li a gu e ta teka okwaako nokwa li a mona oshiponga komutse. Konima sho Thierry naNadia ya popi nandohotola gwe, oya pula Marie-Madeleine a ka kale nayo koMadagascar. Nonando okwa li e na omimvo 80 pethimbo mpono, okwa li a taamba ko shoka a lombwelwa. Oku shi uvitile ngiini sho e li kondje yoshilongo? Okwa ti: “Omathimbo gamwe oshidhigu okwiigilila kiilongo yilwe, ihe nonando ihandi vulu okuninga kehe shimwe, ondu uvite lela ndi na oshilonga megongalo. Ihe shoka sha nyanyudha ndje lela, oosho elongekidho ndika inaali imba aamwandje ya tsikile nuukalele wawo mboka wa li tawu eta iizemo iiwanawa.”

Riana, omumwatate gwomimvo 22. Okwa putukila moAlaotra Mangoro, oshitopolwa shi na evi ewanawa shi li muuzilo waMadagascar. Okwa li he shi enditha nawa mosikola yongula, nokwa li a hala okulalakanena elongo lyopombanda. Ihe sho a konakona Ombiimbeli, okwa lundulula omadhiladhilo ge. Okwa ti: “Onda kambadhala ndi mane osikola yandje, nondu uvanekele Jehova kutya ‘ngele onda piti ekonakono lyandje lyahugunina, otandi ningi omukokolindjila.’” Konima sho a piti, Riana okwa dhiginine euvaneko lye. Okwa ka kala pamwe nomumwatate omukokolindjila nokwa mono iilonga hayi longwa omalupita, e ta tameke okukokola ondjila. Okwa ti: “Ndyoka olya li etokolo ewanawa inaandi ninga nando onale.”

Nonando ongawo, aapambele yaRiana, kaya li ye shi uvite ko kutya omolwashike inaa lalakanena eithano lyomuuyuni. Okwa ti: “Tate, omumwayina gwatate gwomulumentu nosho wo omumwayina omukiintu gwameme ngu a vala tate, ayehe oya li ya ladhipike ndje ndi lalakanene elongo lyopombanda. Ihe kanda li nando nda hala okweetha po uukokolindjila, omolwoshinima shontumba.” Konima yethimbo efupi, Riana okwa kala a hala oku ka longa hoka ku na ompumbwe onene yaauvithi. Oshike sha li she mu ningitha a kale a hala okuninga ngawo? Okwa ti: “Megumbo lyetu omwa li mwi iteyele oombudhi, e tadhi yaka mo iinima yetu oyindji. Oshinima shoka osha ningitha ndje ndi dhiladhile koohapu dhaJesus, ndhoka tadhi popi kombinga yokwiilikolela ‘omaliko megulu.’ Onda tokola ndi longe nuudhiginini ndi imonene omaliko gopambepo.” (Mat. 6:19, 20) Onkee ano, Riana okwa tembukile kuumbugantu woshilongo, oshitopolwa sha kukuta, pu na oshinano shookilometa 1 300 okuza mpoka a li ha zi. Koshitopolwa hoka a tembukile, okwa li aantu yelaka lyOshitandroy. Omolwashike a yi ko?

Omwedhi gwa tetekele manga iinima yawo inaayi yakwa po, Riana okwa li a tameke okukonakona Ombiimbeli naalumentu yaali yelaka lyOshitandroy. Okwa li i ilongo omautumbulilo gamwe gomOshitandroy, e ta dhiladhila kombinga yaantu oyendji yelaka ndyoka, mboka kaaya li natango yu uvithilwa etumwalaka lyUukwaniilwa. Okwa ti: “Onda li nda galikana kuJehova a kwathele ndje ndi tembukile koshitopolwa hoka ku na aapopi yOshitandroy.”

Riana okwa tembuka, nokwa li a taalela eshongo limwe. Ka li a vulu okumona iilonga. Omulumentu gumwe okwa li e mu pula ta ti: “Omolwashike we ya huka? Aantu yomoshitopolwa shika ohaya ka konga iilonga hoka to zi!” Konima yiiwike iyali, Riana okwa zi mo moshitopolwa e na owala uushakashaka, a ye koshigongi shoshitopolwa, nokwa li ti ipula shoka e na okuninga po. Mesiku lyahugunina lyoshigongi, omumwatate gumwe okwa tula oshinima mondjato yombayikitha yaRiana. Oshinima shoka osha li oshimaliwa oshindji, she mu gwana okushuna koshitopolwa shaapopi yOshitandroy, nokutameka okangeshefa kokulanditha omahini goyogata. Riana okwa ti: “Onda li ndi uvite Jehova a kwathela ndje lela pethimbo. Onda tsikile okukwathela mboka kaaya li ya mono ompito yokwiilonga kombinga yaJehova!” Megongalo omwa li wo mu na oshindji shi na okulongwa. Riana okwa gwedha ko a ti: “Onda li nda pewa oshinakugwanithwa shokugandja oshipopiwa shomontaneho oshiwike kehe. Jehova okwa li ta dheula ndje okupitila mehangano lye.” Sigo onena, Riana onkee ngaa ta tsikile okuuvitha etumwalaka lyUukwaniilwa kaapopi oyendji yelaka lyOshitandroy,  mboka ya hala okwiilonga kombinga yaJehova.

Jehova okwe tu shilipaleka kutya “shaa ngoka moshilongo ta ka pula eyambeko, ota ka pula a yambekwe kuKalunga kashili.” (Jes. 65:16) Uuna tatu longo nuudhiginini tu sinde omashongo e tatu tamununa mo uukalele wetu, kungawo Jehova ote ke tu yambeka. Dhiladhila komumwameme Sylviana ngoka a popiwa metetekelo lyoshitopolwa shika. Dhimbulukwa kutya okwa li a tila kutya ita vulu oku ka longela hoka ku na ompumbwe onene. Omolwashike a li ta dhiladhila ngawo? Okwa ti: “Okugulu kwandje kwokolumoho oku na uule woosentimeta 9, ano ku vulike kwaahoka kwokolulyo. Onkee, ohandi ende tandi tina nohandi loloka mbala.”

Mo 2014, Sylviana okwa tameke okulonga pamwe naSylvie Ann, omumwameme omukokolindjila omugundjuka gwomegongalo lyawo. Oya tembukile kokamukunda ke li ookilometa 85 okuza mondoolopa yawo. Nonando okwa li a taalela omashongo, shoka Sylviana a li a hala okwe shi mono, nosha li lela eyambeko kuye! Okwa ti: “Konima owala yomumvo gumwe, sho nda kala tandi longo kokamukunda hoka, Doratine, omukulukadhi omugundjuka ngoka nda konakona naye Ombiimbeli, okwa li a ninginithwa poshigongi shetu shoshikandjo.”

Ngaashi aamwatate naamwameme mboka yu ulike eitaalo lyawo, sho ya ka longela hoka ku na ompumbwe onene, natse ngele otwa kambadhala okusinda eshongo kehe tu tamunune mo uukalele wetu, otatu ka mona uushili weuvaneko ndyoka Jehova u uvanekela aapiya ye, tali ti: “Otandi ku kankameke e tandi ku kwatha.” (Jes. 41:10) Oshizemo? Ekwatathano lyetu naJehova otali ka kala lya kola noonkondo. Shimwe ishewe, ngele otwi igandja nehalo ewanawa tu uvithile moshitopolwa shetu nenge tu ka longele koshilongo shilwe, shoka otashi ke tu kwathela tu ilongekidhile iinima yopambepo mbyoka twa tegelela muuyuni uupe. Ngaashi omumwatate Didier ngoka a popiwa metetekelo e shi popi, “okulonga hoka ku na ompumbwe onene, oku li edheulo ewanawa lyonakuyiwa!” Oyendji mboka ye na ehalo lyokuninga ngawo, onawa ye shi ninge ngashingeyi!