PaMateus 9:1-38
-
Jesus ta aludha omusilombanda (1-8)
-
Jesus ta ithana Mateus e mu landule (9-13)
-
Epulo kombinga yokwiidhilika iikulya (14-17)
-
Okamwanakadhona kaJairus; omukiintu ta gumu onguwo yaJesus yokombanda (18-26)
-
Jesus ta aludha aaposi nosho wo omuthitawi (27-34)
-
Iilonga yokuteya oyindji, ihe aateyi aashona (35-38)
9 Jesus okwa londo mowato e ta yi handiyaka yefuta, nokwa yi moshilando shaandjawo.
2 Opo ihe aantu oya eta kuye omulumentu a sa ombanda, a lala kontala. Sho Jesus a mono kutya oye na eitaalo, okwa lombwele omusilombanda a ti: “Ino tila, mumwandje, oondjo dhoye odha dhimwa po.”
3 Opo ihe aalongimpango yamwe oya lombwelathana ya ti: “Omulumentu nguno ota sheke Kalunga.”
4 Molwaashoka Jesus okwa li e shi shoka taya dhiladhila, okwa ti: “Omolwashike mu na omadhiladhilo omawinayi momitima dheni?
5 Pashiholelwa, oshinipo oshipu koshikwawo, okutya ‘oondjo dhoye odha dhimwa po,’ nenge okutya, ‘yambuka po e to ende’?
6 Ihe opo mu kale mu shi kutya Omuna gwomuntu okwa pewa oonkondopangelo kombanda yevi dhokudhima po oondjo . . . .” Opo nduno okwa lombwele omusilombanda a ti: “Yambuka po, kutha ontala yoye e to yi kegumbo.”
7 Nena okwa yambuka po e ta yi kegumbo.
8 Sho oongundu dhaantu dhe shi mono, odha li dha tila noonkondo, nodha hambelele Kalunga, ngoka a pa aantu oonkondo dha tya ngaaka.
9 Sho Jesus a zi po mpoka, okwa mono omulumentu gwedhina Mateus, a kuutumba pombelewa yiifendela e te mu lombwele ta ti: “Ninga omulanduli gwandje.” Nziya okwa thikama e te mu landula.
10 Lwanima sho Jesus a li ta li* pamwe naalongwa ye megumbo lyaMateus, aafendelithi oyendji naalunde oye ya okulya pamwe nayo.
11 Ihe sho Aafarisayi ye shi mono, oya ti kaalongwa ye: “Omolwashike omuhongi gweni ha li pamwe naafendelithi naalunde?”
12 Sho Jesus e ya uvu, okwa ti kuyo: “Mboka ye na uukolele inaya pumbwa omupangi, ihe oomboka taya ehama.
13 ‘Onda hala esilohenda, ihe hamayambo.’ Indeni ano mu ka ilonge kutya shika otashi ti shike. Oshoka ngame inandi endela aayuuki, ihe aalunde.”
14 Opo ihe aalongwa yaJohannes oye ya kuJesus e taye mu pula taya ti: “Omolwashike tse nAafarisayi hatu idhilike iikulya, ihe aalongwa yoye ihaya idhilike?”
15 Jesus okwe ya yamukula a ti: “Mbela ookuume kombushiki* oya pumbwa ngaa okukala ya nika oluhodhi, omanga ombushiki yi li pamwe nayo? Ihe esiku otali ya uuna ombushiki tayi ka za po puyo, opo nduno taya idhilike iikulya.
16 Kapu na ngoka ha andeke onguwo onkulu noshaando oshipe, oshoka oshaando shoka otashi tuula onguwo, nombululu otayi ningi onene yi vule yonale.
17 Shimwe ishewe, aantu ihaya tula omaviinu omape moompunda oonkulu. Ngele oye shi ningi, oompunda otadhi tuuka, omaviinu e taga tika mo, noompunda e tadhi yonuka. Ihe aantu ohaya zile omaviinu omape moompunda oompe, nokungawo, omaviinu itaga tika, noompunda itadhi yonuka.”
18 Omanga a li te ya lombwele iinima mbika, omupangeli gwontumba okwe ya kuye, nokwe mu inyongamene* e ta ti kuye: “Ngashingeyi omumwandjekadhona oku na okukala a sa, ihe ila wu ke mu tenteke oshikaha shoye, oye nota kala ishewe nomwenyo.”
19 Opo ihe Jesus okwa thikama, naalongwa ye oye mu landula.
20 Ihe omukiintu ngoka a kala nuuvu wetiko lyombinzi uule womimvo 12, okwe mu ziilile konima e ta gumu oonyemba dhonguwo ye yokombanda,
21 oshoka okwa kala ti ipopile ta ti: “Shampa owala nda gumu onguwo ye yokombanda, otandi aluka.”
22 Jesus okwa punguluka, naasho e mu mono, okwe mu lombwele ta ti: “Ino tila, omumwandjekadhona, eitaalo lyoye olye ku aludha.” Pethimbo opo tuu mpoka, omukiintu okwa aluka.
23 Sho Jesus a yi megumbo lyomupangeli, okwa adha mo aahiki yuufiloli nongundu yaantu taya lili mokule
24 e ta ti kuyo: “Zii mo megumbo, oshoka okakadhona inaka sa, ihe oka kotha.” Sho a popi ngawo, oya tameke oku mu yola ye mu sa uunye.
25 Nziya sho ongundu yaantu ya yi pondje, Jesus okwa yi mondunda moka mu na okakadhona, nokwe ka gumu koshikaha, okakadhona e taka yambuka po.
26 Ehokololo lyoshiningwanima shoka olya taandele moshitopolwa ashihe.
27 Sho Jesus a zi po mpoka, aalumentu yaali aaposi oye mu landula, taya igidha taya ti: “Omuna gwaDavid, tu sila ohenda!”
28 Konima sho Jesus a yi megumbo limwe, aalumentu mboka aaposi oye ya kuye, nokwe ya pula ta ti: “Omwa itaala ngaa kutya otandi vulu oku shi ninga?” Oye mu yamukula ya ti: “Eeno, Omuwa.”
29 Opo ihe okwa gumu omeho gawo nokwa ti: “Shi ningilweni shi ikolelela keitaalo lyeni.”
30 Nena omeho gawo oga tonata. Shimwe ishewe, Jesus okwe ya londodha a ti: “Inamu shi lombwela nando omuntu.”
31 Ihe lwanima sho ya yi pondje, oye shi tseyithile ayehe moshitopolwa shoka.
32 Manga aalumentu mboka ya li taya yi, aantu oya eta kuJesus omulumentu omuthitawi, ngoka a li e na ondemoni.
33 Konima sho ondemoni ya tidhwa mo, omulumentu ngoka okwa tameke okupopya. Oongundu dhaantu odha li dha kumwa, nodha ti: “MuIsraeli inatu mona mo nando onale oshinima sha tya ngeyi.”
34 Ihe Aafarisayi oya li taya ti: “Oondemoni ohe dhi tidha mo koonkondo dhomupangeli gwoondemoni.”
35 Jesus nokwa ende miilando ayihe nomomikunda, ta longo aantu moosinagoga dhawo, ta uvitha onkundana ombwanawa yUukwaniilwa nota aludha omikithi nosho wo omaunkundi goludhi kehe.
36 Sho a mono oongundu dhaantu, okwa li e dhi uvitile ohenda, oshoka odha li dha hepekwa nodha ekelwahi, dha fa oonzi dhaa na omusita.
37 Opo ihe Jesus okwa lombwele aalongwa ye a ti: “Eeno, iilonga yokuteya oyindji, ihe aaniilonga aashona.
38 Onkee ano indileni mwene gweteyo, a tume aaniilonga keteyo lye.”
Omanyolo gopevi
^ Nenge “a kuutumba poshitaafula; e li poshililo.”
^ Nenge “komufuko gwomumati.”
^ Nenge “e mu tsile oongolo.”
