Momukokomoko gwomumvo gwiilonga 2021, a aantu muuyuni awuhe oya kala taya hepekwa koshivu sho-Corona. Ngaashi sha popiwa moshitopolwa: “Omakwatho ngoka ga gandjwa muuyuni awuhe omolwomukithi gwekomba,” otwa longitha oodola omamiliyona ogendji mokukwathela mboka ya dhengwa koshivu sho-Corona. Otwa tota po wo Ookomitiye dhOkuunganeka Omakwatho dha konda po 950.

 Pethimbo lyoshivu shino, aamwatate naamwameme muuyuni onkee ngaa natango taya hepekwa kiiponga yopaunshitwe nosho wo kiiponga yilwe mbyoka hayi etithwa kaantu. Kakele kiimaliwa mbyoka ya longithwa nale mokugandja iikwatha, omolwoshivu sho-Corona, Okomitiye yOkuunganeka yOlutuwiliki oya li ya gandja ishewe epitikilo, opo oshimaliwa shi thike poodola dhaNamibia 121 760 000.00 shi longithwe natango mokugandja iikwatha, oshoka opwa li pwa holoka iiponga yopaunshitwe ishewe nosho wo mbyoka hayi etithwa kaantu ya konda po 200. Natu ka tale nkene omayambidhidho goye ga li ga longithwa mokukwathela mboka ya ninga iihakanwa yiiponga yopaunshitwe iyali mbyoka opo ya ningwa omasiku ga zi ko.

 Mo 22 Mei 2021, omutoko omupyu ogwa li gwa tameke okundwafuka mondundu Nyiragongo, ndjoka yi li mOrepablika yaKongo. Omutoko ogwa hanagula po omagumbo, oosikola nogwa thiga gwa kakeka omeya. Ogwe etitha natango olwithi lwa nika oshiponga moshilando Goma nosho wo omakakamo gevi omashona. Aakalimo yomoGoma ya konda petata, oya li ya lombwela ya tembukile kiitopolwa yilwe. Aantu omikimiki oya yi ontuku, yamwe oya taaguluka nokuli oongamba ya uka moRwanda.

 Mokati kaantu mbono omwa kwatelwa Oonzapo dhaJehova dhi li 5 000 lwaampo. Yamwe omagumbo gawo oga hanagulwa po komutoko omupyu ngoka gwa ndwafuka mondundu, yo yamwe iinima yawo momagumbo oya li ya yakwa mo sho ya yi ontuku. Ookomitiye dhokugandja omakwatho moRwanda nomOrepablika yaKongo odha unganeke pu gandjwe omakwatho. Okomitiye yomoshitayimbelewa shaKongo (Kinshasa) oya ti: “Otwa tameke okugandja iikulya, omeya, iinguma nosho wo iizalomwa, nonando moshilando omwa li evundakano naantu kaya li ya lombwelwa ya tauke mo natango.” Mondoolopa yimwe, iilyo yokomitiye yokugandja ekwatho oya dhikile aamwatate ootenda dha konda po 2 000. Oye ya pe uu-maska noku ya yelithila nkene ye na okwiigamena kaaya kwatwe ko-Corona nosho wo komukithi gwokolera.

 Muule woomwedhi ndatu sho oshiponga sha holoka, aamwatate oya adhika nale ya gandja iikwatha ya konda pookilograma dholwishi 5 443, ookilograma 5 443 dhuusila wepungu, oolita 8 000 dhomagadhi gokulya nosho wo oolita 8 000 dhomeya. Opo oshimaliwa shi kwatwe nawa, oshitayimbelewa osha li sha ningi omalongekidho, pu landwe iikulya ya gwana moshitopolwa, pehala lyoku yi mbestela kiilongo yilwe.

 Omumwameme gumwe ngoka egumbo lye epe lya hanagulwa po sho omulilo gwa ndwafuka mondundu okwa ti: “Otwa li twa teka omukumo notwa yemata.” Ihe ye pamwe naantu yaandjawo oya li ya pewa ekwatho palutu nopambepo. Omumwameme okwa ti: “Kekwatho lyaJehova, otu na shoka twa pumbwa. Otwe shi mona kutya Jehova oha itsike omitenge dhetu nohe dhi ningi omipu, opo tu vule okukikimba nadho.”

 Eliko moVenezuela olya kala tali shongola uule womimvo ngashingeyi. Onkalo oya dhigupalela aamwatate moshilongo moka. Otaya hupu shokadhila nomu na omiyonena dha londa pombanda. Ihe ehangano lyaJehova inali ekelahi nando aamwatate mboka.

 Momumvo gwiilonga gwa zi ko, oshimaliwa sha konda poodola dhaNamibia omamiliyona 22 830 000.00 osha li sha longithwa okulanda nokufuta iiyenditho mbyoka tayi fala iikulya noothewa kwaamboka ye na ompumbwe. Oshitayimbelewa shaVenezuela osha ti: “Kashi shi oshipu okufala ookilograma 130 000 dhiikulya koombinga adhihe ne dhoshilongo omwedhi kehe noku yi topolela aamwatate mboka ye yi pumbwa lela.” Opo iikulya kaayi ninge nayi, aamwatate olundji ohaya tumu iikulya mbyoka ihaayi olo nziya. Aamwatate koshitayimbelewa oya ti: “Ohatu landa iikulya oyindji poshikando nopethimbo mpoka tayi monika nuupu, shono hashi tu kwathele tu yi lande kombiliha. Ohatu yi tutu tatu longitha omikalo ndhoka tadhi hupitha oshimaliwa.”

 Omumwatate Leonel, ngoka e li mOkomitiye yOkukwathela mIiponga Iinene moVenezuela okuhole iilonga ye. Okwa ti: “Iilonga yokugandja iikwatha ito yi pewa komuntu. Oya kwathela ndje ndi kale ndi uvite nda hekelekwa okuza tuu sho omukulukadhi gwandje a hulitha ko-Corona. Ohandi kala ndi ipyakidhila nondi uvite nda pumbiwa lela kaamwatate mboka ya pumbwa ekwatho. Onde shi mona pauhandimwe nkene Jehova ha gwanitha euvaneko lye kutya ke na siku a thige po oshigwana she.”

 Omumwatate gumwe ngoka a pewa iikwatha naye okwa li ha longo nale mokomitiye yokugandja ekwatho. Okwa ti: “Ngashingeyi ompito oyandje yokukwathelwa. Inatu pewa owala ekwatho lyiipumbiwa yopalutu, ihe aamwatate oye tu kwathele pamwe nanekulu lyandje tu kale twa ngungumana. Oye tu sile oshimpwiyu, oye tu hekeleke noku tu tsa omukumo.”

 Iiponga yopaunshitwe yimwe ohayi holoka, noihapu kala naanaa omandhindhiliko gasha ngoka tage ku londodha. Ihe nonando ongawo, ehangano lyaJehova ohali katuka nziya okumonena aantu iikwatha noku yi ya tumina. Onkene otatu pandula omayambidhidho goye ngoka ho gandja kiilonga yomuuyuni awuhe. Omikalo dhilwe dhokugandja omayambidhidho otadhi adhika kepandja donate.dan124.com. Otwa pandula sho ho gandja nehalo ewanawa.