Tɛnɛ mɛ Ngbangɔ tɛnɛ na lo tɛ Daniele nɛ?

Gbinya ti ya Ngbangɔ

Daniele dundó wa hangɔ tɛnɛ kɔi mɛ zo ti Yuda mɛndó hĩngangbi gba wa lo ngandó na dungɔ lɛ ngɛ̃́ na siɛklɛ ti 7 na 6 U.N.E. Nzapa hɛ̃ndó lo likoki ti kambisangɔ nda asuma, ti hũngɔ suma ti alo mɛ na lingɔ tɛrɛ lo na bi mɛ na gangɔ, wa na lége ti nyingɔ vúru Nzapa zandó Daniele ya lo su Mbeti kɔi ti ya Ngbangɔ mɛ na ili lo nvɛ̃ni.—Danyele 1:17; 2:19.

Daniele dundó na?

Daniele maindó ka kɔdɔrɔ ti Yuda, lo gbia mɛndó apombi gbata ti Yeruzalɛmɛ nga na tepelo tɛ Ayuda. Na bulu ti 617 U.N.E., Nebukadenɛzarɛ mɛ gbia ti Babilɔnɛ mundó Yeruzalɛmɛ, lo gbɔ̃nɔ ngandó “akɔli ti ngunu ti kɔdɔrɔ” niko wa lo gwendó na la ka gbɛ mbɛ ka Babilɔnɛ. (2 Bakonzi 24:15; Danyele 1:1) Alengbi ndó ti dungɔ ya Daniele ndó na bulu bandangɔ 13 tee 19 na ngoi mɛndó agbɔ̃nɔ la gwe na la ka Babilɔnɛ.

Daniele na apalanga ti kɔli mɛndɛ̃ (ka popo tɛ la Shadrake, Meshake na Abedenego) agwendó na la ka da tɛ gbia ti Babilɔnɛ ti nɛngɔ ya ala lua fɔrmasiɔ̃ ti sipesialɛ mɛ ba kwa tɛ leta. Abɛse du ya ando kpãndó ka tɛ la ndozu ya ala ko nyɔ ndia tɛ Nzapa ko, Daniele na akwa lo ngbãndó mbilimbili ka mbage tɛ Nzapa tɛ la Yehova. (Danyele 1:3-8) Na pɛ bulu taa mɛndó ala lua na fɔrmasiɔ̃ ko, gbia Nebukadenɛzarɛ gondandó la na lo ti ndara nga na makoki mɛndó ala na ni, lo hũndó ya “ala ɔ anganga nzapa zu ti maji nga na azi zu mɛndó ndo li kwa na asiɔ nyingɔ ka gbɛ lo lɛngɔ gbia tɛ lo fãni sui kɔi.” Lo mundó Daniele na akwa lo ya ala li kwa ka da tɛ ni.—Danyele 1:18-20.

Abulu gba na gesi alengbi ti dungɔ ya Daniele tindó na bulu bere 90 ndó la a ili lo ka da tɛ gbia. Kɔli kɔi mɛ ili lo la Belshazare mɛndó ndo lɛ gbia ka Babilɔnɛ yɔndó ka ti Daniele ya lo kambisa nda Mbeti mɛndó li ti su ni ka tɛrɛ da na ndenge ti kpɛ̃nɛ. Na lége ti nyingɔ vúru tɛ Nzapa Daniele tɛnɛndó ya Babilɔnɛ na tingɔ na lége tɛ agbia ti Mede na Perse. Wa na bí niko Babilɔnɛ tindó biani.—Danyele 5:1, 13-31.

Kanda ka gbɛ lo lɛngɔ gbia ti Mede na Perse, Daniele tindó na lo gbia gba wa gbia Dariuse ndó na gwɛ̃ ti bakisangɔ hɛ̃ lo akumba mɛndɛ̃. (Danyele 6:1-3) Akumu mɛndɛ̃ tindó na siɔ bɛ ndo Daniele, gwɛ̃ tɛ la dundó ya lo kpi na ndenge mɛndó abi lo kaya du tɛ ambata, kanda Yehova sarandó lo. (Danyele 6:4-23) Ka dã na nda dungɔ lɛ ngɛ̃́ tɛ Daniele angelo sindó gbɛlɛ lo wa lo sandó ngunu bɛ lo fãni sɛ ya mɔ du “zo ti ndima gba.”—Danyele 10:11, 19.

Ba se mɛ akambisa na tɛnɛ niko kaya video ti Ngbangɔ mɛ na eteni sɛ—Daniele amonisaki kondima bomoi na ye mobimba.

Pandɛ mɛ Ngbangɔ kpɔ na lo ti buku tɛ Daniele nɛ?

Tɛnɛ mɛndó Daniele tɛnɛ: Nebukadenɛzarɛ lindó ngbilondo kɔi mɛ kotani wa lo hɛ̃ ngandó ndia ya azi zu vɔrɔ ngbilondo niko, wa azi zu ko la na kɛ̃ngɔ tɔndɔngɔ ndia niko ko, ayɔ ya asa la kaya wá mɛ ndo zá.—Danyele 3:1-6.

Aye mɛ istwarɛ fa: Na bangɔ buku kɔi (Encyclopædia Britannica) Nebukadenɛzarɛ zangandó kwa kɔi ti ngbondoni mɛ ba lɛkɛngɔ Babilɔnɛ na lo ti “ndima tɛ lo nga na lo ti ndima tɛ Nzapa tɛ lo. “Lo ndo gondandó tɛrɛ lo ya ‘bo ni la ni ndo to azi ya ala vɔrɔ anzapa ti ndima.’”

Ando tɛnɛndó tɛnɛ ti tumbu ti bingɔ zo ya wá ngoi gba na ya Mbeti mɛ tɛnɛ tɛnɛ ti alo ti gã ti Babilɔnɛ, kaya ni elengbi nga ti tãngɔ se mɛndó gbia ndo zi lége ya azɔlɔ azi kaya wá. Wa sungɔ Mbeti kɔi ti gã mɛndó na dungɔ lɛ ngɛ̃́ na ngoi mɛndó Nebukadenɛzarɛ gbia, lo kambisandó nda mɛ anganga nzapa lua tumbu na lo mɛ ya ta ala tɔndɔndó anzapa ti Babilɔnɛ ma. Mbeti niko tɛnɛ ya: “Ĩ kpɔ la, ĩ zɔ la, ĩ fala ya la, . . . kaya wá . . . ĩ to wá ni za kpengbani ti nɛngɔ ya ala kpili.” a

Alo mɛndó Daniele su: Gbia Nebukadenɛzarɛ ndo gondandó tɛrɛ lo na ndenge mɛndó lo lɛkɛ na Babilɔnɛ.—Danyele 4:29, 30.

Briki kɔi mnɛ alua ni ka dã na Babilɔnɛ na ili Nebukadanezare ka tɛrɛ ni.

Aye mɛ istwarɛ fa: “Alo mɛndó gbia Nɛbukadenɛzarɛ su na lo tɛ lo nvɛ̃ni . . . ndo fa ya lo ndo hũndó tɛrɛ lo mabere kota gbia mɛ na ngunu gba.” b Na ndakisa Mbeti mɛndó asu ka tɛrɛ da kɔi afa se mɛndó Nebukadenɛzarɛ ndo gonda na tɛrɛ lo, ni tɛnɛ ya: “Mbi kĩndó gbágbá ti kpengbani na gudrɔ̃ nga na abriki mɛ nga ma ngomba mɛ ta zo kɔi lengbi ti kalangɔ ni ma . . . Mbi lɛkɛndó Esagila na Babilɔnɛ nzɔ̃ni ti nɛngɔ ya azi ndo da bɛ na lo lɛngɔ gbia tɛ mbi bwai na bwai.” c Abriki gba mɛ alo ti hũngɔ ni ka Babilɔnɛ ni ndó na ili Nebukadenɛzarɛ.

Alo mɛndó Daniele su: Gbia Beleshazare ayɔndó ka ti Daniele ya “lo du gbia ti taa kaya lo lɛngɔ gbia ” ti Babilɔnɛ.—Danyele 5:1, 13-16.

Mbeti ti silɛndre ti 550 U.N.E. afa ili gbia Nabonide na nyi lo Beleshazare

Aye mɛ istwarɛ fa: Kɔli kɔi mɛ ili lo la Nabonide ndó gbia na ngoi mɛndó ndo su na tɛnɛ mɛ kaya Mbeti ti Daniele shapitrɛ ti 5. Na ngoi mɛndó Nabonide ndo lɛ gbia ko, lo ndo dundó gba ka Arabie kanda ta ka Babilɔnɛ ma. Zo mɛndó ndo lɛ gbia ka Babilɔnɛ na ngoi mɛndó gbia Nabonide ka Arabie na? Raymond Philip Dougherty , zo kɔi ti kɔdɛ na lo mɛ ba istwarɛ tɛnɛ kaya buku tɛ lo ya (Nabonidus and Belshazzar). “Mbeti niko ti gã tɛnɛ ya Nabonide ndo ziandó nyi lo ti uzu Beleshazare ya lo ndo lɛ gbia na ngoi mɛndó ta lo ndo du da ma. Beleshazare ndo lɛndó gbia na panda to lo, wa lo ndo li ngandó lo nga ma se mɛ agbia zu ndo li na ni.” Na lo mɛ ya Nabonide ndó gbia wa Beleshazare ndó zo ti sɛ so pɛko lo ko, ni la lo tɛnɛndó hɛ̃ Daniele ya lo mu ndo ti taa.

a Buku Journal of Biblical Literature, Volumɛ 128, Nimɛro 2, pajɛ 279, 284.

b Buku Babylon—City of Wonders, omɛ ndó asu ni kaya Irving Finkel nga na Michael Seymour, pajɛ 17.

c Buku Archæology and the Bible, omɛ ndó asu ni kaya George Barton, pajɛ 479.