Ĩĩ. Yezo fandó ya ava ni lengbi ti sarangɔ tɛrɛ la na lége tɛ monganga, na ngoi mɛndó lo tɛnɛ ya: “Azi ko gbɛ tɛrɛ la nzɔ̃ni ko, ta ala ndodu na gwɛ̃ tɛ mɔnganga ma, bo awa ngã la ndodu na gwɛ̃ tɛ mɔnganga.” (Matie 9:12) Abɛse du ya ta Ngbangɔ adu buku mɛ ndo tɛnɛ tɛnɛ mɛ aba amonganga ma ko, kanda ni hɛ̃ wangɔ mɛ alengbi ti zangɔ azi mɛ na gwɛ̃ ti hɛ̃ngɔ Nzapa dengɔ bɛ

Hũnda tɛrɛ mɔ na ando mɛ

 1. Mbi hĩnga nzɔ̃ni se ti sarangɔ tɛrɛ mɛ monganga ye sarangɔ na mbi? Ngbangɔ sa ngunu bɛ e ya uzu ti nɛngɔ ya e ye tɛnɛ kɔi ko, ayɔ ya e gi hĩngangɔ ndani nzɔ̃ni na se lɛ “yengɔ tɛnɛ zu.”​—Masese14:15.

 2. Adu nzɔ̃ni ya mbi gi wangɔ ka tɛ monganga mɛndɛ̃? Ando du nzɔ̃ni “na ngoi mɛ awa hɛ̃ngɔ wangɔ ndo du gba” gba ni ndo du na ngoi mɛ zo gã kpengba ngã.​—Masese 15:22.

 3. Sarangɔ tɛrɛ mɛ monganga ye sarangɔ na mbi, ta na kongɔ nyɔ ndia ti ya Ngbangɔ mɛ tɛnɛ ya “ĩ kɛ mɛnɛ” ma?​—Awa Pangɔ Kwa 15:20.

 4. Ti nɛngɔ ya lo hĩnga ngã nga na yɔrɔ mɛ lo hɛ̃ zo, lo ndo salela ye mɛ na mangbi na kwa tɛ asiɔ nyingɔ? Ngbangɔ gbanzi “kwa tɛ asiɔ nyingɔ.” (Galatia 5:19-21) Ti nɛngɔ ya mɔ hĩnga se ti sarangɔ tɛrɛ mɛ amangbi na kwa tɛ asiɔ nyingɔ, bere ta amangbi na ni ma ko, ba ahũnda olo mɛ:

•   Monganga ni ndo li ye mɛ amangbi na kwa tɛ asiɔ nyingɔ?

•   Wa sarangɔ zo ni ndo ye ya azi ndo gã ngã na lo mɛ ya anzapa ma ngɔnzɔ bere asiɔ azi la sa ngã tɛrɛ la?

•   Uzu ti nɛngɔ ya lo hɛ̃ yɔrɔ lo ndo zɔ mbeka, lo ndo ili akotara, lo ndo li amolulu mɛndɛ̃ ti bí?

 5. Bingangɔ li tɛ mbi zu bo na ndo sãte tɛ mbi? Ngbangɔ hɛ̃ wangɔ ya: “Ĩ fa hɛ̃ azi zu ya, ĩ du adede azi.” (Filipɛ 4:5) Dungɔ dede zo na zangɔ mɔ ya mɔ “sara anzɔ̃ ye, ko [mɔ] dɔ asiɔ ye [mɔ] zia.” Na ndakisa alo mɛ ba Nzapa.​—Filipɛ 1:10; Matie 5:3.