Lisa * ooloca: “Oreera murima wa anna ni arokora Eekristu tiwaakivolowenlexa.” Owo aaloca sa echu yeeyo yoopacerya yaamukerinhe mu eparipari. Ela ennalikana ni Anne yoowo eemerenrye: “Woopaceryani, kaari oolekecheya ntakhara eparipari nthowa nawi Anamoona a Yehova yaari ooreera murima, opwaha yeeyo yaahusihaaya.” Arokora oopiili yaala vano annasiveliwa omwaalakhanya Piipiliya ni wuupuwelela vooloca sa yeeyo, nyenya oreera murima waahaavolowela vancipale.

Nni nooniherye hai oreera murima yoowo onahaala waaceenyerya achu yaawo ananoona? Hankooni nthokororye ichu piili: masu ni saweera sahu. Voocharela nnahaala othokororya tho taani nnaphwanelaahu owooniherya oreera murima.

Muthiyana oowerya onatharihiwa mu Masiposipo ekapitulu 31 onnooniherya “nlamulo na oreera murima” mmasu awe. (Masi. 31:26, TNM) Owo onneemererya wi “nlamulo” nenla nihoolele masu ni mukhalelo awe wa oloca. Asitiithi tho anaphwanela okhalano “nlamulo” nenla mmasu aya. Asitiithi ancipale aasuwela wi oloca moonyeenyeya onanwerya waavolowela anaaya mmukhalelo woonanara. Wakhala wi asitiithi annaloca mmukhalelo woonyeenyeya ni moohisivela, akhweya mwanaya haakhulela phaama. Vaavaa asitiithi analocaaya mmukhalelo woophwanelela, onamukhala wookhweya wa anaaya waawiriyana ni owiiwelela.

Moohiphwacha waakhanle wi mwa tiithi naari hooye, ti mwawiihai muneeraanyu muhuserye oloca mmukhalelo wooreera murima? Ninnaphwanya nikhaviheryo mmakupa oopacerya a Masiposipo 31:26: “Owo onnahula eyano awe mwa miruku.” Eyo ennavolowela othanlela mwa miruku masu ni mukhalelo ahu wa oloca. Wiiliwiili ennakhaviherya wiikoha: ‘Apwanne yeeyo kinahaalaaka oloca enahaala oweeriha achu yaawo anakiwiriyana okhala oonyeenyeya naari enahaala otikitherya murecele?’ (Masi. 15:1) Chiryene, ti yamiruku wuupuwela nihaakumve oloca.

Nsiposipo nikina ninnaloca: “Muchu eemwaanomwaano, masu awe weetha ntoko nlema.” (Masi. 12:18) Vaavaa nnuupuwelelaahu mukhalelo masu ahu ni mukhalelo ahu wa oloca oneeraaya waavolowele akina, eyo enanwerya onceenyerya ovareryela yeeyo nnalocaahu. Vaavaa nnalocaahu mwawiiwanana ni “nlamulo na oreera murima,” hinni nipharihele masu awiicela naari oloca mmukhalelo woohiphwanelela. (Éfe. 4:31, 32) Nnahaala oraceeliha muupuwelo ni malocelo ohiphwanelela ni masu oreera ni oophwanelela, nihinanariwe. Yehova ootikitherya yootakiherya vooloca sa yeela, vaavaa aamulipiheiye mulapeli awe awuukhuwa Eliya. Munkeelo yoowo aamweemelela Yehova aaloca ni “nsu noohivuwa.” (1 Mam. 19:12) Okhala ooreera murima naari ikharari onnavolowela sincipale ohiya pahiru oloca moosivela. Nnaphwanela tho wooniherya miteko sa oreera murima naari ikharari. Mwawiihai?

Ninnamutakiherya Yehova moorweela wa oloca moosivela ni weera ichu mmukhalelo wooreera murima. (Éfe. 4:32; 5:1, 2) Lisa, oromoliwe woopaceryani, onnathariha oreera murima wooniheryiwe ni Anamoona a Yehova. “Vaavaa emusi ahu yaakhinyereryiwaaya othaama woohiwehereryeya, atheli eeli mmulokoni yaaveka elukuluku omutekoni waaya wi enikhaviherye oteexa ichu. Mu elukuluku yeele kiiha kihipacenryeru omuhuserya  Piipiliya!” Saweera seihe sa oreera murima saamuceenyerya Lisa waalikhela mwawiiseela vooloca sa eparipari.

Anne yoowo oromoliwe woopaceryani wa mwaha yoola, aathamalela tho oreera murima yoowo Anamoona a Yehova yaamoonihenryaaya. Owo ooloca: “Nthowa na mukhalelo achu yaawo ahinamurumeela Yehova yaakikhalihaaya, kaanoona okhala woovila waaroromela achu.” Owo onnatitelela: “Vaavaa kaasuwenlaaka Anamoona a Yehova, nkaaroromela yaawo. Kaaniikoha, ‘Ntakhara heeni awo anooniheryaaya opwacha wa miyaano?’ Nyenya oreera murima weeparipari wa muhusiha aka a Piipiliya waakiceenyerya omuroromela yoowo.” Teevi yaari yookhumelela ene? “Ohoolo waya, kaapacerya wuupuwelela mwawiiseela yeeyo kaahuseryaaka.”

Moone wi Lisa ni Anne yaatannyeya murima ni saweera sa osivela ni oreera murima sa achu a mmulokoni nave saahaakhaviherya awo ochuna ohuserya vooloca sa eparipari. Oreera murima yooniheriwaaya mmulokoni, waahaakhaviherya awo opacerya omuroromela Yehova ni achu awe.

Akina annapharihela masu aphaama nave annatheya nthowa na mukhalelo aphwiiwalaaya  naari weiwo anakhalaayawo. Makhalelo ntoko yaala anaceenyeryiwa ni yookhovelela naari mukhalelo wooyariwano, taphaama. Nyenya wakhala wi nnaceenyeryiwa pahiru ni sookhovelela naari omuchu ahu, akhweya nnanwerya ohitakiherya oreera murima wa Muluku.—Mulikanyihe ni Saweriwa T’arummwa 28:2.

Oreera murima weeparipari mukhalelo mmoha wa yawiima ya munepa waweela wa Muluku. (Gal. 5:22, 23) Mwawiihiiha, ela enataphulela wi ninnachuna nikhaviheryo na munepa waweela wa Muluku wi onikhaviherye wooniherya oreera murima weeparipari. Ela enniiwanana ni yoochuna ahu ya omutakiherya Yehova ni Yesu. Nave ntoko Akristu, ninnooniherya opwacha weeparipari wa akina. Mwawiihiiha, ninnaceenyeryeya orweela wa omusivela wahu Yehova Muluku ni achu akhwiihu. Voocharela oreera wahu murima onnakhala mukhalelo woowerya yoowo onarweela va murimani ni yoowo Muluku oneemereryeiye.

Onanwerya okhala wookhweya wooniherya oreera murima naari mahala wa yaale anoonihenrye oreera murima naari yaale naasuwenlaahu. (2 Sam. 2:6) Mukhalelo mmoha ori waathamalela yaawo. (Kol. 3:15) Nyenya hanka wakhala wi ninnoona wi muchu mukina hanaphwanela okhalihiwa mooreera murima naari mwa mahala?

Muthokororye ela: Yehova ootikitherya yootakiherya yavasulu ya wooniherya oreera murima naari mahala wa yoowo ohinaphwanela, nave Masu awe oorempwa annanihusiha nihusiheryo noochuneyaxa vooloca sa wooniherya mukhalelo yoola. Masu awi “mahala awaaca” aaphariheliwa ikwaha sincipale mu Soorempwa Seekriki Seekristu. Ti mwawiihai Muluku onanooniheryeiye oreera murima naari mahala?

Yehova onnawooniherya oreera murima naari mahala achu oothene yaawo akhanle moorweela wa waavaha ichu seiho awo anachunaaya wi etitelele okhala. (Mat. 5:45) Chiryene, naamwi nihaakumve omusuwela Yehova, Owo aahooniherya mahala naari oreera murima wa hiyaano. (Éfe. 2:4, 5, 8) Ntoko yootakiherya, owo aahipaka owetha wawe, amvaha Mwanawe mmoharu ntakhara achu oothene. Murummwa Paulo oorepa wi Yehova aavahererya woopola “ntoko waaca wa mahala awe.” (Éfe. 1:7) Mwawaaceererya, naamwi nchekaka ni omuhiciha Yehova, owo onnatitelela onihoolela ni onihusiha. Mahusiheryo ni masu awe ari ntoko “matxoitxoi a máhi.” (Malam. 32:2, BNM) Mweeparipari hinni niwerye omukookiherya mahala oothene onanooniheryeiye. Nave noosuwela wi waakhanle wi Yehova hoonihenrye mahala awaaca wa hiyaano, hini nikhaleno ewehereryo ntakhara omwaahiyu.—Mulikanyihe ni 1 Pedro 1:13.

Moohikhwa minikwa, mahala naari oreera murima wa Yehova ti wooceenyerya. Ntoko yookhumelela, ohiya pahiru wiimwaathanlela achu wi niwooniherye mahala naari oreera murima, nnaphwanela wiilipixerya omutakiherya Yehova moorweela wa okhala ooreera murima wa achu oothene nihiku ti nihiku. (1 Tes. 5:15) Vaavaa nnooniheryaahu oreera murima, ninnalikana ni mooro mu nihiku nooriirya. Ninnaalipiha achu a veemusini vahu, alapeli akhwiihu, asinthamwene oomutekoni, ooxikola ni amwaacamani.

Nwuupuwele achu a veemusini naari mmulokoni mwanyu yaawo yaahaala ophura nthowa na masu naari saweera sanyu sa mahala. Akhweya onanwerya okhalavo muchu mmulokoni mwanyu yoowo onachuna nikhaviheryo na orehererya empa ni kapinka naari miteko sa nihiku ti nihiku ntoko othuma ichu. Mwawaaceererya, vaavaa munakumanaanyu ni muchu mmuteko woolaleerya yoowo onachuna nikhaviheryo, apwanne mwanwerya omvaha nikhaviheryo noophara muteko?

Nimutakiheryaka Yehova, masu ni saweera sahu ilukuluku soothene inanwerya ohooleliwa ni “nlamulo na oreera murima.”