Ahepri 6:1-20
6 Mwawiihiiha, vano nihin’yaahu muculi mahusiheryo oopacerya vooloca sa Kristu, niilipixerye okhala awiichwelavo,* nihipanke wanaawiili mathipelo, ela tiwi, a orukunusa murima wa miteko sookhwa ni nroromelo mwa Muluku,
2 mahusiheryo vooloca sa opatiso ni okuherya matata, oviihiwa wa alipa ookhwa ni othoriha woohimala.
3 Nave ela nnahaala weerano, Muluku eemererya.
4 Tiwi vooloca sa yaale yaamwaleeliwe, elawiha yamahala ya wirimu, yuukano munepa waweela,
5 nave elawiha masu aphaama a Muluku ni soowerya sa mukhalelo wa ichu onoorwa,*
6 nyenya ehuwela, tahi wooweryeya waakhaviherya awo okookela wanaawiili woocharuwani, woona wi aamukhomela wanaawiili Mwaana a Muluku va mwiri wa yaawo meekhaaya nave emuuliha muru vamiithoni va achu.
7 Echaya ennaakhela mareeliho a Muluku vaavaa enaakhelaaya epula yeeyo enamora wiiliwiili, nave enavaha soomela inakhweleya wa alipa oolima.
8 Nto yaanavaha miiwa ni marula, ennakhoociwa nave enahala vakhaani wuulumeliwa; nave vookuchula enarwa yeeyeliwa.
9 Nyenya vooloca sa nyuwo, oosiveliwa, naamwi nlocaka mmukhalelo yoola, ninnaweherya ichu saphaama wa nyuwo, ichu vooloca sa ovuluxa.
10 Tiwi, Muluku tahi oohookololowa wi acuwale muteko anyu ni osivela yoowo moonihenryaanyu wa nsina nawe, moorweela wa waakhaviherya ni otitelela waakhaviherya* aweela murima.
11 Nto nnachuna wi mmoha ni mmoha a nyuwo ooniherye owetha omohamoha yoola, wi akhaleno ewehereryo yawaakhwanela ophiyerya wuukuchulani.
12 Mwawiihiiha muhikhale ooporora,* nto mukhale a waatakiherya yaale moorweela wa nroromelo ni opixa murima anaakhela soororomeliha.
13 Vaavaa Muluku aapankeiye yoororomeliha wa Aparahamu, woona wi owo haawerya olipela wa mukina oompwaha yoowo, owo aalipela wa yoowo meekheiye,
14 ariki: “Chiri kinarwa kooreeliha nave chiri kinarwa kaaceererya muyareriwo aa.”
15 Mwawiihiiha, Aparahamu amanle wooniherya opixa murima, aahaakhela yoororomeliha yeela.
16 Tiwi, achu annalipela wa yoole ori mutokweene, nave olipela waya omala wa ovaanyihana woothene, woona wi olipela yoowo nroromeliho naweemereryeya wa yaawo.
17 Mmukhalelo mmohamoha, vaavaa Muluku aalakelenleiye wooniherya phaama ene wa yaale anaakhela yoororomeliha wi yookhwela* awe yaari yoohitorokeya, owo aaroromeliha* ni olipela.
18 Ichu seiha piili Muluku opankeiye* hirwa itorokeya, nave Muluku harwa ootha; ichu seiha sinnanilipiha hiyo nchawenle wa Muluku wi nipharelele phaama ewehereryo nivahiwaahu.
19 Hiyaano nookhalano ewehereryo yeela ntoko ankora a okumi ahu, oolipa ni oothipeleya, nave eyo yoovolowa mpuwamwenexa, wiithela wa ekuwo,
20 mummo mulipa oorehererya aavolonweiye mu nipuro nahu: Yesu, yoowo okhanle mulipa a mukucho mutokweene oohimala oolikana ni Melikiseteki.
Inoota
^ Naari: “oolipa omunepani.”
^ Naari: “elukuluku enoorwa.” Moone Masu Atharihiwe.
^ Naari: “waarumeela.”
^ Naari: “eeruru.”
^ Naari: “yoolakelela.”
^ Naari: “aalipiherya.” Mu Ekriki, “aaphima.”
^ Ichu iha inaahiwa yoororomeliha ni olipela wa Muluku.
