Biblia xijkon ken oksekimej amoxtin. Ompa tikitaj tlen kineki matikchiuakan akin otexchijchiuj (2 Timoteo 3:16). Tlen ompa kijtoua melak uelis mitspaleuis. Biblia kijtoua: “Itlajtol Dios yoltikaj ,niman kipiya poder” (Hebreos 4:12). Yejuin libro uelis ika ome mitspaleuis: kichiuas más kuajli xnemi niman noijki xkixmati toTajtsin niman tlen yejua kichiuas (1 Timoteo 4:8; Santiago 4:8).

Mitspaleuis más kuajli xnemi. Biblia kijtoua miyek tlen uelis techpaleuis.

• Ken touikaj iuan oksekimej (Efesios 4:31, 32; 5:22, 25, 28, 33).

• Xtlajpiya motlalnakayo niman motlamachilis (Salmo 37:8; Proverbios 17:22).

• Matikasikamatikan tlenon kuajli niman tlenon ka (1 Corintios 6:9, 10).

• Tomin (Proverbios 10:4; 28:19; Efesios 4:28). a

Se tlakatl niman isiuauj akin chantij Asia niman xmás iuejueyimej, okitakej ika Biblia melak tepaleuiya. Pampa kemach ononamiktijkaj, ouijtika okitakej nasikamatiskej, san ika, opeuj kichiuaj tlen kipouayaj ipan Biblia. ¿Kenon okinpaleui? Vicent kijtoua: “Tlen onikpouj ipan Biblia onechpaleui más manitetlasojtla niman ijkon manikixnamiki tlen ouijtika. Tikchiuaskej tlen Biblia kijtoua okichiuj melak matiyolpakikan”. Isiuauj, Annalou, kijtoua: “Melak otechpaleui tlen okichiujkej akin Biblia kinteneua. Aman melak ika noyojlo ninemi iuan noueuentsin niman melak niyolpaki ipampa tlen san sekan tiknekij tikchiuaskej”.

Techpaleuiya matikixmatikan toTajtsin. Vicent noijki kijtoua: “Pampa nikpoua noBiblia, aman nikmachilia ika más yoniknisiui Jehová”. Tlen okijto Vicent techmachtia ika Biblia uelis techpaleuis matikixmatikan toTajtsin. Ijkuak tikchiuaj yejuin, xsan tejuamej topaleuiyaj, noijki kichiua kuajli matouikakan iuan toTajtsin. Tla tikpoua Biblia, tikitas tlen kualtsin kichiuas toTajtsin ika tlayekapan niman ika uelis tiyolpakiskej para nochipa (1 Timoteo 6:19). Xonka okse libro tlen uelis mitspaleuis ijkon ken Biblia.

Tla mojmostla tikpoua Biblia, yejon mitspaleuis kuajli xnemi niman kuajli xkixmati toTajtsin. Maski ijkon, kanaj onias miyek tlen xtikasikamatis ijkuak tikpouas. Ijkuak ijkon mopan nochiuas, xkilnamiki tlenon okichiuj se tlakatl etíope, akin ikipiya ipantsin dos mil xiuitl ika onen. Yejuin tlakatl miyek tlen notlajtoltiaya itech Biblia. Felipe akin katka inomachtijkauj Jesús, okitlajtolti tla kasikamatiya tlen kipoujtoya niman yejua okinankili: “¿Kenijki nikajsikamatis tla xakaj nechijlia tlinon kijtosneki?”. Sakin okikauili ika Felipe, akin melak kuajli temachtiaya, makipaleui makasikamati (Hechos 8:30, 31, 34). Tla tejua noijki tikneki tikasikamatis Biblia, xtlajtlani mamitsmachtikan ipan página tlen tikpiyaj ipan Internet, jw.org, noso xtitlani se carta ipan direcciones tlen uajnestiuej ipan yejuin revista. Noijki uelis tikominotsas iteixpantijkauan Jehová akin nemij kampa tichanti noso uelis tias ipan Kajli kampa nosentlaliaj iTeixpantijkauan Jehová. Timitsyolchikauaj xpoua Biblia niman xmokauili mamitspaleui kuajli xnemi.