Yejon tlen otikonteneujkej okijtojkej sekimej akin melak xkuajli nomachiliaj. ¿Ijkon yotimomachilijka noso tikixmati yakaj akin ijkon nomachilia?

Tla kema, kuajli xmatsto ika xsan tejua ijkon mopan panotika, ipan nochi tlaltikpaktli nemij melak miyekej akin melak xkuajli nomachiliaj noso melak tlajyouiyaj pampa yakaj akin melak kitlasojtlaj xkuajli nomachilia.

Kuajli nesi ika tinemij ipan on tonaltin ijkuak “tlamach nochiuas tlen sanoyej xkuajli”, yejua ika, onka miyek tlen techyolkokoua niman kichiua matajmankamikikan (2 Timoteo 3:1). Organización Mundial de la Salud kijtoua ika kanaj se de cada chikueyi tlaltikpakchanejkej melak xkuajli nomachiliaj. Niman ika ipampa COVID-19, tlen opanok ipan 2020 kanaj 26% ika omiyekiyakej akin melak ajmankamikij noso kipiyaj ansiedad niman kanaj 28% ika omiyekiyakej akin melak najmanaj noso kipiyaj trastornos depresivos graves.

Noneki matikmatikan kechmej sanoyej ajmankamikij niman kechmej sanoyej najmanaj, san ika, más noneki matikmatikan tlenon techpaleuis tejuamej niman tochanejkauan kuajli matomachilikan.

Ijkuak yakaj kuajli nomachilia, xouijtika kita kichiuas itekiyo. Yejua ueli kixikoua tlen ipan nochiua, ueli kichiua miyek tekitl niman ika iyojlo nomachilia.

• Xkijtosneki tla xkojtik.

• Kijtosneki ika kipiya se kokolistli tlen kichiua melak maajmankamiki, maka kuajli matlanemili, san tlemach makinemili niman san tlemach makichiua.

•   Yejon kichiua ika kemantika maka kuajli manouika imiuan oksekimej, niman kemantika xueli kichiua itekiyo.

• San akinon uelis ijkon ipan nochiuas: telpokamej, akin iuejueyimej, akin tlaneltokaj itech toTajtsin, akin xtlaj kineltokaj, akin kipiyaj tomin, akin xkipiyaj tomin, akin oyajkej escuela niman akin xonomachtijkej.

Kemantika se peua nopatla ken nomachilia, ken tlakua niman hasta ken kochi. Kanaj nochipa san ajmankamiktok noso nochipa san najmantika. Tla tejua noso yakaj akin tikixmati ijkon ipan nochiujtika, kanaj nonekis nenyaskej kampa tlapajtijketl niman ijkon nenkimatiskej tleka ijkon nemopan nochiujtika niman tlenon uelis nenkichiuaskej. San ika ¿tlenon noijki uelis mechpaleuis?

Jesucristo akin melak tlamachilise, ijkin okijto: “Para on yejuan xkualoj xnoneki sen tepajtijketl, pero para on yejuan kualoj kemaj” (Mateo 9:12). Tla yakaj kichiua tlen kijlia tlapajtijketl, uelis kipaleuis maka melak manokoko, makichiua tlen achto kichiuaya niman mayolpaki. Tla tejua timomachilia ijkon ken yotikteneujkej, noneki nimantsin tiktejtemos mamitspaleuikan. a

Biblia xtlajtoua itech kenon nonekis topajtiskej, san ika, tlen ompa noijtoua uelis techpaleuis kuajli matomachilikan. Ipan yejuin revista tikitaskej kenon Biblia uelis techpaleuis tla melak xkuajli tomachiliaj. Timitsyolchikauaj xkamapoua.