Rosi kijtoua: “Xueliya nikilkauaya seki tlaueltin pampa san intech nitlanemilijtoya niman pampa niknemiliaya melak xkuajli ontlamiskiaj”. ¿Katlejua tlaxeloltin itech Biblia okipaleuijkej? Se intech yejon tlaxeloltin katka Mateo 6:34, kampa kijtoua: “Ma ka xkomatstiakan on tlen mostla nochiuas, pampa cada tonajli ye onkaj tlen nenkiseliskej yejuan ika nemokauaskej. Cada tonajli, tej, nenkipiaskej problemas san kech uelis nenkixikoskej”. Rosi kijtoua ika tlen Jesús okijto okipaleui maka sa manajmana itech tlen ueliskia panos uajmostla. Yejua kijtoua: “Inikpiaya miyek tlaueltin, kuakon xok kinamikiya ninajmanas ipampa tlen xnochiuaya niman kanaj xkeman nochiuaskia”.

Yasmín kimachiliaya ika xueliya kiteltiaya ika najmanaya, yejua kijtoua: “Nichokaya nochi semanas niman seki yeuajli xueliya nikochiya. Xkuajli tlanemililtin nechijtlakojtoyaj”. ¿Katlejua tlaxelojli itech Biblia okipaleui? Yejua kiteneua 1 Pedro 5:7, kampa kijtoua: “Xmaktilikan Dios nochi on tlajtlamach yejuan san nenkomatstokej pampa yejua kineki mechpaleuis”. Yasmín noijki kijtoua: “Xonikajkauj ika nikchiuilia teoyotl Jehová, niman yejua okinankili noteoyouan. Onikmachili kentla onechkixtilijkej notlamamal. Kemantika ok nikpiya tlanemililtin tlen xnechpaleuiyaj, san ika, inikmati tlenon nikchiuas”.

Se ichpochtli itoka Isabella kijtoua: “Niknemilia ika nikchiua ken notaj, xnimantsin nikchiua tlen melak noneki. Kemantika niknemilia sakin nikchiuas, san ika, xtlaj nikchiua, san nikita televisión noso ninoseuiya. Xtepaleui ijkon tikchiuas pampa san timajmanas niman tlen tikchiuas xkuajli onkisas”. Okipaleui tlajtolyekanalistli tlen uajnestiuj ipan 2 Timoteo 2:15, kampa kijtoua: “Xchiua kanika para kuajli tonixnesis ixpan Dios ken se kuajli tekitki, yejuan xitlaj ika pinaua ipan itekiu”. Isabella kijtoua: “Xniknekiya ika Jehová mapinaui itech notekiyo san pampa xonikchiuj ijkuak nonekiya”. Isabella aman melak yonopatlak.

Kelly akin noijki ijkon kichiuaya, kijtoua: “Ijkuak kipiaya ika niktemakas se tekitl, nikchiuaya san ijkuak inonekiya niktemakas. Kuakon sa nichokaya, xok ueliya nikochiya niman ninajmanaya. Yejuin xtlaj ika nechpaleuiaya”. Melak okipaleui tlajtolpaleuilistli tlen uajnestiuj ipan Proverbios 13:16, kampa kijtoua: “Tlaltikpakchane akin tlamachilise noyekana ika tlamachilistli, san ika, akin xtlamachilise kisemoyaua tlen xtepaleui”. Yejua kijtoua kenon okipaleui tlanemilis itech yejuin: “Tepaleui tiknemilis niman tikmatstos tlenon tikchiuas. Aman nikijkuiloua tlenon nikchiuas, yejuin nechpaleuiya manikmatsto niman maka manikchiua hasta ijkuak inoneki”.

Cristina kijtoua: “Noueuentsin onechkauj, oninokauj noselti imiuan naui nokoneuan pipitikej”. ¿Katlejua tlajtolpaleuilistli okipaleui? Proverbios 17:17, kampa kijtoua: “Se akin melauak kuajli iuan touikaj nochipa techtlasojtla, niman nochiua ken tokniuj ijkuak tikpiyaj tlajyouilistli”. Cristina okinexti tlapaleuilistli ipan tlanechikojli. ¿Tlenon opanok? Yejua kijtoua: “Akin inuan ninouikaya okitejtemojkej kenon nechpaleuiskej. Sekimej otechitkilijkej tlakuajli niman xochimej. Yexpa, miyekej akin iuan touikayaj otechpaleuijkej matochanpatlakan. Se onechpaleui maniknexti kampa nitekitis. Akin inuan ninouika nochipa nouan onenkej”.

Diana akin yotikteneujkaj, noijki onomachili iselti. Yejua kilnamiki kenon onomachili ipampa nochi tlen ipan opanok: “Nikitaya kenon oksekimej nemiyaj san sekan, san ika, nejua ninomachiliaya noselti niman xnipakiya”. Melak okipaleui Salmo 68:6, kampa kijtoua: “ToTajtsin kinmaka se kajli kampa manemikan akin inselti nemij”. Yejua kijtoua: “Nikmatiya ika yejuin tlaxelojli xtlajtouaya itech se kajli kampa chantilo. Onikasikamat ika toTajtsin techmaka kampa matomachilikan ika toyojlo, ika yolseuilistli niman san sekan intech akin kitlasojtlaj. San ika, nikmatstoya ika xueliskia nikmachilis ika ninemi nisiuj intech oksekimej tla kachtopa xninonisiuiaya itech Jehová. Kuakon Salmo 37:4 onechpaleui, ompa kijtoua: ‘Xnexti kualtsin yolpakilistli itech Jehová, niman yejua mitsmakas tlen kineki moyojlo’”.

Yejua sa ika tlami okijto: “Onikitak ika nonekiya melak ninopaleuis ipan Jehová; xnemi yakaj okse ijkon ken yejua. Niknekiya ninouikas inuan akin chikauak kipiyaj intlaneltokil, kuakon onikijkuilo tlenon ueliskia nikchiuas imiuan. Oninomachti nikitas san tlen kuajli kichiuayaj oksekimej niman xnimantsin nikitas tlen xkuajli imintech”.

Tikmatij ika akin kitekichiuiliaj toTajtsin noijki tlajtlakolejkej. Iteixpantijkauan Jehová noijki kipiyaj tlaueltin ijkon ken nochimej. San ika, tlen kinmachtia Biblia kichiua makinpaleuikan oksekimej nochipa ijkuak uelij. Melak tepaleui tikinpiyas akin ijkon imiuan timouikas. San ika ¿uelis techpaleuiskej itlajtolyekanalisuan Biblia matikxikokan ijkuak tikpiyaj kokolistli tlen xueli nopajtiaj noso ijkuak miki se tochanejkauj?