ITECH TLEN TLAJTOUA IXPAN | ¿UELIS TIKMATISKEJ KENON ILUIKAK?
Tlen kinemiliaj sekimej itech kenon iluikak
¿Kanaj yotimotlajtoltijka kenon yemelak iluikak niman akinomej ompa nemij? Tla kema, xsan tejua. Ipan melak miyek xiujtin, tlaltikpakchanejkej kinejnemiliaj kenon iluikak. Sekimej kinemiliaj ika iluikak ompa chantij touejkachanejkauan akin noneki tikinueyichiuaskej. Oksekimej kinemiliaj ika ompa melak tlakualtsinkan kampa onka yolseuilistli, kampa chantij iluikaktekitkej niman tlaltikpakchanejkej akin yomijkej tlen kuajli okichiujkej. Niman oksekimej kijtouaj ika ompa chantij melak miyekej tajtsitsintin.
Miyekej kijtouaj ika xuelis tikmatiskej kenon yemelak iluikak pampa xakaj akin oualeuj ompa matechijli kenon. San ika, yejuin tlanemilijli xmelauak. Jesucristo yejua nemiya ipan iluikak kachtopa niman sakin ouajla ipan tlaltikpaktli. Yejua kuajli okijto yejuin tlajtoltin ijkuak okimijli sekimej tlayekankej itech tlaneltokijli ipan kachtopa siglo: “Nejua oniualeu ne iluikak xpara nikchiuas tlen nejua nikneki, yej para nikchiuas on tlen kineki on yejuan onechajtitlan”. Kuakon Jesús yejua okijto kenon iluikak ijkuak okimijli itlatitlankauan yejuin: “Ne ichan noTajtsin onkaj miyek chanyotl kampa uelis chanti[los]” (Juan 6:38; 14:2).
Itaj Jesús yejua toTajtsin Jehová niman chanti iluikak (Salmo 83:18). Ken tikitaj, san Jehová niman Jesucristo uelis techijliskej kenon yemelak iluikak. Yejuamej miyek tlen techijliaj itech kenon yemelak iluikak ika tlatlachalistin tlen okitakej akin kuajli okitekichiuilijkej toTajtsin.
Ipan okse tlamachtijli tlajtos itech seki tlaxeloltin itech Biblia kampa kijtoua kenon sekimej okitakej ipan miyek tlatlachalistin. Ijkuak tomachtiskej tlenon okitakej ipan tlatlachalistin, matikilnamikikan ika tlen onka ipan iluikak xijkon ken tlen onka ipan tlaltikpaktli, tlemach tlen uelis tikitskiskej noso tikitaskej. Ika yejon, toTajtsin xtechtomilis ika tlajtoltin tlen xuelis tikasikamatiskej kenon yemelak iluikak. Yejua techpaleuis ika tlatlachalistin tlen okitemakak niman ijkon uelis tikasikamatiskej. Ijkuak tomachtiskej yejuin tlatlachalistin, techpaleuis kuajli matikasikamatikan akinomej chantij ipan iluikak.
