ToTajtsin okijli Adán: “Ijkuak tikuas itlakyo, xmatstia [...] ika onkaj timikis” (Génesis 2:17). Tla yejua kimatiya ika Adán ueuentsintiaskia niman mikiskia, xnonekiya kijliskia yejon. Adán kimatstoya ika tla xkikuaskia itlakilyo yejon kojtli, xmikiskia.

Adán niman Eva xnonekiya kikuaskiaj itlakilyo yejon kojtli, pampa kampa chantiyaj onkatkaj okseki kojtlakilyomej (Génesis 2:9). Tla yejuamej xkikuaskiaj yejon kojtlakilyotl, kiteititiskiaj ika kitlakamatij toTajtsin, akin okinmakak innemilis, niman noijki ika kasikamatiyaj ika san yejua nonekiya kimijlis tlenon kichiuaskiaj.

Tla tiknekij tikmatiskej tleka Adán niman Eva omijkej, noneki tikitaskej tlen yeuejkaui opanok, tlen hasta aman ok techijtlakoua. Satanás okitekitilti se kouatl tlen ika otekajkayauj. Ipan Biblia ijkin kijtoua: “On kouatl más kimatiya kenijkitlakajkayauas xken nochi on oksekimej tepeyolkej yejuan toTEKO Dios okinchijchiu. Niman se tonajli on kouatl okitlajtoltij on siuatl: ‘¿Tlen melauak omechijlij Dios para nion se xnenkuaskej itlakyo on kojtin yejuan onokej ipan in xochitlan?’” (Génesis 3:1).

Eva okinankili: “Uelis tikuaskej itlakyo nochi on kojtlakijlotl, pero san on yejuan onkaj itlajkotian on xochitlan, Dios otechijlij maka tikuaskej, nion tikitskiskej itlakyo, pampa tla tikitskiskej timikiskej”. Sakin on kouatl ijkin okijli: “Xnejli. Xnenmikiskej. Kuajli kimati Dios ika tla nenkikuaskej itlakyo on kojtlakijlotl nentlakajsikamatiskej, niman nenkimatiskej on tlen kuajli niman on tlen xkuajli. Niman ijkon nemochiuaskej ken yejua Dios”. Ika yejuin, Satanás okijto ika Jehová se tlakajkayaujketl katka niman ika xkinkauiliaya makipiyakan tlen kuajli (Génesis 3:2-5).

Eva okineltokak tlen kijlitoyaj. Yejua okitak kojtlakilyotl niman melak okileui, kuakon okontilan itlakilyo niman opeuj kikua. Biblia kuajli techijlia tlenon opanok sakin: “Niman no okimakak iueuentsin, niman yejua no okikuaj” (Génesis 3:6).

¡ToTajtsin melak onoyolkoko ijkuak okitak ika ikoneuan xokitlakamatkej! ¿Tlenon okichiuj? Jehová okijli Adán: “Timitonis sanoyej para tiknextis tlakuajli yejuan ika timopanoltis, hasta kaman timiki, niman oksejpa timokuepas tlajli. Nejua onikchijchiu motlalnakayo ikan tlajli, niman ijkuak timikis oksejpa timokuepas tlajli” (Génesis 3:17-19). Niman ijkon opanok pampa Adán omik “ijkuak kipiyaya 930 xipan” (Génesis 5:5). Ijkuak Adán omik, xoyaj iluikak nion oksekan. Ijkuak Jehová xikichijchiuaya ika tlalpoktli, Adán xkanaj  nemiya, niman ijkuak omik, oksejpa onokuep tlalpoktli, kijtosneki ika opopoliuj. ¡Yejuin melak teyolkoko!

Pampa Adán iuan Eva xokinejkej kitlakamatiskej toTajtsin, onochiujkej tlajtlakolejkej niman okipolojkej se kualtsin nemilistli tlen xkeman tlamiskia. Ijkuakon opeuj kipiyaj miyek ajmantli pampa yonochiujkaj tlajtlakolejkej. San ika, tlajtlakojli xsan yejuamej okimijtlako, yejuin noijki techijtlakoua akin intech tiualeuaj. Romanos 5:12 kijtoua: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej pampa nochimej tlajtlakouaj”.

Ipan Biblia kijtoua ika mikilistli yeskia kentla se tlakentli tlen kintlapachoua nochi kalpamej niman uejueyikalpamej (Isaías 25:7, TNM). Yejon tlakentli tlen kintlapachoua nochi kalpamej yeskia kentla se ayaujtli tlen teijtlakoua niman tlen xakaj uelis itech makisas. Kema, “nochimej mikij pampa tekoneuan itech Adán” (1 Corintios 15:22). Tlen aman totlajtoltiaj noijki onotlajtolti apóstol Pablo, akin okijto: “¿Akinon tej, nechmakixtis itech notlalnakayo yejuan nechuika ipan mikilistli?”. ¿Yakaj uelis techmakixtis? (Romanos 7:24).