1. Maski Jehová melak Ueyixtika, ¿tlenon kimijlia makichiuakan oksekimej?

JEHOVÁ yejua akin Ueyixtika. Yejua akin nochi okichijchiuj niman melak tlamachilise niman kipiya ueyi kojtilistli. Ijkuak yejua yokipaleui Job makasikamati yejuin, Job okijto sakin: “Aman nikmatstika ika tejua ueli tikchiua nochi tlajtlamach niman xonka ipan motlanemilil tlen xuelis tikchiuas” (Job 42:2). Jehová uelis kichiuas maski san tlenon tlen yokinemili kichiuas. Yejua xnoneki yakaj makipaleui. San ika, yejua kiteititia itlasojtlalis ijkuak kinnojnotsa oksekimej iuan matekitikan niman ijkon nochiuas tlen yejua kineki.

2. ¿Tlenon ueyi tekitl Jehová okimakak Jesús makichiua?

² ToTajtsin okichijchiuj iKoneuj, Jesús, ijkuak xtlaj nion xakaj kichijchiuaya. Kuakon Jehová okikauili iKoneuj makipaleui kichijchiuas nochi okseki tlemach (Juan 1:1-3, 18). Pablo, itlatitlankauj Cristo, okijto itech Jesús: “Itechkopa Cristo, Dios okichijchiu nochi tlen onkaj ne iluikak niman nikan ipan tlaltikpaktli, on yejuan tikitaj niman on yejuan xtikitaj”. Noijki okijto ika “Dios okichijchiu  nochi tlajtlamach itechkopa Cristo, niman [...] para Cristo” (Colosenses 1:15-17). Kuakon Jehová xsan okimakak iKoneuj se ueyi tekitl noijki okimijli oksekimej makimatikan yejon. Niman ijkon okititi ika kitlasojkaita.

3. ¿Tlenon tekitl okimakak Jehová makichiua Adán niman tleka?

³ Jehová noijki yokinnots tlaltikpakchanejkej matekitikan iuan. Se neskayotl, yejua okikauili Adán makintokayoti yolkamej (Génesis 2:19, 20). Xnemili kenon nomachiliaya Adán ika yejon tekitl. Yejua melak kuajli onomachti ken kintokayotis yolkamej itech ken tlachiayaj niman itech tlen kichiuayaj. Pampa Jehová okinchijchiuj nochi yolkamej, ueliskia yejua kintokayotiskia. San ika, yejua melak kitlasojtlaya Adán, kuakon okikauili yejua makintokayoti yolkamej. ToTajtsin noijki okimakak Adán se kualtsin tekitl, kichiuas ika nochi tlaltikpaktli manokuepa se xochitlalpan (Génesis 1:27, 28). San ika, sakin Adán okinemili kikauas iuan tekitis toTajtsin. Ika yejon, Adán opeuj tlajyouiya niman noijki tinochimej akin tiualeuaj itech (Génesis 3:17-19, 23).

4. ¿Kenon oksekimej otekitkej iuan toTajtsin niman ijkon onochiuj tlen yejua kineki?

⁴ Sakin, toTajtsin okinnots oksekimej tlaltikpakchanejkej iuan matekitikan. Noé okichijchiuj se akajli kampa uelis makisaskia niman ichanejkauan ijkuak uajlaskia apachiuilistli. Moisés okinmakixti israelitas itech Egipto. Josué okinyekan israelitas maajsikan ipan Tlajli tlen yokijtoka kinmakas. Salomón okichijchiuj teopan tlen onka Jerusalén. María onochiuj nantli akin itech onemiko Jesús. Nochi yejuin akin yotikinteneujkej niman oksekimej otekitkej iuan toTajtsin niman ijkon onochiuj tlen yejua kinekiya.

5. a) ¿Tlenon uelis tikchiuaskej tinochimej? b) ¿Noneki manopaleui Jehová makichiua yejon tekitl? (Xkita tlaixkopinajli kampa peua tlen tomachtijtokej)

⁵ Ipan yejuin tonajli, Jehová technotsa matikchiuakan nochi tlen tiueliskej niman ijkon tikpaleuiskej iTekiuajyo. Onka miyek ken uelis tiktekichiuiliskej toTajtsin. Maski xtinochimej uelis tiktekichiuiliskej san noijki, tinochimej uelis titenojnotsaskej itech kuajli tlajtoltin itech Tekiuajyotl. Jehová ueliskia kichiuas yejuin tekitl san yejua. Yejua ueliskia uajtlajtoskia ipan iluikak niman makikakikan ipan tlaltikpaktli. Jesús okijto ika uelis kichiuas ika temej makinnojnotsakan oksekimej itech iTekiuajyo toTajtsin (Lucas 19:37-40). San ika, Jehová techkauilia matitekitikan iuan (1 Corintios 3:19). Pablo okijkuilo: “Matitekitikan san sekan iuan yejua, tejuamej noijki timechtlajtlaniliaj ika maka san xselikan itetlasojtlalis toTajtsin niman xnenkichiuaskej tlen yejua kineki manochiua” (2 Corintios 6:1, TNM). Titekitiskej iuan Jehová se tlateochiualistli. Matikitakan seki tlemach tleka melak techyolpaktia iuan titekitiskej.

6. ¿Kenon onomachili iKoneuj toTajtsin ijkuak otekit iuan iTaj?

⁶ Nochipa techyolpaktia titekitiskej iuan toTajtsin. Ijkuak xiuajlaya isenteKoneuj toTajtsin ipan tlaltikpaktli, okijto: “Jehová yejua onexchijchiuj ijkuak opeuj iojui, [...] oninen inakastlan ken se kuajli tekitketl, niman oninochiuj akin yejua melak okitlasojtlak mojmostla, niman nochipa oniyolpak ixpan” (Proverbios 8:22, 30). Ijkuak Jesús otekit iuan iTaj, yejua melak pakiya pampa okichiuj miyek tlemach niman pampa kimatiya ika Jehová kitlasojtlaya. San ika ¿tlenon uelis tikijtoskej tejuamej?

7. ¿Tleka titenojnotsaskej techyolpaktia niman kichiua melak kuajli matomachilikan?

⁷ Jesús okijto ika tiyolpakij ijkuak tiktemakaj niman ijkuak tikseliaj itlaj (Hechos 20:35). Otechyolpakti ijkuak otechmachtijkej tlen melak. San ika ¿tleka melak techyolpaktia ijkuak tikteijliaj tlen melauak? Pampa tikitaj ika yejuamej yolpakij ijkuak kimatij tlen melauak niman kasikamatij tlenon temachtia Biblia niman peuaj kuajli iuan nouikaj toTajtsin. Techpaktia ijkuak tikitaj ika  yejuamej peuaj kipatlaj ken tlanemiliaj niman ken nemij. Ijkuak titenojnotsaj, tikchiuaj se tekitl tlen melak ueyi kijtosneki niman melak kuajli tomachiliaj xijkon ken ijkuak tikchiuaj okse tekitl. Yejon uelis kichiuas mayolseuikan iuan toTajtsin noso iuan manouikakan niman ijkon kipiyaskej nemilistli tlen xkeman tlamis (2 Corintios 5:20).

8. ¿Kenon nomachiliaj sekimej tokniuan ika tekitij iuan Jehová?

⁸ Ijkuak tikinpaleuiyaj oksekimej manomachtikan itech toTajtsin, tikmatij ika tikyolpaktijtokej Jehová niman yejua kitlasojkaita ika tokojtiliaj. Noijki, melak techyolpaktia ijkuak ijkon tiktekichiuiliaj (xpoua 1 Corintios 15:58). Marco, akin chanti Italia, kijtoua: “Melak niyolpaki pampa nikmati ika nikmaka Jehová nochi tlen niueli niman xnikmaka yakaj akin nimantsin kilkaua tlen nikchiua”. Franco, akin noijki kitekichiuilia Jehová Italia, yejua kijtoua: “Ika iTlajtol toTajtsin niman tlanechikoltin iuan amatlajkuiloltin, Jehová techtlalnamiktia mojmostla ika yejua techtlasojtla. Nochi tlen tikchiuaj ipampa melak ueyi kijtosneki, maski tejuamej tikitaj ika xueyi tlen tikchiuaj. Ika yejon, nitekitis iuan toTajtsin melak nechyolpaktia niman nikasikamati tleka nikpiya nonemilis”.

9. ¿Kenon nouikayaj Jehová iuan Jesús niman tleka?

⁹ Ijkuak titekitij san sekan iuan akin tikintlasojtlaj, tikinnisiuiyaj. Kuajli tikimixmatij kenon yejuamej niman inkualneskayouan. Tikitaj tlenon kinekij kichiuaskej ipan innemilis niman kenon kiyejyekouaj kichiuaskej tlen yokinemilijkej. Jesús otekit iuan Jehová melak miyek xiujtin. Intlasojtlalis tlen yejuamej kipiaya oueyixtia niman xakaj ueliskia kinxelos. Jesús okijto kenon nouikaya iuan iTaj ijkuak okijto: “Nejua niman noTajtsin san se” (Juan 10:30). Yejuamej melauak san sekan nemiyaj niman kuajli nopaleuiaya ijkuak san sekan tekitiyaj.

10. ¿Tleka tla titenojnotsaj tiknisiuiyaj toTajtsin niman oksekimej?

¹⁰ Jesús okitlajtlanili Jehová makintlajpiya inomachtijkauan. ¿Tleka? Yejua okijto yejuin ipan se teoyotl: “San sekan ma nemikan ijkon ken tejua nouan tinemi” (Juan 17:11). Ijkuak tikchiuaj itlanauatiluan toTajtsin niman titenojnotsaj, melak kuajli tikasikamatij ika kipiya kualtsitsintin kualneskayomej. Tikasikamatij tleka melak kuajli itech titlaneltokaskej niman tokauiliskej matechyekana. Tla tochikauaj iuan kuajli touikaskej, yejua noijki kuajli touan nouikas (xpoua Santiago 4:8). Noijki tikinnisiuiyaj tokniuan pampa tikitaj ika noijki kixnamikij tlaueltin ken tejuamej niman yolpakij ken tejuamej niman tinochimej san noijki tikyejyekouaj tikchiuaskej ipan tonemilis. Titekitij san sekan, tiyolpakij niman titlaxikoua san sekan. Octavia, akin chanti Gran Bretaña, kijtoua: “Titekitis iuan Jehová timonisiuis itech niman itech oksekimej”. Yejua kijtoua ika akin iuan nouika san noijki kinekij kichiuaskej ipan inemilis ken yejua. Tikmatstokej ika tejuamej noijki ijkon tomachiliaj. Ijkuak tikitaj kenon nochikauaj tokniuan ika kiyolpaktiskej Jehová, kichiua matonisiuikan itech yejuamej.

11. ¿Tleka ok melak kuajli tonisiuiskej itech Jehová niman itech tokniuan ipan yenkuik tlaltikpaktli?

 ¹¹ Totlasojtlalis itech toTajtsin melak ueyiya aman. San ika, ipan yenkuik tlaltikpaktli totlasojtlalis melak ueyi yes. Xnemili kenon melak kualtsin tekitl tikchiuaskej ika tlayekapan. Tikinseliskej akin oksejpa uajnemiskej ipan tlaltikpaktli niman tikinmachtiskej itech Jehová. Noijki tikchiuaskej ika tlaltikpaktli manokuepa se xochitlalpan. Melak techyolpaktis yejon ika titekitiskej san sekan niman ika yolik popoliujtias totlajtlakoluan ijkuak Cristo tlanauatis. Nochimej tlaltikpakchanejkej nonisiuijtiaskej iuan oksekimej niman itech Jehová, akin “[ki]tlapoua moma niman nochi tlen yoltika [ki]makatika tlen kipoloua” (Salmo 145:16).

12. ¿Tleka tikijtouaj ika ijkuak titenojnotsaj techtlajpiya?

¹² Noneki tiktlajpiyaskej ken iuan touikaj Jehová. Tinemij ipan yejuin tlaltikpaktli kampa tlayekana Satanás niman tikpiyaj tlajtlakojli. Ika yejon, xouijtika titlanemiliskej niman tikchiuaskej ken tlaltikpakchanejkej kichiuaj. Yejuin kentla tikpanauiskej ueyi atentli. Tla xtikneki matechuika atl, kipiya ika tochikauaskej maka matechuika. Ijkuak titenojnotsaj techpaleuiya maka matikpolokan ken touikaj iuan Jehová. ¿Kenon techpaleuiya? Ijkuak titlajtouaj itech Jehová niman itech Biblia, san titlanemiliaj itech tlemach tlen ueyi kijtosneki niman tlen kuajli. Xtitlanemiliaj itech tlen uelis kiyemanis totlaneltokil (Filipenses 4:8). Ijkuak titenojnotsaj chikaui totlaneltokil pampa techilnamiktia tlen toTajtsin yotechijli techmakas niman itech itlanauatiluan. Noijki techpaleuiya matikpiyakan kualneskayomej tlen techpaleuiyaj matikixnamikikan tlen Satanás kiyekana (xpoua Efesios 6:14-17).

13. ¿Kenon nomachilia se tokniuj chanej Australia itech tlanojnotsalistli?

¹³ Ijkuak chikauak titenojnotsaj, tomachtiaj niman nochipa itlaj tikchiuaj ipampa oksekimej ipan tlanechikojli, techtlajpiya pampa xtitlanemiliaj itech tlaueltin tlen tikinpiyaj noso melak tajmanaskej. Joel, akin chanti Australia, kijtoua: “Nitenojnotsas nechpaleuiya manikita tlen yemelak panoua. Nechilnamiktia tlen ouijtika kixnamikij tlaltikpakchanejkej, niman nikilnamiki ika yonechpaleui tlajtolyekanalistin itech Biblia. Ijkuak nitenojnotsa nechpaleuiya nochipa maniyolyemanki niman manitlaneltoka itech Jehová niman itech tokniuan”.

14. ¿Kenon nesi ika toTajtsin techpaleuiya ika iespíritu santo?

¹⁴ Ijkuak titenojnotsaj noijki nesi ika Jehová techpaleuiya ika iespíritu santo. Matitlanemilikan itech yejuin: tejua tikpiya se tekitl kampa noneki titemamakas pan kampa tichanti. Xtlaj mitstlaxtlauiliskej ika yejon tekitl niman tejua tiktlaxtlauas nochi. Niman xsan yejon, tlaltikpakchanejkej xkinekij mitsseliliskej pan niman oksekimej hasta mitstlauelitaj pampa tikimitkilia yejon pan. ¿Ok tiuejkauis tikchiuas yejon tekitl? Nimantsin xkuajli timomachilis niman xok tiknekis tikchiuas yejon tekitl. San ika, timiyekej xtoteltiaj ika titenojnotsaj nochi xiuitl, hasta tijkuij totomin niman tikxelouaj tonaltin. Tikchiuaj yejuin maski tlaltikpakchanejkej xkuelitaj tlen tikchiuaj noso techtlauelitaj. Ijkon nesi ika iespíritu santo toTajtsin techpaleuijtika.

15. ¿Kenon ijkuak titenojnotsaj titlapaleuiyaj manochiua tlen kineki toTajtsin ipampa tlaltikpakchanejkej?

¹⁵ Melak noneki matitenojnotsakan pampa yejon tlapaleuiya manochiua tlen toTajtsin kineki ika tlaltikpakchanejkej. Yejua kinekiya ika tlaltikpakchanejkej manemikan nochipa, niman yejon xokipatlak ijkuak Adán otlajtlako (Isaías 55:11). ToTajtsin okichiuj itlaj niman ijkon techmakixtis itech tlajtlakojli niman mikilistli. ¿Kenon? Jesús ouajla ipan tlaltikpaktli niman okitemik inemilis. San ika, tla tiknekij matechpaleui tlen  okichiuj topampa, noneki tiktlakamatiskej toTajtsin. Ika yejon, Jesús otemachti tlenon kineki toTajtsin matikchiuakan niman okinnauati inomachtijkauan ika noijki yejon matemachtikan. Tejuamej titenojnotsaj niman tikinpaleuiyaj oksekimej ipan yejuin tonajli kuajli manouikakan iuan toTajtsin. Ijkuak ijkon tikchiuaj, titekititokej iuan toTajtsin niman ijkon makinpaleui tlen ika kineki kinmakixtis tlaltikpakchanejkej itech tlajtlakojli niman mikilistli.

16. ¿Tleka ijkuak titenojnotsaj tiktlakamatij uejueyimej itlanauatiluan toTajtsin?

¹⁶ Ijkuak tikinpaleuiyaj oksekimej makipiyakan nemilistli tlen xkeman tlami, tikteititiaj ika titetlasojtlaj niman tiktlasojtlaj toTajtsin. Yejua “kineki nochi tlakatl ma makisa niman ma kimati on tlen melauak” (1 Timoteo 2:4). Ijkuak se tlakatl okitlajtolti Jesús katlejua melak ueyi itlanauatil toTajtsin, yejua okijli: “‘Xtlajsojtla on moTeko Dios ikan nochi moyojlo, ikan nochi moalma niman ikan nochi motlamachilis.’” Niman ika ome tlanauatijli, tlen noijki ueyi ken kachtopa, okijli: “‘Xkintlajsojtla oksekimej no ijki ken tejua timotlajsojtla’” (Mateo 22:37-39). Ijkuak titenojnotsaj, tiktlakamatij yejon ome tlanauatiltin (xpoua Hechos 10:42).

17. ¿Kenon timomachilia tejua ijkuak titenojnotsa itech kuajli tlajtoltin?

¹⁷ Se ueyi tlateochiualistli titekitiskej iuan Jehová niman ika techmaka se tekitl tlen techyolpaktia, kichiua matiknisiuikan niman matiknisiuikan tokniuan. Noijki techpaleuiya kuajli iuan matouikakan. Niman noijki ijkon uelis tikteititiskej ika tiktlasojtlaj toTajtsin niman oksekimej. Jehová kinpiyaj melak miyekej itekipanojkauan ipan nochi tlaltikpaktli niman nochimej yejuamej melak tlatlamantikej noso sejsenekamej. San ika, maski telpokamej noso ueuentsitsintin, kipiyaj tomin noso ka, kojtikej noso xkojtikej, nochimej uelis kimijliskej oksekimej tlen kineltokaj. Tomachiliaj ijkon ken se tokniuj, akin chanti Francia, yejua kijtoua: “Akin melak kipiya kojtilistli, akin ueyixtika, akin okichijchiuj nochi tlen onka, toTajtsin akin paki, nechijlia: ‘Xuiya, xtlajtoti. Xtlajtoti nopampa, xtlajto ika moyojlo. Nejua nimitsyolchikauas, nimitsmakas noTlajtol Biblia, mitspaleuiskej iluikaktekitkej niman nimitsmakas akin akin mouan yaskej. Nejua nimitsmachtis niman nimitsijlis kenon tikchiuas ijkuak nonekis’. ¡Se ueyi kualtsin tekitl tlen Jehová techtlajtlanilia matikchiuakan niman ijkon iuan titekitiskej san sekan!”.