Revista The Watch Tower (La Torre del Vigía) tlen okis ipan 1 de junio de 1912 okijto: “Kanaj miyekej akin kinpouaj toamatlajkuiloluan kixmatij yakaj akin xueli tlachia”. Yejuin revista noijki okijto ika ionkatkaj seki amatlajkuiloltin tlen yejuamej ueliskiaj kipouaskiaj niman xtlaj kitlaxtlauaskiaj. Niman noijki okijto: “Yejuin amatlajkuiloltin para akin xtlachiaj noijki onochijchiuj ika puntitos tlen pajpankistokej, ijkon yejuamej ueliskej kipouaskej ika imajpiluan. Miyekej akin xtlachiaj melak kitlasojkamatij kimatiskej ika ajsis se tonajli ijkuak tikseliskej miyek tlateochiualistin”.

 Ijkuak onoijkuilo yejon, xonkatka se braille ika inglés tlen nochimej makasikamatikan, maski ijkon iteixpantijkauan Jehová ikichiujtoyaj amatlajkuiloltin tlen kipiayaj “puntitos tlen pajpankistokej”, ijkon akin xtlachiaj ueliskej kipouaskej. Ipan yejuin tonaltin noijki ijkon tikchiuaj, tikinchijchiuaj amatlajkuiloltin ika braille ipantsin 50 tlajtoltin. ¿Kenon nochijchiuaj?

 Kachtopa noneki noijkuilos yejon puntitos tlen pajpankistokej ipan amatlajkuilojli ika braille. Michael Millen, akin tekiti ipan Servicios de Procesamiento de Texto, ne Patterson (Nueva York), kijtoua: “Kachtopa tikintekitiltiayaj programas informáticos tlen oksekimej okichijchiujkej niman ijkon titlajkuilouayaj ika braille, san ika, yejuin xtechpaleuiyaya ijkuak tikijkuilouayaj ika okseki tlajtoltin. Aman tiktekitiltiaj programa Watchtower Translation System, tlen techkauilia matikijkuilokan braille ika miyek tlajtoltin. Yejuin programa melak kualtsin. Xonka okse ken yejuin”.

 Amatlajkuiloltin ika braille xsan kijtouaj tlen onkatij ipan párrafos noijki kijtouaj tlen uajnestiuj ipan tlaixkopinaltin. Se neskayotl, yejon tlaixkopinajli tlen uajnestiuj ixpan yejon amoxtli ¡Nochipa uelis tiyolpakis! ijkon onoijkuilo ika braille: “Se tlakatl nejnentiuj ipan se ojtli tlen kipiya curvas, iyeualiyan onkatij xochimej, tepemej niman melak tlaxoxojkan”. Jamshed xtlachia, maski ijkon precursor niman tlapaleuijketl ipan tlanechikojli, yejua kijtoua: “Melak nikuelita kenon kimijkuilouaj tlaixkopinaltin ika braille”.

 Sakin ijkuak nochi yonoijkuilo ika braille, onotitlanij yejon archivos ipan sucursales kampa kinchijchiuaj amatlajkuiloltin. Para kichijchiuaskej yejon kitekitiltiaj se amatl tlen melak tlaxikoua, ijkon xtsajtsayani ijkuak kijkuilouaj yejon puntitos tlen pajpankistokej, nion maski melak kitekitiltiaj. Sakin kinyektlaliaj páginas niman san sekan kinsenpantlaliaj ika se tepostli noso espiral ijkon ken se cuaderno. Niman sakin komintitlanij iuan okseki amatlajkuiloltin tlen kiselia tlanechikojli, san ika, tla se tokniuj akin xtlachia kipaleuijtokej ika se correo kampa xnotlaxtlaua, kuakon ompa komintitlanij. Niman tla tokniuan akin xtlachiaj noneki isiujkan kinseliskej amatlajkuiloltin tlen notekitiltiaj ipan tlanechikojli, sucursales nimantsin komintitlaniliaj.

 Para kinchijchiuaskej amatlajkuiloltin ika braille melak noneki tiempo niman tomin. Ipan Wallkill (Nueva York), kampa kinchijchiuaj toamatlajkuiloluan, para kinchijchiuaskej ome Biblia ika braille, san noijki uejkauij ika kinchijchiuaj 50,000 Biblias tlen tikinpiyaj. Niman se Biblia ika braille grado 2 ika inglés kipiyaj 25 volúmenes. a Para nochijchiuas se Biblia ika braile noneki miyek tomin, ika nochi yejuin tomin kaxiliskia para nochijchiuaskia 123 Biblias. San para noixpantsakua se Biblia ika braille de 25 volúmenes notlaxtlaua kanaj 150 dólares.

 ¿Kenon nomachiliaj tokniuan akin tlapaleuiyaj kampa nochijchiuaj yejuin amatlajkuiloltin? Nadia, akin tlapaleuiya ipan sucursal tlen onka Sudáfrica kijtoua: “San niknemilia kenon tokniuan tlajyouiyaj pampa xtlachiaj, ika yejon melak nechyolpaktia nikchiuas itlaj inpampa, niman kuajli nikmatstika ika Jehová melak kintlasojtla”.

 Niman tla se akin xtlachiaj xueli tlaamapoua ika braille, ¿tlenon uelis kichiuas? Yeuejkaui onochijchiuj se folleto tlen itoka Aprenda a leer braille, yejuin folleto onochijchiuj para akin ueli tlachiaj niman noijki ika braille para akin xtlachiaj, ijkon omemej uelis san sekan kitekitiltiskej. Yejuin folleto noijki kuajkui se regleta kampa titlajkuilos ika braille niman kipiya se punzón tlen yeskia kentla se lapíz. Nochi yejuin kinpaleuiya akin xtlachiaj makitsontekontlalikan kenon noijkuiloua tlajtoltin ika braille, niman ijkon uelis tlaamapouaskej ika imajpiluan.

 ¿Kenon kinpaleuiya amatlajkuiloltin ika braille tokniuan akin xtlachiaj niman akin xmás kuajli tlachiaj? Matikitakan tlen ipan opanok tokniuj Ernst, akin chanti Haití, yejua yaya ipan totlanechikoluan san ika xkipiaya nion se amatlajkuilojli ika braille. Ika yejon ijkuak kinekiya tlanankilis nonekiya kitsontekontlalis nochi tlen kijtos. Yejua kijtoua: “Aman nochi yonopatlak pampa ueli nitlanankilia nochipa ijkuak nikneki, pampa tinochimej tikseliaj tlen ika tikchikauaskej totlaneltokil”.

 Jan se tlayekanketl niman chanti Austria, yejua xmás kuajli tlachia, maski ijkon kiyekana tlamachtijli itech Amatl tekakistilijketl niman tlamachtijli itech Biblia iuan tlanechikojli. Yejua kijtoua: “Toamatlajkuiloluan ika braille melak kuajli nasikamatij pampa ipáginas numeradas niman notas tlen kipiya nimantsin tikinnextis, noijki tlen kijtoua itech tlaixkopinaltin kuajli nasikamatij”.

 Ipan Corea del Sur chanti se precursora akin itoka Seon-ok. Yejua xtlachia niman xtlakaki, ika yejon ipan totlanechikoluan nonekiya yakaj makipaleui ika imauan ijkon kimatis tlen noijtoua. San ika, aman san iselti ueli kinpoua toamatlajkuiloluan ika braille. Yejua kijtoua: “Melak ouijtika nikita nikpouas okseki amatlajkuiloltin ika braille, pampa kinpoloua miyek puntitos, noijki xkuajli onkatij niman yejon amatl tlen kitekitiltiaj xmás tlaxikoua. San ika melak nikuelita nikinpouas toamatlajkuiloluan pampa yejon amatl melak tlaxikoua niman yejon puntitos kualtsin pajpankistokej. Kachtopa, ijkuak ninomachtiaya Biblia, nonekiya ika yakaj manechpaleui, san ika aman san noselti nikchiua yejon, melak nikuelita ninoyektlalis para totlanechikoluan niman nitlanankilis. Noijki nikinpoua nochi toamatlajkuiloluan ika braille, tlen nikinpiya niman tlen yenkuikej, ¡melak nikuelita nikinpouas!”.

 Amatlajkuiloltin ika braille niman okseki tlen tikintekitiltiaj, kijtouaj yejuin: “Yejuin amatlajkuilojli xnonemaka, noxeloua ipan nochi tlaltikpaktli, tepaleuiya manasikamati Biblia niman nochiua ika tomin tlen kitemakaj tlaltikpakchanejkej ika nochi inyojlo”. Nochimej kipiyaj tlen ika kichikauaskej intlaneltokil, nochi yejuin ueli nochiua ipampa donaciones tlen nemejuamej nenkitemakaj ijkon ken nonextiaj ipan donate.dan124.com. ¡Melak tiktlasojkamatij pampa nenkuelitaj nenkitemakaskej!