Yowalti’ pan lunes 10 de octubre de 2022, miaʼ misiles rusos tatsi̱nikej pan sekin a̱ltepe̱mej de Ucrania. Iní̱n kichijkej iga o̱me días achto, Ucrania kisosoloj se̱ puente yej kisekantiá Crimea wan Rusia. Achto de iní̱n, sekin políticos kijtojkej iga Armagedón yáwiya asiti.

•   «Desde itiempo de Kennedy [presidente de Estados Unidos] wan kua ayo’ onoya misiles pan Cuba, ayá̱ tonoyaj pux na’ del Armagedón ken a̱man. [...] Nej nikijtowa iga awel monentiá armas tácticas nucleares sinke matsi̱nti el Armagedón» (Joe Biden, presidente de Estados Unidos, 6 de octubre de 2022).

•   «Nej nikijtowa iga iní̱n el Armagedón; iní̱n wel kisosolowa el planeta» (kijtoj Volodímir Zelenski —presidente de Ucrania— kua̱ kitajtankej te̱ wel panowa iga monentiá armas nucleares; BBC News, 8 de octubre de 2022).

 ¿Wel las armas nucleares kichi̱wa iga matsi̱nti Armagedón? ¿Te̱ kijtowa la Biblia?

 Ayá̱. Iga tajto̱l Armagedón ne̱sisan se̱ biáj pan la Biblia, pan Apocalipsis 16:16. Wan ayá̱  kijto̱jneki iga mamomijmikti̱kan a̱ltepe̱mej, kijto̱jneki se̱ guerra entre Dios wan «tekiwajmej de iní̱n ta̱jli» (Apocalipsis 16:14). Pan Armagedón Dios yawi kipolo̱ti nochi tekiwajmej de iní̱n ta̱jli (Daniel 2:44).

 Iga ximomachti ma̱j de te̱ yawi pano̱ti wan ta̱jli pan Armagedón, xiktajto̱lti tamachtilis «¿Te̱ kijto̱jneki Armagedón?».

 Ayá̱. Anka tekiwajmej de iní̱n ta̱jli yawij kinenti̱tij armas nucleares ma̱j tayakapan, pero Dios akikajte̱was iga Ta̱jli masosoliwi. La Biblia kijtowa:

•   «Ta̱jli onos iga nochipa» (Eclesiastés 1:4).

•   «Yej ye̱’nemij ka̱wiskej pan ta̱jli wan ompa mocha̱ntiskej iga nochipa» (Salmo 37:29).

 Pero, ken kijtowa las profecías de la Biblia wan yej a̱man nemi panowa kine̱xtiá iga tonokej pan se̱ tiempo yej pux aye̱kti (Mateo 24:3-7; 2 Timoteo 3:1-5). Ximomachti te̱ kijtowa la Biblia iga yej yawi-o’ pano̱ti kua̱ ximomachti la Biblia gratis.