1, 2. (a) Fakamaama e fakatai ha Iesu ke he pule he uluvine. (e) Fakatai fēfē he tala e tau mahani fakamokoi mo e fakaalofa noa?

KE HE taha pogipogi ne fano e tagata ne pule ke he uluvine ke he makete ke kumi tagata ke gahua ma haana. Ne lahi e tupe ne mavehe age e ia ke he tau tagata taane ti talia e lautolu. Ka kua manako e pule he uluvine ke loga foki e tau tagata gahua, ne lagaloga e liu atu haana he aho ke he makete ke kumi tagata foki. Ne mavehe a ia ke totogi e tau tagata oti ke he tupe ne kua felauaki ki ai. He matahiku he aho, ne fakapotopoto he pule gahua e tau tagata gahua ke age e tau totogi ha lautolu. He gahua a lautolu ke he aho katoa po ke taha e tulā, ne tatai oti e tau totogi ne age e ia ki a lautolu. Ka ko e tau tagata ne gahua ke he aho katoa ne kamata ke gugū, ti tala age e pule he uluvine: ‘Nakai kia talia e koe e totogi ne atu e au? Nakai kia ha ha ia au e tonuhia ke age e au e totogi ne manako au ke he tau tagata gahua oti haaku? Mahekeheke kia a koe ha kua totonu [po ke, fakamokoi] au?’​—Mataio 20:1-15.

 ² Ko e tala ha Iesu kua fakaako ki a tautolu e fakatonuaga aoga lahi hagaao ke he “fakaalofa noa” ha Iehova. ^[1] (Kikite tala he matahiku.) (Totou 2 Korinito 6:1.) Fēfē? Falu ne liga manamanatu ko e tau tagata ne gahua he aho katoa kua lata ke lahi atu e tupe ke he falu. Ka e fakakite he pule he uluvine e fakaalofa noa ke he tau tagata ne gahua vala magaaho he aho. Taha e pulotu ne talahau e mena nei hagaao ke he talahauaga “fakaalofa noa” ne fakaaoga he Tohi Tapu: “Ko e manatu katoa he talahauaga ko e mena fakaalofa noa moua noa, ko e mena foaki ke he tagata ne nakai gahua ki ai mo e nakai lata ke moua.”

3, 4. Ko e ha mo e fēfē e fakaalofa noa ne fakakite e Iehova ke he tau tagata oti kana?

³ Kua talahau he Tohi Tapu ki a tautolu ko e “mena foaki noa” e fakaalofa noa he Atua. (Efeso 3:7) Ha kua nakai maeke a tautolu ke omaoma mitaki katoatoa ki a Iehova, kua nakai lata a tautolu ke moua e totonu mai he Atua. Nukua lata a tautolu ke mamate. Pehē e Patuiki ko Solomona: “Nakai ni ha ha i ai ha tagata tututonu ke he lalolagi, kua eke e mahani mitaki, mo e nakai hala a ia.” (Fakamatalaaga 7:20) Fakamui, ne pehē e aposetolo ko Paulo: “Nukua hala e tau tagata oti kana, to nakai hoko ke he fakahekeaga mai he Atua,” ti “ko e mate ko e palepale ia he hala.”​—Roma 3:23; 6:23a.

⁴ Ha kua fakaalofa lahi mahaki a Iehova ke he tau tagata, ne fakafano e ia “hana Tama fuataha” ke mate ma tautolu. Ko e fakaalofa noa ne mua ue atu a ia. (Ioane 3:16) Pehē a Paulo ko Iesu mogonei “kua fakafoufou a ia ke he fakahekeaga mo e lilifu, ha ko e mamahi he mate, kia hoko kia ia e mate ha ko e tau tagata oti kana ke he fakaalofa noa he Atua.” (Heperu 2:9) Ē, “ko e moui tukulagi ko e mena foaki noa mai he Atua haia, ke he Iki ha tautolu ko Keriso lesu.”​—Roma 6:23e.

5, 6. Ko e heigoa e fakahikuaga ka pule e (a) agahala? (e) fakaalofa noa ki a tautolu?

⁵ Ko e ha ne agahala mo e mamate a tautolu? Pehē e Tohi Tapu “ko e tokotaha kua kautu ai e mate ha ko e hala he tokotaha.” Ha ko tautolu ko e tau hologa ha Atamu, kua nakai mitaki katoatoa mo e mamate a tautolu. (Roma 5:12, 14, 17) Ka e maeke agaia a tautolu ke fifili ke nakai pule, po ke taofi he agahala. Maeke fēfē e mena ia? Ka fakakite e tautolu e tua ke he poa lukutoto he Keriso, moua e tautolu e lagomataiaga mai he fakaalofa noa ha Iehova. Pehē e Tohi Tapu: “Ko e mena ne fakaloga ai e tau hala ne fakalahi ue atu i ai e fakaalofa noa. Kua tuga he kautu e hala kua hoko ke he mate, kia kautu pihia foki e fakaalofa noa ke he tututonu ke hoko ke he moui tukulagi, ha ko Iesu Keriso.”​—Roma 5:20, 21.

⁶ Pete ko e tau tagata agahala agaia a tautolu, nakai lata a tautolu ke fakaatā e agahala ke pule ki a tautolu. Ti ka taute e tautolu e mena hepe, ole a tautolu ki a Iehova ke fakamagalo. Hataki e Paulo a tautolu: “Ko e mena to nakai pule e hala kia mutolu; ha kua nakai nonofo a mutolu ke he fakatufono, ka ko e fakaalofa noa.” (Roma 6:14) Maeke fēfē mogoia a tautolu ke aoga mai he fakaalofa noa he Atua? Pehē a Paulo: “Ko e fakaalofa noa he Atua . . . Kua akonaki mai ai kia tautolu, kia tiaki e tautolu e tau mahani hepehepe, katoa mo e tau manako lahi he lalolagi, ka kia nonofo fakalatalata a tautolu mo e tututonu katoa mo e  mahani Atua ke he mouiaga nai.”​—Tito 2:11, 12.

7, 8. Ko e heigoa e kakano kua fakakite e fakaalofa noa ha Iehova ke he tau puhala “kehekehe”? (Kikite fakatino he kamataaga.)

⁷ Ne tohi he aposetolo ko Peteru: “Kia takitokotaha a mutolu mo e fekafekau ko e taha ke he taha ke he mena ia ni, ke fakalata ke he mena fakaalofa kua moua e ia, tuga ne tau fekafekau pule mitaki ke he tau mena fakaalofa kehekehe he Atua.” (1 Peteru 4:10) Ko e heigoa e kakano he fakaalofa noa ha Iehova ne fakakite ke he tau mena fakaalofa “kehekehe”? Kakano ai ko e tau mena uka ne liga fehagai mo tautolu he moui, to foaki e Iehova ki a tautolu e tau mena kua lata mo tautolu ke maeke ke fakauka. (1 Peteru 1:6) To foaki tumau e ia e tau mena kua lata tonu mo tautolu ke maeke a tautolu ke fahia he tau kamatamata takitaha.

⁸ Ne tohi he aposetolo ko Ioane: “Kua moua e tautolu oti kana mai hana katoatoaga, ko e fakaalofa noa foki ke lafilafi ke he fakaalofa noa.” (Ioane 1:16) Ha kua fakakite e Iehova e fakaalofa noa haana ke he tau puhala loga, kua moua e tautolu e tau monuina loga. Ko e heigoa e falu he tau monuina nei?

9. Lagomatai fēfē a tautolu mai he fakaalofa noa ha Iehova, ti maeke fēfē a tautolu ke fakakite e fakaaue ha tautolu ki ai?

⁹ Fakamagalo e Iehova e tau agahala ha tautolu. Fakaaue ke he fakaalofa noa ha Iehova kua fakamagalo e ia e tau agahala ha tautolu. Ka e taute pihia e ia kaeke ni ke fakatokihala mo e matutaki a tautolu ke totoko fakamalolō ke he tau manako agahala ha tautolu. (Totou 1 Ioane 1:8, 9.) Fakamaama e Paulo ke he tau Kerisiano fakauku he vahā haana e puhala ne fakamagalo e Iehova e tau agahala. Pehē a ia: “Ko ia [Atua] kua laveaki a tautolu mai he pule he pouli, ti ta mai a tautolu ke he kautu he hana Tama fakahele; Ha ia ia kua moua ai e tautolu e lukutoto ke he hana toto, ko e fakamagaloaga he tau hala.” (Kolose 1:13, 14) Fakaaue lahi a tautolu ke he fakaalofa hofihofi he Atua ti kua manako a tautolu ke fakaheke a ia. Ha kua fakamagalo e Iehova e tau agahala ha tautolu, maeke foki a tautolu ke moua e tau monuina homo ue atu foki.

10. Ko e heigoa ka moua e tautolu ha ko e fakaalofa noa he Atua?

¹⁰ Maeke a tautolu ke moua e fakafetuiaga mafola mo e Atua. Nakai mitaki katoatoa a tautolu, ti mai he mogo ne fanau a tautolu, ko e tau fī he Atua a tautolu. Ka e pehē a Paulo: “Kaeke kua fakafeilo a tautolu mo e Atua ke he matulei he Tama hana, ka ko e tau fi a tautolu.” (Roma 5:10) Ha ko e lukutoto, maeke a tautolu ke fakafeilo ke he Atua, kakano ai kua maeke a tautolu ke mafola mo ia ti eke mo tau kapitiga haana. Fakamaama e Paulo e mena nei mo e puhala ne matutaki ai ke he fakaalofa noa ha Iehova  he pehē a ia ke he tau matakainaga fakauku haana: “Ha kua talahaua tututonu a tautolu ke he tua, kua ha ha ia tautolu e mafola mo e Atua ha ko e Iki ha tautolu, ko Iesu Keriso; Ko ia foki kua moua mai ai e tautolu e takitakiaga ke he fakaalofa noa nai, kua tutu ai a lautolu ke he tua.” (Roma 5:1, 2) Fakaaue mooli a tautolu ke moua e fakafetuiaga mafola mo Iehova!

11. Tamai fēfē e lautolu ne fakauku e ‘tau mamoe kehe’ ke he tututonu?

¹¹ Maeke a tautolu ke tututonu ki mua he Atua. Ko e perofeta ko Tanielu ne tohi he magahala he fakaotiaga, “ko lautolu foki ne iloilo,” kakano ai to tamai e lautolu ne fakauku e “tau tagata tokologa ke mahani tututonu.” (Totou Tanielu 12:3.) Taute fēfē e lautolu ne fakauku e mena ia? Fakamatala e lautolu e tala mitaki ti fakaako e tau fakatufono ha Iehova ke he tau miliona he ‘tau mamoe kehe.’ (Ioane 10:16) Lagomatai e lautolu e tau mamoe kehe ke manamanatu ke he tututonu ki mua he Atua, ka e maeke ni ha ko e fakaalofa noa ha Iehova. Fakamaama e Paulo: “Kua talahaua tututonu noa ke he hana [Atua] fakaalofa noa, ha ko e lukutoto a Keriso Iesu.”​—Roma 3:23, 24.

12. Matutaki fēfē e liogi mo e fakaalofa noa he Atua?

¹² Maeke a tautolu ke fakatata ke he Atua puhala he liogi. Ha ko e fakaalofa noa ha Iehova, maeke a tautolu ke liogi ki a ia. Fakahigoa e Paulo e nofoaiki ha Iehova ko e “nofoaiki he fakaalofa noa,” ti uiina e ia a tautolu ke moua e fakamalolo he vagahau. (Heperu 4:16a) Maeke a tautolu ke liogi ki a Iehova he ha magaaho puhala ia Iesu. Ko e lilifu mooli anei! Pehē a Paulo: “Kua moua ai e tautolu e fakamalolo, mo e takitakiaga ha i ai e fakamanavalahi, ke he tua kia ia.”​—Efeso 3:12.

13. Maeke fēfē e fakaalofa noa ke “lagomatai mai ai ke he aho kua lata ai”?

 ¹³ Maeke a tautolu ke moua e lagomatai he magaaho tonu. Fakamalolō e Paulo a tautolu ke liogi ki a Iehova he ha magaaho kua lata, “kia fakaalofa mai ai a ia kia tautolu, kia moua foki e fakaalofa noa ke lagomatai mai ai ke he aho kua lata ai.” (Heperu 4:16e) Ka feleveia a tautolu mo e tau kamatamata po ke tau mena vihi he tau momoui, maeke a tautolu ke olelalo ki a Iehova ma e lagomatai. To tali e ia e tau liogi ha tautolu pete he nakai lata a ia ke taute pihia. Fa fakaaoga e ia e tau matakainaga ha tautolu ke lagomatai a tautolu. Tali e Iehova e tau liogi ha tautolu ke “talahau atu e tautolu mo e fakamalolo, Ko e Iki, ko e haku a lagomatai haia, nakai matakutaku au ke he tau mena ke eke he tau tagata kia au.”​—Heperu 13:6.

14. Lagomatai fēfē he fakaalofa noa ha Iehova e tau loto ha tautolu?

¹⁴ Maeke a tautolu ke moua e mafanatia ke he tau loto ha tautolu. Ko e monuina lahi kua fakamafana e Iehova a tautolu he ha magaaho kua fakaatukehe lahi mahaki e tau logonaaga ha tautolu. (Salamo 51:17) He matematekelea e tau Kerisiano i Tesalonia ha ko e favaleaga, ne tohi e Paulo: “Ko e Iki ni ha tautolu ko Iesu Keriso, katoa mo e Atua ko e Matua ha tautolu, ko ia kua fakaalofa mai kia tautolu, mo e foaki mai e fakamafanaaga tukulagi, mo e amaamanaki mitaki ke he Fakaalofa noa, Kia fakamafana e ia ha mutolu a tau loto, mo e fakatumau a mutolu.” (2 Tesalonia 2:16, 17) Mafanatia mooli ke iloa ko e fakaalofa noa ha Iehova ati fakaalofa mo e leveki e ia a tautolu!

15. He fakaaue ke he fakaalofa noa he Atua, ko e heigoa e amaamanakiaga kua moua e tautolu?

¹⁵ Moua e tautolu e amaamanakiaga he moui tukulagi. Ha ko e tau tagata agahala a tautolu, nakai moua e tautolu e amaamanakiaga ka nakai fai lagomatai a Iehova. (Totou Salamo 49:7, 8.) Ka kua foaki mai e Iehova ki a tautolu e amaamanakiaga homo ue atu. Ko e heigoa e mena ia? Pehē a Iesu: “Ko e hanai foki hana finagalo ne fakafano mai au, kia takitokotaha a lautolu ne kitekite ke he Tama, mo e tua kia ia, ke moua e ia e moui tukulagi.” (Ioane 6:40) Ti moua e tautolu e amaamanakiaga he moui tukulagi ha ko e fakaalofa noa ha Iehova. Pehē a Paulo: “Ko e fakaalofa noa he Atua kua ta mai ai e fakamouiaga kua fakakite mai ke he tau tagata oti kana.”​—Tito 2:11.

16. Fakaaoga fakahehē fēfē he tau Kerisiano fakamua atu e fakaalofa noa he Atua?

¹⁶ Moua e tautolu loga e monuina ha ko e fakaalofa noa ha Iehova. Ka e nakai lata a tautolu ke fakaaoga fakahehē e totonu haana, kakano ke kumi puhala ke agahala. Ke he tau Kerisiano fakamua atu, ha ha i ai e falu ne lali ke “liu . . . e fakaalofa noa he Atua ha tautolu ke he mata kakana [po ke, fakalialia].” (Iuta 4) Ko e tau Kerisiano nakai fakamooli nei ne tuga kua manatu a lautolu na maeke a lautolu ke agahala ti fakamagalo tumau e Iehova a lautolu. Lali a lautolu ke taute e tau matakainaga ke fakalataha ke he tau agahala ha lautolu. Ko e ha tagata he vahā nei kua “kupu kelea foki ke he Agaga he fakaalofa noa.”​—Heperu 10:29.

17. Ko e heigoa e fakatonuaga malolō ne foaki e Peteru?

¹⁷ Ne eke lagatau a Satani he taute e falu Kerisiano he vahā nei ke manamanatu kua maeke a lautolu ke agahala ti fakamagalo  noa e Iehova a lautolu. Mooli kua makai a Iehova ke fakamagalo e tau tagata agahala ne fakatokihala; ka e amanaki a ia ki a tautolu ke totoko e tau manako agahala ha tautolu. Ne omoomoi e Iehova a Peteru ke tohi: “Hanai, ko e tau fakahelehele na e, kia fakaeneene a mutolu kia mutolu, ha kua iloa fakamua e mutolu, neke hekeheketakina a mutolu ke he hehe he tau tagata hemu, ti veveli ai a mutolu mai he mena kua tumau ai a mutolu. Ka kia tutupu a mutolu ke he fakaalofa noa mo e maama ke he Iki ha tautolu, ko e Fakamoui ia ko lesu Keriso.”​—2 Peteru 3:17, 18.

18. Ha ko e fakaalofa noa ha Iehova, ko e heigoa e tau matagahua ha tautolu?

¹⁸ Loto fakaaue lahi a tautolu ke he fakaalofa noa ha Iehova. Ko e mena ia kua lata a tautolu ke fakaaoga e tau mena fakaalofa ha tautolu ke fakaheke a Iehova mo e ke lagomatai e falu. Fai fakalagoaga a tautolu ki a lautolu. Maeke fēfē a tautolu ke fakaaoga e tau mena fakaalofa ia? Pehē a Paulo: “Kua kehekehe foki e tau mena kua tufatufa mai kia tautolu he fakaalofa noa kua foaki mai kia tautolu . . . Po ke [fekafekauaga], kia eke e gahua he [fekafekau]; po ke akoako, kia fakaako atu ai a ia. Po ke tomatoma, kia tomatoma ai a ia; . . . ko ia kua eke mena fakaalofa, kia eke ai mo e fakamakai.” (Roma 12:6-8) Ha ko e fakaalofa noa ha Iehova, moua e tautolu e matagahua ke eketaha ke he fekafekauaga, fakaako e Tohi Tapu mo e falu, atihake e tau matakainaga ha tautolu, mo e fakamagalo e tau tagata ne liga fakaita a tautolu.

19. Ko e heigoa e matagahua ha tautolu ka kumikumi he vala tala ka mui mai?

¹⁹ Ko lautolu ne kua fakamonuina aki e fakaalofa noa ha Iehova, kua lata a tautolu ke fakalagalaga ke taute e tau mena oti ke “talahau fakatonu atu . . . e tala mitaki he fakaalofa noa he Atua.” (Gahua 20:24) To kumikumi a tautolu ke he matagahua nei he vala tala ka mui mai.