Ne tata lahi a Bebe ke he matua taane haana. Ko e tala fakamafana ia ne talahau he taha kapitiga he magafaoa, ka e logona e Bebe ne mamahi e tau kupu ia ti nakai fakamafana. “Nakai fai kakano mitaki e mate haana,” he fatiaki lagaloga e ia ki a ia ni. Kitia maaliali ai, he magaaho ne tohi e Bebe e mena ne tupu he taha tohi he loga e tau he mole, kua maanu agaia a ia.

Ne kitia e Bebe na leva ke mafanatia ka maanu, ti mua atu ka fakafetui tata lahi mo ia kua mate. I loto he Tohi Tapu, ne felauaki e fakamaamaaga hagaao ke he mate “ko e fi fakamui.” (1 Korinito 15:26) Kua fakamomoko lahi he mate e tau momoui ha tautolu mo e nakai fai mena ke taofi aki, mua atu ka nakai amanaki ke pihia, ti galo kehe a lautolu ne ofania e tautolu. Lauia a tautolu oti he matematekelea lahi mahaki nei. Ti nakai ko e mena ke ofo ai ka logona hifo e tautolu kua nakai fahia ke fehagai ke he mate mo e ka mole ai.

Liga manamanatu a koe: ‘Fiha e leva he maanu? Maeke fēfē he tagata ke fahia mo e maanu? Maeke fēfē au ke fakamafana a lautolu ne maanu he mate e fakahele? Fai amaamanakiaga nakai ma e tau fakahele ha tautolu ne kua mamate?’