“Kua kamatamata he tau aho oti e fakauka he taane mo e hoana. Nakai aoga lahi e fakauka he magaaho ne nofo tokotaha a koe, ka e latatonu ma e kautū he fakamauaga.”​—John.

•  Ko e ha kua lata a koe ke fakauka?

•  Fakakite fēfē e koe e fakauka?

•  “Mua atu e fakauka”

• Kitia maali e tau kūkū he hoa haau he magaaho ka mau.

  “Fai magaaho he mole e fakamauaga, kua mukamuka ke kitia e tau aga nakai mitaki he hoa haau. Ka tupu mai e aga kelea ia ti mukamuka ke galo e fakauka.”​—Jessena.

• Ka nakai fakauka to vagahau a koe mo e nakai manamanatu.

  “Mafiti lahi au he falu magaaho ke talahau e tau logonaaga haaku. Ane mai kua lahi e fakauka haaku, maeke ia au ke manamanatu mo e nakai liu ke talahau foki ha mena.”​—Carmen.

  Pehē e Tohi Tapu: “Kua fakauka e fakaalofa, to totonu.” (1 Korinito 13:4) Latatonu ni a laua ne fefakaalofaaki ke fakakite e fakauka. Ka e nakai pihia tumau. “Tuga e taha aga mitaki,” ne talahau e John, “mukamuka ke nakai fakauka. Lahi e gahua ke fakatumau e fakauka.”

• Ka fai mena tupu fakaofo to kamatamata e fakauka haau.

  Fakatai: Vagahau kelea e hoa haau ki a koe. Ko e manako haau ke liu tali atu mo e vagahau kelea.

  Matapatu fakaakoaga he Tohi Tapu: “Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.”​—Fakamatalaaga 7:9.

  Fakakite fēfē e fakauka: Fakamaoki. Ato tali atu, lali ke maama e tala he hoa haau ko e heigoa e kakano ne vagahau pihia a ia. “Laulahi a tautolu ne tali atu ke he manatu ha tautolu ni ka e nakai maama e kakano ne vagahau pihia e hoa,” he talahau he tohi Fighting for Your Marriage.

  Pete ne lali e hoa haau ke fakaita a koe, maeke a koe ke fakamitaki e lekua he fakakite e fakauka he nakai taui atu. “Ka nakai fai gaafi ti mate ai e afi,” ne talahau he Tohi Tapu.​—Tau Fakatai 26:20.

  “Ka kamata a koe ke logona hifo ko e fī e hoana haau, liu ke manatu ko e ha ne ofania e koe a ia ti mafiti ke taute e taha mena mitaki ma haana.”​—Ethan.

  Manamanatu ki ai:

  • Tali atu fēfē a koe ke he hoa haau ka talahau po ke taute e ia e taha mena ke ita a koe?

  • Fakakite fēfē e koe e fakauka lahi ka liu e mena nei ke tupu?

• Magaaho ka tupu tumau e lekua ti kamatamata e fakauka haau.

  Fakatai: Fakatali a koe mo e ita ke he hoa ne fa mule tumau.

  Matapatu fakaakoaga he Tohi Tapu: “Kia fefakaukaaki a mutolu, mo e fefakamagaloaki.”​—Kolose 3:13.

  Fakakite fēfē e fakauka: Mua e leveki he fakamauaga haau mai he tau manako ni haau. Hūhū hifo ki a koe, ‘To lagomatai nakai po ke fakamamahi he faguna tumau ke he lekua nei e fakafetuiaga ha maua?’ Manatu foki “ko e tau mena loga kua hehe ai a tautolu oti.” (Iakopo 3:2) Kakano kua loga foki e mena haau ke gahua ki ai.

  “Kua mua e fakauka haaku he falu magaaho ke he kapitiga ka e nakai ke he taane. Liga pihia he fakalataha tumau au mo e taane haaku ti kitia e tau kūkū haana. Ka fakauka au, ko e fakakite a ia he fakaalofa mo e fakalilifu​—ko e mena ne mua ke he fakamauaga haaku.”​—Nia.

  Manamanatu ki ai:

  • Fakauka nakai a koe ke he tau kūkū he hoa haau?

  • Fakakite fēfē e koe e fakauka lahi he vahā i mua?