Ko e Fenoga he O Hake he Vailele ko Maroni
He mamao mai he tau lavelave mo e hohā he moui he taone, ne nonofo ai e tau magafaoa, tau vagahau, mo e tau motu kehekehe he vaouhi he Amazon i South America. Ia Iulai 2017, toko hogofulu ma tolu e Tau Fakamoli a Iehova ne tuku fenoga mo e o hake a lautolu he vailele ko Maroni, mo e tau lālā he faahi uta i French Guiana. Ko e foliaga ha lautolu? Ke ta atu e ogo ke he amaamanakiaga he Tohi Tapu kia lautolu e tau tagata ne nonofo he vailele.
Tauteute ke Lata mo e Fenoga
Taha e mahina ato fakahoko e fenoga ke hogofulu ma ua e aho, ko lautolu oti ne tauteute ke o atu ne fono auloa. “Kua fakaako a mautolu ke he matakavi ia mo e vahā fakamua, mo e puhala ke tauteute foki a mautolu ka o atu he fenoga,” he talahau e Winsley. Igatia e tagata mo e mena malu ke tuku aki e mohega tautau mo e taenamu. Lagaua e o atu he vakalele e fenoga mo e loga foki e tau matahola ka o he tau vaka ne fai enisini.
Ko Claude mo Lisette
Fēfē e logonaaga ha lautolu ne kua uiina ke o atu he fenoga? Ko Claude mo Lisette ne momotua a laua, kua mafiti ke talia e uiina. “Kua fiafia lahi au ka e matakutaku foki he logona e tau tala hagaao ke he hagahagakelea he tafe he vailele,” ne talahau e Claude. Fai tupetupe foki a Lisette, ne pehē a ia: “To maeke nakai au ke vagahau Amerindian.”
Manatu pihia foki a Mickaël, ko ia taha ka fano foki. “Nakai iloa lahi e mautolu e magafaoa Wayana, ti fano au kumikumi e initanete mo e fakaako e falu a kupu ke fakafeleveia he vagahau ha lautolu.”
Ko Shirley mo e haana taane ko Johann, ne tohi hifo e tau vagahau kehekehe ne vagahau he tau tagata ne nonofo he vailele. “Moua e mautolu e tau vitiō mai he jw.org ke he tau vagahau nei ha lautolu, mo e moua foki e tohi mo e tau kupu mukamuka he vagahau Wayana,” ne talahau e ia.
Hohoko atu ke he tau tagata Amerindian
He Aho Ua ia Iulai 4, ne o atu e matakau he vakalele mai i Saint-Laurent du Maroni mo e lele atu ki Maripasoula, ko e taone tote he vaouhi a French Guiana.
Fa e aho ne o hake ai e matakau he tau vaka ne fai enisini ke he tau maaga ikiiki i luga he Maroni. Ko Roland ko ia ko e taha he matakau ne pehē a ia “Kitia e lautolu e tau Amerindian kua fia iloa lahi a lautolu ke he tau tala Tohi Tapu. Loga e tau hūhū ha lautolu mo e manako foki ke fakaako Tohi Tapu mo mautolu.”
He taha maaga ne feleveia a Johann mo Shirley mo e hoa mau ne kua taha he magafaoa ha laua ne kua tamate ni e ia a ia. “Ne fakakite e maua e vitiō A Native American Finds His Creator,” he jw.org ne talahau e Johann. “Kua mafanatia a laua he vitiō nei. Mai e laua e meli hila ke matutaki a maua ki a laua.”
Ko e matakavi fakahiku ne o ki ai ko Antécume Pata. Fakaatā he pule he maaga e Tau Fakamoli ne kua mategūgū, ke tautau hake ha lautolu a tau mohega tautau he mena ne lata mo e tau tagata o fano. Koukou foki a lautolu he vailele tuga e tau tagata ne nonofo ai he kavi ia.
O atu e matakau ke he maaga ko Twenké, mo e latatonu mo lautolu he maaga ne kua momoko ha kua mate e tagata ne ofania lahi e lautolu. Ko e taha takitaki he fenoga ne higoa ko Éric ne pehē: “Kua fakaatā he pule he maaga a lautolu ke o atu mo e fakamafana a lautolu ne kua momoko. Fiafia lahi e pule mo e haana magafaoa ke he tau kupu ne totou e mautolu ki a lautolu mai he Tohi Tapu Wayana. Fakakite foki e mautolu e tau vitiō ne talahau e maveheaga mai he Tohi Tapu hagaao ke he liu tu mai.”
O Atu ki Grand-Santi mo Apatou
Ko e vala nei he fenoga ne lele hifo he vakalele hafa e tulā mai i Maripasoula ke he taone tote ko Grand-Santi. He Aho Ua mo e Aho Lotu, ne fakamatala he tau matakainaga e ogo he Tohi Tapu ke he tau tagata he matakavi ia. He Aho Tuloto, ne liu e fenoga he tau matakainaga fakatoka atu he vaka mo e o hifo he vailele ko Maroni—lima mo e hafa e matahola ato hokohoko atu ke he maaga ko Apatou.
Ko e Vailele ko Maroni mo e vaouhi i Amazon he vahāloto ha Maripasoula mo Grand Santi
He Aho Faraile, ne o atu e matakau he fenoga ke he tau maaga ne nonofo e tau tagata Maroon. Ko lautolu nei ne tupu mai he tau tupa i Aferika ne tamai ki South America he magaaho ne pule e tau motu kehekehe ki a Suriname. Ne fakatū he Tau Fakamoli e fale la lahi he vaouhi, mo e uiina e lautolu e tau tagata oti ke o mai ke he feleveiaaga. Pehē a Claude: “Fiafia lahi a mautolu he tokologa e tau tagata ne o mai. Ko e uiina laia e mautolu a lautolu he pogipogi ia!” Ko Karsten, ko e fano laia a ia he fenoga nei, ko ia ne taute e lauga he vagahau Aukan ne mataulu “Hanei ni Kia e Moui?” Hivagofulu ma taha e tagata ne o mai he tau maaga ke he feleveiaaga.
“Manako a Mautolu ke Liliu mo e Taute Foki!”
Magaaho nei, kua liliu e tau matakainaga ne o he fenoga ki Saint-Laurent du Maroni. Fiafia lahi a lautolu he fanogonogo e tau tagata he tau maaga. Mo e talia foki e lautolu loga e tau tohi mo e kitekite e tau vitiō ne taute he Tau Fakamoli a Iehova.
“Nakai fai kupu ke fakamaama e fiafia lahi haaku he fano he fenoga nei,” he talahau e Lisette. Pehē a Cindy: “Ka liu ke taute foki, fano au. To maama e koe e fiafia ka fano foki a koe!”
Ko e fenoga nei ne kua manako e falu matakainaga ke liliu. “Manako a mautolu ke liliu mo e taute foki!” ne talahau e Mickaël. Ko Winsley, kua fano nofo i Saint-Laurent du Maroni. Ko Claude mo Lisette, ne manatu a laua ke nonofo i Apatou.