Tjhidela KuZimu

“Sokulunga [Jehova], . . . Uyangazi”

“ABUKHO ubudisi umuntu angaba nabo ukudlula ukwazi bona akekho umuntu onendaba naye namtjhana omzwisisako.” * Nawe wakhe wazizwa ngendlela efanako? Wakhe wazizwa ngendlela le, bona akekho umuntu onendaba nawe namtjhana okuzwisisako? Nengabe kunjalo, ungafumana induduzo ekwazini bona: UJehova ubakhathalela khulu abakhulekeli bakhe kangangobana uyakubona koke okwenzeka kibo njengombana baragela phambili nokuphila kwabo kwaqobe langa. Amezwi kaDavidi weRhalani 139 ayasiqinisekisa ngeqinisweli.

Aqiniseka bona uZimu unekareko kuye, uDavidi wathi: “Sokulunga, ungiphendlisisile, uyangazi.” (iVesi 1) UDavidi usebenzise umfanekiso omuhle la. Ibizo lesiHebheru elithi ‘phendlisisa’ liqalise ekwembeni ilitje (Jobhi 28:3), ukuhlola inarha (AbaHluleli 18:2), namtjhana ukufuna, uphendlisise ngamaqiniso wecala lomthetho. (Duteronomi 13:14). Kwamambala, uJehova usazi kuhle khulu kwanga uhlole zoke iingcenye neendawo zokuphila kwethu ezifihlekileko. UDavidi usifundisa bona uZimu unekareko yomuntu mathupha eencekwini zakhe. Uyazihlolisisa begodu azi ngayinye yazo.

UDavidi uyanaba ngendaba kaZimu yokuphendlisisa uthi: “Wena ungazi ukusuka nokuhlala, ulemuka imikhumbulo yami esemajukujukwini.” (iVesi 2) Ngomnqondo lo, uJehova ‘usemajukujukwini,’ uhlala emazulwini. Nanyana kunjalo, uyazi nesihlala phasi, mhlamunye ngemva kwelanga elide, nalokha nesivukako ekuseni siragela phambili senza iimsebenzethu yangamalanga. Godu wazi iimcabango, iimfiso neemnqophwethu. UDavidi wazizwa asaba ngombana uJehova bekamhlolisisa? Ngokuhlukileko, wakuthabela ukuphendlisiswa okunjalo. (amaVesi 23, 24) Kubayini kunjalo?

UDavidi gade azi bona uJehova uneensusa ezihle nekaphendlisisa abakhulekeli Bakhe. UDavidi aqalise kilokho, watlola: “Uhlolisisa ukukhamba kwami nokulala kwami, wazana neendlela zami zoke.” (iVesi 3) Qobe langa, uJehova ubona ‘zoke iindlela zethu’—iimtjhaphwethu ngitjho neemsebenzethu emihle. Lokho kutjho bona udzimelele kokumbi nofana kokuhle? Ibizo lesiHebheru elithi “uhlolisisa” lingatjho “ukusefa” namtjhana “ukuyela,” ngendlela umlimi ayela ngayo okungafunekiko eenthorweni ezihle. Amezwi athi “wazana neendlela zami zoke” atjhugulula ibizo lesiHebheru elingatjho “ukuthabela.” Nekahlola izinto iinceku zakhe ezizikhulumako nezizenza qobe langa, uJehova uthabela okuhle. Kubayini kunjalo? Uyayithabela iimzamo yazo yokumthabisa.

IRhalani 139 lisifundisa bona uJehova ubakhathalela khulu abakhulekeli bakhe. Uyabaphendlisisa abe abaqale njengombana baragela phambili namaphilwabo waqobe langa. Ngalokho uyayazi iimraro abaqalana nayo, begodu uyabuzwisisa ubuhlungu bomcabango nobehliziyo okungabangelwa miraro le. Awuzizwa utjhukumiseleka bona ukhonze uZimu okhathalela kangako? Nengabe kunjalo, naku ongaqiniseka ngakho: UJehova angekhe “alibale umsebenzi enawenzako nethando enalitjengisako ngebanga lakhe.”—KumaHebheru 6:10.

[Umtlolo waphasi]