NgoJulayi nango-Arhostesi 2020 kuzokuba ngekokuthoma bona abafowethu nabodade ephasini mazombe babukele umhlangano wesifunda ngesikhathi sinye. Bona lokhu kwenzeke, kutlhogeke ukuthi kutjhugululelwe ihlelo lomhlangano emalimini angaphezulu kwama-500. Ngokujayelekileko, kungathatha umnyaka namkha ngaphezulu ukuhlela nokwenza umsebenzi onjengalo. Kodwana ngebanga lokuqubuka kwengogwana ye-Coronavirus, kutlhogeke bona abatjhugululi batjhugulule ihlelo lomHlangano wesiFunda wango-2020 onesihloko esithi “Hlalani Nithabile”! ngesikhathi esingaphasi kweenyanga ezine.

 Umnyango wezokuTjhugulula nomnyango wezokuThenga wePhasi Loke osemzimKhulu waboFakazi bakaJehova yasiza bona umsebenzi omkhulu lo ube yipumelelo. Umnyango wezokuTjhugulula walemuka ukuthi abatjhugululi batlhoga amathulusi angeziweko bona benze umsebenzi lo, njengemibhobho esezingeni eliphezulu. Yeke umnyango wezokuThenga wePhasi Loke wenza amalungiselelo wokuthenga imibhobho eyi-1 000 bewahlela nokuthi ithunyelwe eendaweni ezingaba ma-200.

 Bona kongiwe imali, imibhobho le yathengwa ngobunengi, yabekwa endaweni yinye, beyithathwa lapho bona ithunyelwe kwezinye iindawo. Ngebanga lokuthi sayithenga ngobunengi, umbhobho munye wagcina sele ubiza imali engaba yi-R2 800 nakuhlanganiswa nemali yokuyithumela kwezinye iindawo—lokho kwenza bona songe imali engafikelela emaphesendeni angaphezulu kwama-20 nawumadanisa nemali ebekufuze siyibhadele.

 Kwatlhogeka bona umnyango wezokuThenga wePhasi Loke uthenge begodu uthumele imibhobho le hlangana no-Apreli noMeyi 2020—ngesikhatheso amarhwebo amanengi bewangasebenzi kuhle ngebanga le-Coronavirus. Nanyana kunjalo, kwathi nakuphela uMeyi, inengi lama-ofisi wabatjhugululi, ama-ofisi wamagatja nezinye iindawo zabatjhugululi besele ziwafumene amathulusi eziwatlhogako bona zikghone ukwenza umsebenzi lo.

 UJay Swinney owengamele umnyango wezokuThenga wePhasi Loke uthi: “Iminyango eminengi yeBethel yabambisana kuhle khulu namarhwebo ebesithenga kiwo. Mumoya kaJehova ocwengileko kwaphela osisize ukuthi senze umsebenzi lo ngepumelelo begodu songe imali bona sisekele umsebenzi kaZimethu.”

 UNicholas Ahladis, osebenza emnyangweni wezokuTjhugulula, yena uthi: “Abatjhugululi ebegade bavalelekile ngebanga lengogwana ye-Coronavirus bakhuthazeka khulu nabafumana imibhobho le. Nanyana bebangasebenzeli endaweni eyodwa, bakghona ukusebenzisana bona batjhugulule bebagadangise iinkulumo, amadrama neengoma ngamalimi angaphezulu kwama-500.”

 Lo ngomunye wemisebenzi eyenziwako bona abafowethu nabodade bafumane ihlelo lomHlangano wesiFunda wango-2020 onesihloko esithi “Hlalani Nithabile”! Ukunikela kwenu ngesandla esivulekileko nisebenzisa i-donate.dan124.com namanye amahlelo wokunikela kusize khulu ukuthi sikghone ukuthenga izinto ezitlhogekako zokwenza umsebenzi lo.