BHAYIBHILINAKHO, amaRhalani 83:18 atjhugululwe njani? I-New World Translation of the Holy Scriptures ilibeka bunje iveseli: “Bona abantu bazi, wena ibizo lakho elinguJehova, wena wedwa ungoPhakemeko ephasini loke.” IimBhayibhili ezinengana zilitjhugulula ngendlela efanako iveseli. Nokho, iimBhayibhili ezinengi zilikhiphile ibizo lakaJehova, zalijamiselela ngeziqu ezifana nokuthi “Kosi” namtjhana “Somandla.” Khuyini okufuze iberegiswe evesineli? Sisiqu nanyana libizo elithi Jehova?

Ibizo lakaZimu litlolwe ngesiHebheru

Iveseli likhuluma ngebizo. EsiHebherwini sokuthoma lapho iimBhayibhili ezinengi zithethwe khona, kunebizo eliqakathekileko elivela evesineli. Ngamaledere wesiHebheru lipeledwa bunje, יהוה (YHWH) NgesiNdebele, indlela ejayelekileko yokubiza ibizweli ngu “Jehova.” Ibizweli livela evesini elilodwa leBhayibhili na? Awa. Liyavela eMitlolweni yesiHebheru sokuthoma iinkhathi ezipheze zibe yi-7 000!

Liqakatheke kangangani ibizo lakaZimu? Cabangela umthandazo osibonelo uJesu Krestu awunikelako. Uthoma nje: “Baba Wethu osezulwini: Ibizo lakho alicwengiswe.” (Matewu 6:9) Ngokukhamba kwesikhathi uJesu wathandaza kuZimu wathi: “Baba, yenza bona ibizo lakho lidunyiswe!” Aphendula umthandazo kaJesu, uZimu wakhuluma asezulwini wathi: “Sengilidumisile; ngisazokulidumisa godu.” (Jwanisi 12:28) Ngokukhanyako, ibizo lakaZimu liqakatheke khulu. Kubayini-ke, abanye abatjhugululi balikhiphile ibizweli eemBhayibhilini zabo begodu balijamiselela ngeziqu?

Kubonakala kunamabanga amabili aqakathekileko. Kokuthoma, abanengi bathi ibizwelo akukafuzi bona liberegiswe ngombana indlela yokuthoma yokulibiza ayaziwa namhlanjesi. IsiHebheru samandulo sasitlolwa ngaphandle kwabokamisa. Ngalokho, akekho noyedwa namhlanjesi ongatjho ngokunqophileko bona abantu beenkhathini zeBhayibhili gade balibiza njani ibizo, YHWH. Nokho, lokhu kufuze bona kusikhandele ekuberegiseni ibizo lakaZimu? Ngeenkhathi zeBhayibhili, ibizo Jesu kungenzeka bona bebalibiza nje, Yeshua namtjhana Yehoshua—akekho oqinisekako. Nokho, abantu ephasini zombelele namhlanjesi baberegisa iindlela ezihlukahlukeneko zebizo lakaJesu, balibiza ngendlela ejayelekileko eenlimini zabo. Abanakho ukuzaza ekuberegiseni ibizwelo ngombana bangayazi indlela elalibizwa ngayo ekhulwini lokuthoma. Ngokufanako, nengabe uvakatjhele enarheni etjhili, ungafumana bona ibizo lakho libizwa ngendlela ehlukileko ngelinye ilimi. Ngikho ukungaqiniseki ngendlela ibizo lakaZimu egade libizwa ngayo emandulo kungasilo ibanga lokobana singaliberegisi.

Ibanga lesibili elinikelwako ekususeni ibizo lakaZimu eBhayibhilini lihlanganisa isiko lakade lamaJuda. Amanengi wawo akholelwa bona ibizo lakaZimu akukafuzi bona libizwe. Kusetjhatjhalazini bona ikolelo le isekelwe ekuberegiseni kumbi umthetho weBhayibhili othi: “Ungaliphathi ngelize ibizo lakaJehova uZimakho, ngombana uJehova angekhe angamnikeli isibetho oliphatha ngelize ibizo lakhe.”—Eksodosi 20:7.

Umthetho lo ukhandela ukuberegiswa kumbi kwebizo lakaZimu. Kodwana lokho kutjho bona ukhandela ukuberegiswa ngehlonipho kwebizo lakhe? Awa, akusinjalo. Abatloli beBhayibhili yesiHebheru (“iTastamende Elidala”) boke gade kumadoda athembekileko aphila ngoMthetho uZimu awunikela ama-Israyeli wendulo. Nokho, baliberegisa qobe ibizo lakaZimu. Isibonelo, balifaka emarhubweni amanengi abhinwa siqubuthu sabakhulekeli bakaZimu. UJehova uZimu walayela abakhulekeli bakhe bona babize ibizo lakhe, begodu abathembekileko balalela. (Joweli 2:32; IZenzo 2:21) Ngikho amaKrestu namhlanjesi anganakho ukuzaza ekuberegiseni ibizo lakaZimu ngehlonipho, njengombana kwenza uJesu.—Jwanisi 17:26.

Ekujamiseleleni ibizo lakaZimu ngeziqu, abatjhugululi beBhayibhili benza umtjhapho omkhulu. Benza ngasuthi uZimu akanabuntu begodu ulikhuni, kungilapho iBhayibhili ikhuthaza abantu bona “batjhidelane noJehova.” (AmaRhalani 25:14) Cabanga ngomnganakho oseduze. Ningatjhidelana kangangani nengabe awulazi ibizo lomnganakho? Ngokufanako, nengabe bayakutjhalazela ukuberegisa ibizo lakaZimu, uJehova, bangatjhidela njani hlanu Kwakhe? Ngaphezu kwalokho, nengabe abantu abaliberegisi ibizo lakaZimu, batlhoga ilwazi lalokho elikutjhoko. Litjho ukuthini ibizo lakaZimu?

UZimu ngokwakhe wahlathulula lokho okutjhiwo libizo lakhe encekwinakhe ethembekileko uMosisi. UMosisi nakabuza ngebizo lakaZimu, uJehova waphendula: “Ngizokuba ngilokho engifuna ukuba ngikho.” (Eksodosi 3:14) Itjhugululo lakaRotherham libeka amezwi la bunje: “Ngizokuba ngilokho engithanda ukuba ngikho.” Ngalokho uJehova angaba ngilokho okufuze abe ngikho bona azalise iminqopho yakhe.

Akhe sithi uyakwazi ukuba ngilokho ofuna ukuba ngikho. Ungabenzelani abangani bakho? Nengabe omunye wabo ugula khulu, ungaba ngudorhodere onobukghoni begodu umlaphe. Nengabe omunye utlhoga imali, ungaba sigwili umrhelebhe ukurarulula umrarwakhe. Iqiniso kukobana, angekhe wenza yoke into othanda ukuyenza. Soke angekhe sakwazi ukwenza koke esithanda ukukwenza. Njengombana ufunda iBhayibhili, uzokurareka ukubona bona uJehova uba njani ngilokho okufunekako ekuzaliseni iinthembiso zakhe. Uyakuthabela ukuberegisa amandlakhe kwabamthandako. (2 Imilando 16:9) Ubuntu obuhlobu bakaJehova bubhacile kilabo abangalaziko ibizo lakhe.

Ngokukhanyako, ibizo lakaJehova kufuze liberegiswe eBhayibhilini. Ukwazi bona limenetjhani nokuliberegisa ngokutjhaphulukileko ekukhulekeleni kwethu mathulusi anamandla ekutjhideleni hlanu kwakaBabethu wezulwini, uJehova.*

*  Ukufumana imininingwana engezelelekileko ngebizo lakaZimu, lokho elikutjhoko namabanga wokobana kubayini kufuze siliberegise ekukhulekeleni, qala incwajana ethi IGama LaPhezulu Eliyohlala Phakade, [efumaneka ngesiZulu] egadangiswe boFakazi bakaJehova.

← Qala isikhombiso sezahluko