ISIFUNDO 05
UZimu Ukhuluma Nathi NgeBhayibheli
UJehova usinikele isipho esihle, okuliBhayibheli elineencwadi ezima-66. Kungenzeka uyazibuza, ‘IBhayibheli livelaphi? Ngubani umtlolwalo?’ Bona kuphenduleke imibuzo le, akhesicoce ngokuthi umlayezo kaZimu oseBhayibhelini ufike njani kithi.
1. Nangabe iBhayibheli latlolwa babantu, kuza njani sithi uZimu mTloli weBhayibheli?
IBhayibheli latlolwa batloli abama-40 kusukela ku-1513 B.C.E. ukuya ku-98 C.E. okuminyaka eyi-1 600. Abatloli balo bebavela eenzindeni ezingafaniko. Nanyana kunjalo, liloke iBhayibheli liyavumelana. Kwenzeka njani lokho? Kungombana uZimu nguye umTloli weBhayibheli. (Funda yoku-1 kwebeThesalonika 2:13.) Abatlolaba akhenge batlole imicabangwabo. Kunalokho, “bakhuluma okuvela kuZimu basunduzwa mmoya ocwengileko.” a (2 Pitrosi 1:21) UZimu wasebenzisa ummoyakhe ocwengileko bona abasize batlole umkhumbulwakhe.—2 Thimothi 3:16.
2. Bobani abanelungelo lokufunda iBhayibheli?
“Zoke iintjhaba, iinkoro, amalimi nabantu” zingazuza eendabeni ezimnandi ezifumaneka eBhayibhelini. (Funda IsAmbulo 14:6.) UZimu wenze isiqinisekiso sokuthi iBhayibheli lizokufumaneka ngamalimi amanengi ukudlula nanyana ngiyiphi enye incwadi. Pheze woke umuntu angalifumana iBhayibheli. Akunandaba ukuthi uhlala kuphi namkha ukhuluma liphi ilimi.
3. UJehova ulivikele njani iBhayibheli?
Lokha iBhayibheli nalitlolwako, latlolelwa ezintweni ezonakalako ezifaka hlangana isikhumba nephaphirasi. Amadoda alithandako iBhayibheli, alikopulula kanengana, alitlola ngesandla. Nanyana bekunabantu ebebaseenkhundleni eziphezulu ebebafuna ukutjhabalalisa iBhayibheli, bekunabanye ebebazimisele ukulivikela, bebakulungele nokufaka ukuphila kwabo engozini. UJehova akhenge avumele nanyana yini ngitjho nabantu bona bamvimbele ekukhulumeni nathi. IBhayibheli lithi: “Ilizwi lakaZimethu lihlala ngokungapheliko.”—Isaya 40:8.
FUNDA NGOKUNGENELELEKO
Funda okungeziweko ngokuthi uZimu ubasebenzise njani abantu bona batlole iBhayibheli, ulivikele njani begodu wenze njani ukuthi boke abantu bakghone ukulifumana.
4. IBhayibheli liyatjho ukuthi ngubani umTlolwalo
Dlala IVIDIYO. Bese ufunda yesi-2 kaThimothi 3:16, ngemva kwalokho nicoce ngemibuzo elandelako.
-
Nangabe iBhayibheli latlolwa babantu, kubayini libizwa ngokuthi liliZwi lakaZimu?
-
Ucabanga ukuthi kuyazwisiseka ukukholelwa ukuthi uZimu angadlulisela umkhumbulwakhe ebantwini bona bawutlole phasi?
Unobhala angayitlola incwadi kodwana umlayezwayo uvela emphathinakhe. Ngendlela efanako, iBhayibheli latlolwa babantu kodwana umlayezwalo bebawufumana kuZimu
5. IBhayibheli lasinda ekutjhatjalalisweni
Nangabe iBhayibheli livela kuZimu, besizokulindela bona alivikele. Kiwo woke umlando weBhayibheli, abantu abaseenkhundleni eziphezulu balinga ukulitjhabalalisa. Abadosiphambili bezekolo balinga ukulifihla. Naphezu kokuhlunguphazwa nokuthuselwa ngokubulawa, inengi labantu lafaka ukuphila kwalo engozini lilinga ukuvikela iBhayibheli. Bona ufunde okungeziweko ngomunye wabo, dlala IVIDIYO, bese nicoca ngemibuzo elandelako.
-
Kghani ukwazi ukuthi kungangani okwenziwako bona kuvikelwe iBhayibheli kukwenza ufune ukulifunda? Kubayini utjho njalo?
Funda IRhubo 119:97, bese nicoca ngombuzo naku:
-
Khuyini eyenza abantu abanengi bafaka ukuphila kwabo engozini ngokuthi batjhugulule iBhayibheli bebalenze lifumaneke ebantwini abanengi?
6. Incwadi yabo boke abantu
IBhayibheli yincwadi etjhugululwe begodu efumaneka eendaweni ezinengi ukudlula nanyana ngiyiphi enye incwadi emlandweni. Funda IzEnzo 10:34, 35, bese nicoca nganasi imibuzo elandelako:
-
Kubayini uZimu afuna bona iliZwi lakhe litjhugululwe begodu lifumaneke ephasini mazombe?
-
Khuyini oyithandako ngeBhayibheli?
Pheze
i-100%
yabantu ephasini loke
ineBhayibheli ngelimi ekghona ukulizwisisa
Lifumaneka ngesibalo esingaphezu kwee-
3 000
zamalimi
liphelele namkha liyingcenye
azii-5 000 000 000,
Pheze isibalo samaBhayibheli esele agadangisiwe bekube nje,
sidlula nanyana ngiyiphi enye incwadi
ABANYE ABANTU BATHI: “IBhayibheli yincwadi yakade eyatlolwa babantu.”
-
Wena ucabangani?
-
Ngibuphi ubufakazi obutjengisa ukuthi iBhayibheli liliZwi lakaZimu?
ISIRHUNYEZO
IBhayibheli liliZwi lakaZimu begodu wenze ukuthi lifumaneke kibo boke abantu.
Buyekeza
-
Kutjho ukuthini ukuthi uZimu usebenzise abantu bona batlole iBhayibheli?
-
Khuyini oyithandako malungana nokusinda kweBhayibheli, ukutjhugululwa kwalo nokufumaneka kwalo ebantwini abanengi?
-
Ukwazi ukuthi uJehova wenze umzamo ongaka bona akhulume nawe, kukwenza uzizwe njani?
HLOLA OKUNGENZASI
Funda ngeendlela ezintathu ezapheze zatjhabalalisa iBhayibheli nokuthi lasinda njani kizo.
“IBhayibheli—Nomlando Wokusinda Kwalo” (IsiThala No. 4 2016)
Funda ngeendlela eziyingozi abantu abadlula kizo bona batjhugulule iBhayibheli.
IBhayibheli likopululwe belatjhugululwa kanengi. Ungaqiniseka njani ngokuthi umlayezwalo akhenge utjhuguluke?
“Kghani IBhayibheli Khelatjhuguluka namkha Kwadlalwa Ngalo?” (Isihloko esiku-jw.org)
a Isifundo 07 sizokucoca ngokuthi ummoya ocwengileko umamandla kaZimu asebenzako.
Okhunye Ongakuthabela
OKUBUZWAKO
Siyini Isifundo SeBhayibheli?
Fumana iimpendulo zemibuzo emalungana nehlelo lethu lesifundo seBhayibheli.
