Ke goletše tikologong yeo e homotšego yeo e lego ka ntle ga toropo ya Tampere, Finland. Ka gešo re be re se batho ba bodumedi, eupša re be re tšeela godimo thuto le go ba le mekgwa e mebotse. Mma ke Mojeremane, ka gona ge ke be ke sa gola, ke be ke fela ke etela makgolo le rakgolo kua Jeremane Bodikela.

 Ke ratile dipapadi go tloga ke sa le ngwana. Ge ke be ke sa le yo monyenyane, ke be ke bapala mehuta ka moka ya dipapadi, eupša ge ke be ke na le mengwaga e ka bago e 14, ke ile ka phetha ka gore ke bapale thenese. Ge ke be ke na le mengwaga e 16, ke be ke itlwaetša gabedi goba gararo ka letšatši. Ka makga a mabedi ke be ke tlwaetšwa ke ditsebi tša papadi yeo, gomme mantšiboa ke itlwaetša ka bonna. Ke be ke rata dilo tše dintši ka papadi ye ka gobane e be e dira gore ke šomiše monagano wa ka mola ke dutše ke itšhidulla. Le ge ke be ke thabela go ba le bagwera ba ka gomme re fela re enwa bjala, ga sa nka ka tagwa goba ka diriša dihlaretagi. Ke be ke rata thenese kudu. E be e etla pele bophelong bja ka.

 Ge ke be ke na le mengwaga e 17 ke ile ka thoma go tsenela diphadišano tša ATP. a Ka morago ga gore ke thope sefoka diphadišanong tše mmalwa, ke ile ka tuma. Ge ke be ke na le mengwaga e 22, ke be ke balwa gare ga batho ba 50 bao ba kgethilwego gore ke ditsebi tša go bapala thenese lefaseng ka moka.

 Ke feditše mengwaga e mentši ke eya dinageng tša kgole le kgauswi go yo bapala thenese. Ke bone dinaga tše dibotse le tšeo di kgahlišago, eupša ke ile ka bona le mathata ao batho ba lebeletšanago le ona lefaseng ka moka. Mathata a go swana le bosenyi, go diriša dihlaretagi gampe le mathata ao a bakwago ke tlhago. Ka mohlala, ge re be re le United States, re ile ra botšwa gore re se ke ra etela mafelong a itšego ao a lego ditoropong tše itšego ka baka la bosenyi bjo bogolo bjo bo lego moo. Dilo tšeo ka moka di be di ntshwenya. Go oketša moo, le ge ke be ke dira selo seo ke bego ke se rata, ke be ke ikwa ke sa kgotsofala.

 Sanna, e lego kgarebe yeo ke bego ke dula le yona, o be a thomile go ithuta Beibele le Dihlatse tša Jehofa. Ke ile ka makatšwa ke go bona gore o rata bodumedi, eupša ke ile ka se mo ganetše gore a ithute le Dihlatse tša Jehofa. Ka 1990 re ile ra nyalana, gomme ngwageng o latetšego a kolobetšwa gore e be Hlatse ya Jehofa. Nna ke be ke se motho wa go rata bodumedi, eupša ke be ke dumela gore Modimo o gona. Eupša ke ile ka gopola gore makgolo wa ka o be a rata go bala Beibele kudu, e bile o ile a nthuta le go rapela.

 Ka letšatši le lengwe ge nna le Sanna re be re etetše banyalani ba bangwe ba Dihlatse tša Jehofa, Kari o ile a mpontšha boporofeta bja Beibele bjoo bo bolelago ka “mehla ya bofelo.” (2 Timotheo 3:1-5) Ke ile ka rata lengwalo leo ka ge le be le hlalosa gore ke ka baka la eng go direga dilo tše mpe mo lefaseng. Letšatšing leo, ga se ra bolela kudu ka bodumedi. Eupša go tloga ka nako yeo, ke ile ka fela ke boledišana le Kari ka Beibele, gomme dilo ka moka tšeo ke bego ke ithuta tšona di be di kwagala. Ka ge ke be ke sa hwetšagale gabonolo e bile ke tšea maeto gantši, ke be ke sa kgone go bonana le Kari gantši. Eupša Kari ga se a ka a mphelela pelo. Ge e ba go be go na le potšišo yeo ke bego ke mmotšišitše yona ge re be re ithuta Beibele, o be a nngwalela lengwalo gomme a araba potšišo yeo. Ge ke dutše ke ithuta Beibele ke ile ka hwetša dikarabo tša dipotšišo tša mabapi le bophelo ka kakaretšo. Ke moka ganyenyane-ganyenyane ka kwešiša gore molaetša o bohlokwa wa ka Beibeleng ke wa gore: Mmušo wa Modimo o tlo dira gore thato ya gagwe e direge ka mo go feletšego. Ka morago ga go ithuta gore leina la Modimo ke Jehofa e bile ke thoma go bona dilo tše dibotse tšeo a re diretšego tšona, ke ile ka mo rata le go feta. (Psalme 83:18) Seo se nkgahlilego le go feta ke go ithuta gore taba ya gore Modimo o rometše Jesu Kriste gore a tlo re hwela ga se ya no itiragalela, eupša o be a tutuetšwa ke lerato. (Johane 3:​16) Le gona, ke ile ka ithuta gore nka kgona go ba mogwera wa Modimo gomme ka tla ka phela ka mo go sa felego paradeiseng ya khutšo mo lefaseng. (Jakobo 4:8) Ke ile ka thoma go ipotšiša gore: “Nka bontšha bjang gore ke leboga dilo tšeo Modimo a ntiretšego tšona?”

 Ke ile ka naganišiša kudu ka bophelo bja ka. Ka Beibeleng ke be ke ithuta gore lethabo le legolo le tlišwa ke go nea, gomme seo se ile sa ntira gore ke nyake go ruta ba bangwe ka Modimo. (Ditiro 20:35) Ka ge ke be ke le radipapadi, mo ngwageng ke be ke fetša matšatši ao e ka bago a 200 ke se gona ka gae ke ile diphadišanong. Selo sa bohlokwa ka lapeng la ka e be e le mošomo wa ka, go akaretša go itlwaetša gotee le go dira dilo tše dingwe gore ke atlege dipapading. Ke ile ka lemoga gore ke be ke swanetše go fetoga.

 Ke be ke tseba gore batho ba bantši ba be ba ka se kwešiše gore ke ka baka la eng bodumedi bo be bo ba ka dira gore ke tlogela mošomo wa maemo a godimo. Eupša go ba mogwera wa Jehofa le go tlo phela ka mo go sa felego e be e le dilo tša bohlokwa kudu go nna go feta moputso le ge e le ofe woo ke bego nka o hwetša papading ya thenese. Ka gona go dira phetho yeo go ile gwa ba bonolo kudu. Ke be ke se na taba le gore batho ba bangwe ba be ba tla reng. Ke be ke dirile phetho, gomme go be go se na yo a ka e fetošago. Temana ya Beibele yeo e ilego ya nthuša kudu gore ke se tshwenyege ka gore batho ba tle reng ke Psalme 118:6, yeo e rego: “Jehofa o ka lehlakoreng la ka; nka se boife. Motho wa lefaseng a ka ntira’ng?”

 Mo e ka bago ka yona nako yeo, dikgwebo tše itšego di ile tša tshepiša go nthekga ka ditšhelete gore ke kgone go tšwela pele ke bapala thenese mengwaga e mentši ke sa tshwenyege ka selo. Eupša ke be ke šetše ke dirile phetho. Ka gona, ke ile ka gana thušo yeo ya bona gomme mafelelong ka tlogela go tsenela diphadišano tša ATP. Ke ile ka tšwela pele ke ithuta Beibele le Dihlatse tša Jehofa, gomme ka July 2, 1994 ka kolobetšwa gore ke be yo mongwe wa Dihlatse tša Jehofa.

 Go fapana le batho ba bangwe, nna ga sa nka ka welwa ke mathata a magolo bophelong e le gore ke thome go naganišiša ka Modimo. Le gona, nka se ke ka re ke be ke tsoma therešo. Ke be ke ikwa ke kgotsofetše e bile ke sa hloke selo. Go be go le bjalo ka ge eka therešo ya Beibele e be e tsomana le nna. Ke ile ka ithuta gore ke ka baka la eng Modimo a re bopile, e bile gona bjale bophelo bja ka bo kaone go feta ka tsela yeo ke bego ke nagana ka yona! Ga bjale lapa la rena le momagane. Le gona ke thabišwa ke gore barwa ba ka ba bararo ba latetše mohlala wa ka, e sego ka go ba boradipapadi eupša ka go ba Dihlatse tša Jehofa.

 Ke sa rata go bapala thenese. Mengwageng ye ka moka, ke ile ka kgona go iphediša ka mešomo ya go sepedišana le papadi ya thenese. Ka mohlala, ke ile ka ba mohlahli wa thenese le go ba molaodi wa lefelo la go ralokela thenese. Eupša ga bjale dipapadi ga di sa tla pele bophelong bja ka. Mathomong, ke be ke fetša diiri tše dintši ke itlwaetša gore ke be sebapadi sa maemo a godimo sa thenese, ke be nkgwete. Ga bjale, ka ge ke ruta batho ka Modimo ka mehla, ke thabela go diriša nako ya ka go thuša batho gore ba ithute ka melao ya motheo ya Beibele yeo e ilego ya nthuša go fetoša bophelo bja ka. Ke thabišwa kudu ke go etiša segwera sa ka le Jehofa Modimo pele le go botša ba bangwe gore kgauswinyane Jehofa o tlo re direla dilo tše dibotse.​—1 Timotheo 6:​19.