Maaka: Lebaka leo Dihlatse tša Jehofa di sa ketekego Keresemose ke gore ga di dumele go Jesu.

Therešo: Re Bakriste. Re dumela gore Jesu Kriste ke yena feela mophološi wa batho.—Ditiro 4:12.

Maaka: Le aroganya malapa ka go ruta ditho tša ona gore di se keteke Keresemose.

Therešo: Re tshwenyegile kudu ka malapa, e bile re diriša Beibele go thuša go aga malapa a tiilego.

Maaka: Le fetwa ke moya wa Keresemose wa go fana dimpho, wa go kgothaletša khutšo mo lefaseng le wa go direlana dilo tše dibotse.

Therešo: Re katanela gore re fane le go kgothaletša khutšo letšatši le lengwe le le lengwe. (Diema 11:25; Baroma 12:18) Ka mohlala, tsela yeo re swarago diboka tša rena ka yona e dumelelana le taelo ya Jesu ya gore: “Le amogetše feela, neang feela.” (Mateo 10:8) Go oketša moo, re dumela gore ke Mmušo wa Modimo feela woo o re holofetšago khutšo ya kgonthe mo lefaseng.—Mateo 10:7.

• Jesu o re laetše gore re gopole lehu la gagwe, e sego letšatši la gagwe la matswalo.—Luka 22:19, 20.

• Baapostola ba Jesu le barutiwa ba lekgolong la pele la nywaga ga se ba ka ba keteka Keresemose. New Catholic Encyclopedia e re “monyanya wa matswalo a Jesu o ile wa thewa ka morago ga 243 [C.E.],” e lego nywagakgolo ka morago ga gore baapostola ba mafelelo ba hwe.

• Ga go na bohlatse bja gore Jesu o belegwe ka di-25 tša December; letšatši la matswalo a gagwe ga se la ngwalwa ka Beibeleng.

• Re dumela gore Modimo ga a amogele Keresemose ka gobane e thomile metlwaeng le ditšong tša boheitene.—2 Bakorinthe 6:17.

Ba bantši ba sa dutše ba keteka Keresemose go sa šetšwe gore e theilwe boheiteneng le gore ga e tšwe Beibeleng. Batho ba bjalo ba ipotšiša gore: Ke ka baka la’ng Bakriste ba sa swanela go keteka Keresemose? Ke ka baka la’ng le itira mahlaodi ka go se e keteke?

Beibele e re kgothaletša gore re nagane, re diriše ‘matla a rena a tlhaologanyo.’ (Baroma 12:1, 2) E re ruta gore re lebelele therešo e le selo se bohlokwa. (Johane 4:23, 24) Le ge re tshwenyega ka tsela yeo ba bangwe ba re lebelelago ka yona, re tšwela pele re kgomarela melao ya motheo ya Beibele gaešita le ge seo se dira gore batho ba nagane gore re itira mahlaodi.

Le ge re ikgethetše go se keteke Keresemose, re hlompha phetho yeo motho yo mongwe le yo mongwe a e dirago mabapi le taba ye. Ga re šitiše batho ba bangwe ge ba keteka meletlo ya Keresemose.