Ka September 14, 2013, batho ba 10 500 ba be ba tlile go bona go aloga ga klase ya bo-135 ya Sekolo sa Beibele sa Watchtower sa Gilead lefelong la tša thuto la Dihlatse tša Jehofa kua Patterson, New York. Sekolo se se tlwaetša bahlanka bao ba nago le phihlelo ba Dihlatse tša Jehofa gore ba atlege kutšwanyana kabelong ya bona.

Guy Pierce, yo e lego setho sa Sehlopha se Bušago sa Dihlatse tša Jehofa o ile a ba modulasetulo wa lenaneo le, o ile a thea matseno a gagwe go Mateo 28:19, 20 e rego: ‘Ka gona, eyang le dire batho ba ditšhaba ka moka barutiwa, le ba rute go boloka dilo tšohle tšeo ke le laetšego tšona.’

Ngwanabo rena Pierce o bontšhitše gore mantšu ao Jesu a a boletšego a ile a tšwela pele a phethagala go fihla le mehleng ya rena. Ge re dutše re dira barutiwa, re ruta batho go dira sohle seo Jesu a se laetšego. Ke therešo gore se se akaretša taelo ya gagwe ya go dira boboledi bja “ditaba tše tše dibotse tša Mmušo.” (Mateo 24:14) Ka go re’alo, morutwana yo mongwe le yo mongwe yo mofsa o fetoga mmoledi le morutiši wa Mmušo. Modiro wo o ile wa ba le mafelelo afe? Ngwanabo rena Pierce o itše: “Palo ya badudi ba lefase e oketšegile, le batho ba Modimo ba oketšegile.”

“Ba Neetše go Feta Kamoo ba ka Kgonago ka Gona.” Thomas Cheiky, yo e lego setho sa Komiti ya Lekala la United States, o neile polelo yeo e theilwego go 2 Bakorinthe 8:1-4. Gaešita le ge diphuthego tša lekgolong la pele la nywaga tša Matsedonia di be di diila kudu, di ile tša kgopela go neela bakeng sa bana babo tšona ba kua Jerusalema bao ba bego ba hlaka. Barutwana ba Gilead le bona ba ile ba bontšha moya o swanago wa go fa ka seatla se se bulegilego le wa boikgafo.

Ka mo go swanago, re ka holofela gore Bakriste ba Matsedonia ba ile ba bontšha bohlale, ka go se neele ka mo go feteletšego moo ba bego ba ka palelwa ke go hlokomela malapa goba borapedi bja bona go Modimo. Ngwanabo rena Cheiky o ile a kgothaletša barutwana go ekiša Bakriste ba Matsedonia ka go dula ba na le moya wa go fa.

“Sekolo se Fedile.” Samuel Herd wa Sehlopha se Bušago o ile a gatelela lebaka leo barutwana ba swanetšego go gopola phihlelo ya bona ya Sekolo sa Gilead. Go swana le mmino o kgahlišago woo o kwagalago mesong gomme motho a dula a nagana ka ona, barutwana le bona ba ka matlafatšwa ke go dula ba gopola dilo tše bohlokwa tšeo ba ithutilego tšona Sekolong sa Gilead.

Ngwanabo rena Herd o ile a gopotša barutwana gore mogopolo wa Modimo o ka se lekanywe le selo. Modimo o neile naledi e nngwe le e nngwe ya tše dibilione tšeo di lego legohleng leina, e bile le ka mohla a ka se lebale le e tee ya tšona. (Psalme 147:4) A ka lebala bjang boiteko bjoo barutwana ba bo dirilego bja gore ba tlwaetšwe Sekolong sa Gilead! Ba ipoloketše “matlotlo legodimong,” e bile le ka mohla Jehofa a ka se ba lebale.—Mateo 6:20.

Ka ge Modimo a gopola mošomo wa barutwana bao le lerato leo ba le bontšhitšego bakeng sa gagwe, ba tla dula ba gopola diphihlelo tša bona tša Gilead. Ngwanabo rena Herd o itše: “Ge le dula le nagana ka dilo tše di kgahlišago tša sekolo se, le se ke la lebala go leboga Yoo a ilego a dira gore le thabe, e lego Jehofa. Dulang le gopola dilo tšeo. Ka mehla le tla holega ge e ba le tšwela pele le gopola seo le ithutilego sekolong se.”

“Homotšwang ke Matla a sa Hlalosegego a Jehofa.” Sam Roberson, yo e lego mohlahli wa Gilead, o kgothaleditše barutwana gore ba ithekge ka matla a Jehofa go e na le go ithekga ka a bona ge ba dutše ba lebeletšana le ditlhohlo. Baefeso 3:20 e re Modimo o “dira go feta kudu ka kua ga tšohle tšeo re di kgopelago goba re di naganago.” Matla a gagwe a feta kwešišo ya rena go fihla bokgoleng bja gore le polelwana e rego “kudu ka kua ga tšohle tšeo re di kgopelago” e palelwe ke go hlalosa tsela yeo a re thušago ka yona, ka ge temana yeo e re a ka kgona go dira “go feta” seo.

Jehofa o nea Mokriste yo mongwe le yo mongwe matla a sa hlalosegego. Jehofa o etša “mogale yo a šiišago” nakong ya mathata. (Jeremia 20:11) Ngwanabo rena Roberson o ile a gopotša barutwana gore Jehofa o tla ba thuša go fenya bothata le ge e le bofe bjoo ba lebeletšanago le bjona.

“Kgomarelang Seriti sa Lena Tirelong ya Mmušo.” William Samuelson, yo e lego mohlahli wa Gilead, o hlalositše gore barutwana ba ba Gilead ba hweditše seriti tirelong ya Mmušo ka ditsela tše pedi. Ba itlhatsetše ba swanelwa ke seriti ka seo ba se dirilego pele ba etla sekolong le nakong ya ge ba le sekolong, e bile ba tla tšwela pele ba hwetša kgodišo le tlhompho ka go emela mmušo o phagamego legohleng, e lego Mmušo wa Modimo.

Barutwana ba ka kgomarela bjang seriti sa bona? Ngwanabo rena Samuelson o ile a ba kgothaletša gore ba godiše Jehofa gomme ba hlomphe ba bangwe go etša ge Jesu a ile a nea bao ba bego ba na le yena seriti gaešita le ge a be a swanetše go ba phošolla goba go ba eletša. Se se tla ba le mafelelo afe? Go swana le moapostola Paulo, barutwana ba tla oketša seriti sa bona gomme ba tagafatša bodiredi bja bona go e na le gore ba phegelele go ikgodiša.—Baroma 11:13.

“Matla a Dipere a Melomong ya Tšona.” Michael Burnett, e lego mohlahli yo mongwe wa Gilead, o bontšhitše kamoo re ka dirago dilo ka go dumelelana le go phethagala ga Kutollo 9:19, ge re diriša seo re ithutago sona dibokeng tša Bokriste e le gore re bolele ka matla ge re nea bohlatse. Ke moka o ile a kgopela barutwana ba bangwe go laodiša goba go diragatša diphihlelo tšeo ba bilego le tšona bodireding nakong ya ge ba le sekolong. Ka mohlala, morutwana yo mongwe o tsošitše kgahlego go mošomi wa seteišeneng sa peterole ka go mmotšiša potšišo e rego: “Dinako tše di beilwego tša ditšhaba di thomile neng gomme tša fela neng?” (Luka 21:24) Ka moragonyana ge a mo etela, o ile a mo thuša go araba potšišo yeo a diriša Daniele kgaolo 4, gotee le lemetletšo la puku ya Ke Eng Seo Ge e le Gabotse Beibele e se Rutago?

“Dipelo tša Bona di Ile tša Matlafatšwa.” Adrian Fernandez, yo e lego setho sa Komiti ya Lekala la United States, o ile a boledišana le banyalani ba babedi ba dialoga. Ngwanabo rena Helge Schumi o boletše gore ka ge pego ya Beibele e bontšha gore ba bangwe ba bahlanka ba Modimo ka dinako tše dingwe ba ile ba ikgogomoša ka morago ga go hwetša ditokelo tše di kgethegilego, ka mehla thuto yeo e hwetšwago Gilead e akaretša keletšo ya kamoo motho a ka dulago a ikokobeditše ka gona. (2 Dikoronika 26:16) Ka mo go swanago, Ngwanabo rena Peter Canning o ile a gopola keletšo e bohlale ya polelo e neilwego Sekolong e bolelago ka go ithuta leleme la moo ba abetšwego gona, moo seboledi se itšego: “Le se ke la ikgogomoša. Ikemišetšeng go itira mašilo.” Banyalani ba ba ile ba leboga kamoo sekolo se se ba matlafaletšago mošomo woo o letšego ka pele, gomme dipelo tša bona di ile tša matlafatšwa.—Baheberu 13:9.

“Thabang Gobane Maina a Lena a Ngwadilwe Magodimong.” (Luka 10:20) Geoffrey Jackson wa sehlopha se Bušago o ile a nea polelo ya thwadi lenaneong le. Ka go se swane le bao ba ilego ba tla Sekolong sa Gilead nakong e fetilego, dialoga tše dintši lehono di ka se hwetše dikabelo tše difsa goba tša ba le diphihlelo tše di kgahlišago tša go dira boboledi ditšhemong tšeo go sa kago gwa bolelwa go tšona. Di swanetše go arabela bjang?

Barutiwa ba 70 bao Jesu a ilego a ba roma gore ba dire boboledi, ba ile ba re ge ba boa ba bega ditaba tše di thabišago tša gore ba lelekile batemona ka leina la Jesu. (Luka 10:1, 17) Jesu o ile a dumela gore dipoelo tšeo di be di tloga di kgahliša, eupša o itše: “Lega go le bjalo, le se ke la thabišwa ke gore le laola meoya e mebe, eupša thabang gobane maina a lena a ngwadilwe magodimong.” (Luka 10:20) Ke moka o ile a bontšha gore ba be ba ka se be le diphihlelo tše bjalo letšatši le lengwe le le lengwe. Ba be ba sa swanela go tshwenyega ka dipoelo tša bona, eupša ba tshwenyege ka potego ya bona go Jehofa le gore maina a bona a be a tla ‘ngwalwa magodimong.’

Ngwanabo rena Jackson o itše: “Seo Jesu a se rutilego barutiwa ba 70 se šoma le go rena.” Ga se ra swanela go dumelela dipoelo tša bodiredi bja rena gore e be motheo o nnoši wa lethabo la rena goba e be pontšho ya potego ya rena. Go e na le moo, re hwetša lethabo le go bontšha go botega ka go dula re na le tswalano e tiilego le Jehofa le go šoma ka mafolofolo tirelong ya gagwe.

Jesu le yena o ile a lebeletšana le maemo ao a ka bago a be a nola moko. Ka mohlala, ka morago ga gore a fepe batho ba dikete ka mohlolo, ba ile ba thoma go mo latela. (Johane 6:10-14, 22-24) Lega go le bjalo, go se go ye kae ba bantši ba ile ba kgopišwa ke thuto ya Jesu gomme bao ba fetogilego barutiwa ba ile ba tlogela go mo latela le semeetseng. (Johane 6:48-56, 60, 61, 66) Eupša baapostola ba botegago ba be ba ikemišeditše go dula ba na le Jesu. Ba beile mohlala o mobotse ka go se tshwenyege kudu ka dipoelo eupša ka potego le tswalano ya bona le Jehofa.—Johane 6:67-69.

Phetho. Barutwana ba ile ba newa di diploma tša bona, ka morago ga moo, yo mongwe wa dialoga o ile a bala lengwalo la tebogo leo le tšwago klaseng. Ngwanabo rena Pierce o ile a phetha lenaneo ka go bolela gore batho ba Modimo, go akaretša le dialoga tša Gilead, ga ba itire batho ba kgethegilego lefaseng. (Ditiro 4:13; 1 Bakorinthe 1:27-31) Lega go le bjalo, Jehofa o amogela boineelo bja rena gomme a re nea moya wa gagwe o mokgethwa. Ngwanabo rena Pierce o itše: “Gaešita le ge Jehofa a ka se kgahlišwe ke thuto ya rena, eupša o kgahlwa ke potego le boineelo bja rena go yena.”