Palo ya batho bao ba ipolayago e be e le godimo kudu porofenseng ya Tabasco, kua Mexico. Ka baka la seo, ka 2017, Dihlatse tša Jehofa di ile tša rulaganya lesolo leo le kgethegilego la dikgwedi tše pedi gore di phatlalatše gape makasine wa Phafoga! ya April 2014 yeo e nago le sehlogo seo se rego “Ke Phelela Eng?—Mabaka a Mararo a go Tšwela Pele o Phela?” Batho ba ile ba leboga lesolo leo kudu.

Faustino, yo e lego Hlatse ya Jehofa, o ile a boledišana le mosadi yo a bego a tshwenyegile ka morwa wa gagwe wa mengwaga e 22. Lesogana leo le be le na le kgateletšego ya monagano (depression) e bile le be le šetše le kile la leka go ipolaya. Mosadi yoo o be a sa tsebe gore a dire eng. Eupša ka morago ga gore Faustino a fe mosadi yoo makasine woo wa Phafoga!, mosadi yoo o ile a re: “Makasine wo o ka thuša morwa wa ka.” Letšatšing leo le latetšego, Faustino o ile a etela morwa wa mosadi yoo, ke moka ba boledišana ka keletšo ya Beibele yeo e lego ka makasineng woo. Ka morago ga gore Faustino a etele lesogana leo ka makga a mmalwa, lesogana leo le ile la thoma go ba kaone. Faustino o re lesogana leo le ile la thoma go bonala le iketlile e bile le thabile. Go oketša moo, seo lesogana leo le bego le ithuta sona, le be le se hlalosetša moratho wa lona yoo le yena a bego a na le kgateletšego ya monagano.

Karla, yo a dulago toropong ya Huimanguillo, o ile a diriša makasine woo gore a thuše ngwana yo a tsenago le yena ka klaseng. Karla o re: “Ke ile ka lemoga gore ngwanenyana yo mongwe yo a nago le mengwaga e 14 yo ke tsenago le yena ka klaseng o be a nyamile. Ke ile ka boledišana le yena ke moka a ntlhalosetša ka mathata a ka lapeng la gabo. Ge re dutše re bolela, ke ile ka bona gore o na le mabadi mo letsogong le letshadi.” Go bonagala ngwanenyana yoo a be a tlwaetše go itshega matsogo le maoto. O be a se a thaba e bile a sa bone bohlokwa bja gore a phele. Karla o ile a mo nea makasine woo wa Phafoga! Ka morago ga gore ngwanenyana yoo a bale makasine woo, o ile a botša Karla gore okare makasine woo o ngwaletšwe yena. O ile a bolela a myemyela gore ga bjale o bona bohlokwa bja gore a tšwele pele a phela.

Monna yo mongwe yo a dulago toropong ya Villahermosa o be a sa tsebe gore a dire eng ka ge a be a feletšwe ke mošomo e bile mosadi wa gagwe a mo tlogetše le bana. O ile a rapela Modimo gore a mo thuše eupša o be a bona go no swana. Ka letšatši le lengwe ge a be a nyaka go ipolaya, Martín le Miguel, e lego Dihlatse tša Jehofa ba ile ba kokota mojakong wa gagwe. Monna yoo o ile a bula mojako gomme Dihlatse tšeo tša Jehofa tša mo fa makasine woo wa Phafoga! Ge monna yoo a bona sehlogo sa makasine woo, o ile a lemoga gore Modimo o araba thapelo ya gagwe. Martín le Miguel ba ile ba mo kgothatša ka Mangwalo a Beibele. Ka morago ga matšatši a sego kae, ba boela go yena gomme ba mo hwetša a le kaone e bile a theošitše maswafo. Ga bjale ba ithuta Beibele le monna yoo gabedi ka beke.

Lesolong lona leo, Dihlatse tša Jehofa di ile tša etela dikgolego tše mmalwa nageng ya Tabasco go botša bagolegwa ka keletšo ya Beibele yeo e ka ba thušago go tseba gore ba phelela eng. Dihlatse tšeo tša Jehofa di ile tša rulaganya gore go be le dibidio le polelo yeo e theilwego Beibeleng. Di ile tša ba tša boledišana le bagolegwa ka mabaka ao a dirago gore re tšwele pele re phela ao a lego ka makasineng woo. Bagolegwa le bašomi ba kgolegong ba ile ba leboga gore Dihlatse tša Jehofa di ba etetše. Ka mohlala, mogolegwa yo mongwe o itše: “Ke lekile go ipolaya ka makga a mararo. Batho ba bangwe ba ile ba mpotša gore Modimo o na le taba le nna, eupša ga se ba ka ba diriša Beibele go mpontšha gore seo ba se bolelago ke nnete. Mantšu a lena a nkgothaditše kudu.”

Lesolo leo le hotše batho ba bantši. Mongwaledi wa tša maphelo wa nageng yeo o ile a reta Dihlatse tša Jehofa ka maiteko a tšona a go thuša setšhaba, gomme kuranta ya tikologong yeo e ile ya gatiša sehlogo sa lesolong leo seo se rego “Dihlatse tša Jehofa di Thuša Batho Gore ba se ke ba Ipolaya.”