O nagana eng?

•   Na ke phošo go kgopela thušo go batho bao ba bolelago ka tša ka moso ba diriša dinaledi, batho bao ba dirišanago le batemona goba go ya dingakeng?

•   Na ditori tša mabapi le batho ba go dirišana le meoya di no bontšha feela phapano magareng ga se se lokilego le se se sa lokago, goba na ke selo sa kgonthe le seo se lego kotsi?

 Sehlogo se se tlo hlalosa gore ke ka baka la eng go dirišana le meoya go ka bonagala go kgahliša, e bile se tlo hlalosa gore ke ka baka la eng o swanetše go ba šedi ka go dirišana le meoya.

•  Ke eng seo se dirago gore batho ba bantši ba kgahlwe ke dilo tša botemona?

•  Ke ka baka la eng o swanetše go ba šedi?

•  Seo o ka se dirago

•  Seo dithaka tša gago di se bolelago

 Batho bao ba nago le kgwebo ya boithabišo ba dira tšhelete e ntši ka go dira di-movie, mananeo a thelebišene, dipapadi tša bidio le dipuku tšeo di bolelago ka botemona goba boloi le tšeo di bontšhago batho bao ba dirišanago le meoya. Se se dirile gore bafsa ba bantši ba nyake go ithuta kamoo dinaledi di ka ba thušago go tseba ka bokamoso, ba nyake go tseba ka dilo tšeo di nago le botemona, di-vampire le boloi. Ke ka baka la’ng ba nyaka go tseba ka dilo tše tša botemona? A mangwe a mabaka a bona ke a:

•   Go no nyaka go tseba: Go tseba ge e ba barongwa le batemona ba le gona e le ka kgonthe

•   Go tshwenyega: Go nyaka go tseba seo se tlago go direga nakong e tlago

•   Go boledišana: Ba dira se gore ba leke go boledišana le motho yo ba mo ratago yo a hlokofetšego

 Mabaka ao a ka no ba a kwagala. Ka mohlala, go tlwaelegile gore motho a ipotšiše ka bokamoso goba a ikwe a hlologetše motho wa gabo yo a hlokofetšego. Eupša go na le dikotsi tšeo o swanetšego go di lemoga.

 Beibele e re nea temošo e matla mabapi le selo le ge e le sefe seo se sepedišanago le dilo tša botemona. Ka mohlala, e re:

 “Go wena go se ke gwa hwetšwa . . . senoge, ramalea goba motho yo a dirišago dipheko goba moloi, goba yo a fošago ba bangwe ka meleko goba yo a dirišanago le meoya e mebe goba sedupe goba motho le ge e le ofe yo a botšišago dilo bahung. Ka gobane motho yo mongwe le yo mongwe yo a dirago dilo tše ke selo se se šišimišago go Jehofa.”—Doiteronomio 18:10-12.

 Ke ka baka la eng Beibele e sa re dumelele go dirišana le batemona?

•   Ge e ba re dira dilo tšeo di sepedišanago le botemona, go ra gore re thekga seo ba se dirago. Beibele e re botša gore barongwa ba bangwe ba ile ba se kwe Modimo ke moka ba fetoga manaba a gagwe. (Genesi 6:2; Juda 6) Barongwa ba ba babe bao ba bitšwago batemona, ba aroša batho ba diriša boloi, dingaka tša setšo le batho bao ba bolelago bokamoso ba diriša dinaledi. Go dira dilo tše go tla dira gore re be manaba a Modimo.

•   Go dirišana le meoya go kgothaletša batho go dumela thuto ya maaka ya gore batho ba bangwe ba ka kgona go bolela e sa le pele dilo tšeo di tlago go direga nakong e tlago. Eupša ke Modimo feela go ka bolelwago ka yena gore: “Yo a bolelago go tloga mathomong dilo tša mafelelo, le yo a bolelago go tloga kgale dilo tšeo di sešogo tša dirwa.”—Jesaya 46:10; Jakobo 4:13, 14.

•   Go dirišana le meoya go kgothaletša batho go dumela thuto ya maaka ya gore bahu ba ka kgona go boledišana le batho bao ba phelago. Eupša Beibele e re: ‘Bahu ga ba tsebe selo le gatee, gobane bodulabahu ga go na modiro le ge e le maano goba tsebo.’—Mmoledi 9:5, 10.

 Ka baka la seo re boletšego ka sona ka mo godimo, Dihlatse tša Jehofa ga di dirišane le botemona. Le gona di phema boithabišo bjo bo nago le dilo tša go swana le di-zombie, di-vampire le dipoko. Kgarebe yeo e bitšwago Maria e itše: “Ge e ba nka lemoga gore selo seo ke nyakago go se bogela se sepedišana le botemona, nka se se bogele.” a

•   Ikemišetše “go ba le letswalo le le se nago bosodi” pele ga Jehofa ka gore o se ke wa dira selo le ge e le sefe goba go tšea karolo boithabišong bjo bo nago le botemona.—Ditiro 24:16.

•   Lahla selo le ge e le sefe seo o nago le sona seo se sepedišanago le botemona. Bala Ditiro 19:19, 20, gomme o bone mohlala o mobotse woo Bakriste ba pele ba o beilego tabeng ye.

 Gopola se: Ge o sa tšee karolo boithabišong bjo bo nago le botemona, o bontšha gore o thekga Jehofa, gomme seo se mo thabiša kudu.—Diema 27:11.