Polelwana “Alfa le Omega” goba “A le O” go etša ge e tšwelela bjalo Dibeibeleng tše dintši, e šupa go Jehofa Modimo, Ramatlaohle. Polelwana ye e tšwelela ka makga a mararo ka Beibeleng.​—Kutollo 1:8; 21:6; 22:13. a

 Alfa ke tlhaka ya mathomo go ditlhaka tša Segerika gomme omega ke tlhaka ya mafelelo go ditlhaka tšeo. Karolo ya Beibele yeo e tsebjago e le Testamente e Mpsha, e be e ngwadilwe ka Segerika. Puku ya Kutollo le yona e hwetšwa ka Testamenteng e Mpsha. Tlhaka ya mathomo le tlhaka ya mafelelo go ditlhaka tša Segerika, di dirišitšwe go bontšha gore Jehofa ke yena a nnoši e lego mathomo le mafelelo. (Kutollo 21:6) E be e le Modimo Ramatlaohle mehleng e fetilego, e bile o sa tlo tšwela pele e le Modimo Ramatlaohle ka mo go sa felego. Ke yena feela yo a bilego gona “go tloga mehleng ya neng le neng go iša mehleng ya neng le neng.”​—Psalme 90:2.

 Beibele e diriša polelwana ye go šupa go Jehofa Modimo le go Morwa wa gagwe, Jesu. Eupša e e diriša ka ditsela tše di sa swanego. Mehlala še.

•   Go Jesaya 44:6, Jehofa o re: “Ke wa pele e bile ke wa mafelelo gomme ga go na Modimo yo mongwe ka ntle le nna.” Temaneng ye, Jehofa o bontšha gore ke yena Modimo wa therešo le wa ka mo go sa felego; le gore ka ntle le yena, ga gona Modimo yo mongwe. (Doiteronomio 4:35, 39) Tabeng ye, polelwana “wa pele le wa mafelelo” e bolela selo se tee le polelwana “Alfa le Omega.”

•   Go oketša moo, polelwana “wa Pele [pro’tos, e sego alfa] le wa Mafelelo [e’skha·tos, e sego omega]” e tšwelela go Kutollo 1:​17, 18 le go 2:8. Ditemaneng tše, taba ye go bolelwago ka yona e bontšha gore motho yo go bolelwago ka yena o kile a hwa gomme ka morago a tsošwa bahung ke moka a phela gape. Ka gona, ditemana tše di ka se bolele ka Modimo ka gobane Modimo ga sa nka a hwa. (Habakuku 1:​12) Lega go le bjalo, Jesu ke yena a kilego a hwa gomme a tsošwa bahung. (Ditiro 3:​13-​15) Ke yena motho wa pele yo a ilego a tsošwa bahung gore a phele e le sebopiwa sa moya legodimong, gomme ga bjale o phela “go iša mehleng ya neng le neng.” (Kutollo 1:18; Bakolose 1:18) Go tloga ka nako yeo go ya pele, Jesu ke yena a tlago go tsoša bahu. (Johane 6:​40, 44) Ka baka leo, e bile motho wa mafelelo yo a ilego a tsošwa ke Jehofa ka boyena. (Ditiro 10:40) Ka gore’alo, Jesu a ka bitšwa “wa Pele le wa Mafelelo.”

 Aowa. Motho yo a bolelago go Kutollo 22:13 ga a bolelwe ka leina, le gona go na le batho ba bantši bao ba bolelago kgaolong ye. Ge Moprofesara William Barclay a be a bolela ka karolo ye ya Kutollo, o itše: “Dilo tše di ngwadilwego kgaolong ye ga se tša ngwalwa ka tatelano; . . . le gona, gantši go ba thata go tseba gore ga bjale ke mang a bolelago.” (The Revelation of John, Bolumo 2, Kgatišo e Kaonefaditšwego, letlakala 223) Ka gona, re ka phetha ka gore polelwana “Alfa le Omega” yeo e tšwelelago go Kutollo 22:13 e šupa go yena Yoo a filwego sereto se dikgaolong tše dingwe tša puku ya Kutollo, e lego Jehofa Modimo.