Beibele ga e bolele ka go lebanya ka mokgwa wo wa go bolaya motho yo a babjago kudu, woo ka Seisemane o bitšwago euthanasia. a Lega go le bjalo, seo e se bolelago ka bophelo le lehu se re thuša go ba le pono e lekalekanego. Ga se ra swanela go bolaya, eupša ga go na lebaka leo le ka dirago gore re tshele molao wa Modimo e le gore re oketše nako ya bophelo ge motho a ehwa.

 Beibele e re Modimo ke Mmopi wa rena, ke yena “mothopo wa bophelo.” (Psalme 36:9; Ditiro 17:28) Bophelo bo bohlokwa kudu go Modimo. Ka baka leo, Modimo ga a nyake re bolaya e bile ga a nyake re ipolaya. (Ekisodo 20:13; 1 Johane 3:​15) Go oketša moo, Beibele e bontšha gore re swanetše go dira sohle seo re ka se kgonago gore re itšhireletše le go šireletša batho ba bangwe. (Doiteronomio 22:8) Go molaleng gore Modimo o nyaka gore re hlomphe mpho ya bophelo.

Go thwe’ng ge e ba motho a ka se tsoge a fodile?

 Beibele ga e kgothaletše gore motho a bolawe le ge go bonagala a babja moo e lego gore mafelelong o tlo hwa. Seo se ilego sa diragalela Kgoši Saulo wa kua Isiraele se thekga taba ye. Ge a be a gobaditšwe o šoro ntweng, o ile a kgopela mohlokomedi wa gagwe gore a mmolaye. (1 Samuele 31:​3, 4) Mohlokomedi wa gagwe o ile a gana. Lega go le bjalo, go na le monna yo mongwe yoo ka morago a ilego a bolela maaka a gore o dirile seo Saulo a bego a se kgopetše. Dafida o ile a ahlola monna yoo ka gore o na le molato wa madi. Dafida o ile a bontšha gore o lebelela bophelo go swana le Modimo.​—2 Samuele 1:​6-​16.

Na re swanetše go no tlogela motho a phela le ge re bona gore a ka se fole?

 Ge go bonagala gore motho o kgauswi le go hwa, Beibele ga e re kgothaletše gore re dire dilo tše itšego gore a tšwele pele a phela. Go e na le moo, Beibele e nea pono e lekalekanego ka taba ye. Lehu ke lenaba la rena le legolo, ke ditlamorago tša sebe seo re nago le sona. (Baroma 5:​12; 1 Bakorinthe 15:26) Le ge re se ra swanela go duma go hwa, ga se ra swanela go boifa lehu ka gobane Modimo o holofetša go tlo tsoša bahu. (Johane 6:​39, 40) Motho yo a hlomphago bophelo o tla nyaka kalafo e kaone kudu yeo a ka e hwetšago. Lega go le bjalo, go dira bjalo ga go bolele gore re ka kgetha kalafo yeo e tla ditelago motho go hwa le ge go bonagala gore o šetše a felelela.

Na go ipolaya ke sebe seo se ka se lebalelwego?

 Aowa, Beibele ga e bale go ipolaya gare ga dibe tšeo motho a ka se lebalelwego ge a di dirile. Le ge go ipolaya e le sebe se segolo, b Modimo o kwešiša mabaka ao a ka dirago gore motho a ipolaye, a go swana le malwetši a monagano, go gateletšega kudu goba malwetši a mangwe a leabela ao a ka dirago gore motho a nyake go ipolaya. (Psalme 103:13, 14) Modimo o diriša Beibele go homotša bao ba gateletšegilego. Go oketša moo, Beibele e re go tlo ba le “tsogo ya ba lokilego gotee le ba sa lokago.” (Ditiro 24:15) Se se bontšha gore re na le kholofelo ya gore le batho bao ba dirilego dibe tše dikgolo tše bjalo ka go ipolaya ba tla tsošwa.