Ka di 23 tša May 2023, mohlankedi yo mogolo wa tša maphelo wa kua United States o lemošitše batho bohle gore dipoledišano tša inthaneteng di ama baswa ba bantši ka tsela e mpe.

•   “Le ge dipoledišano tša inthaneteng di ka hola bana ba bangwe le baswa, go na le ditaetšo tše mmalwa tša go laetša gore dilo tše bjalo di na le kotsi e kgolo kudu ya go ka gobatša bana le baswa menaganong.”—Dikeletšo tša 2023 tša Social Media and Youth Mental Health: The U.S. Surgeon General’s Advisory.

 Dikeletšong tše go tsopotšwe dinyakišišo tšeo di bontšhago mabaka ao re swanetšego go tshwenyega.

•   Baswa ba mengwaga e 12 go ya go e 15 “bao ba bego ba tšea diiri tša go feta tše 3 ka letšatši dipoledišanong tša inthaneteng, ba be ba lebane le kotsi ya go se phele botse monaganong go akaretša le maswao a go gateletšega monaganong le go tlhobaela kudu, ka makga a mabedi.”

•   Ge baswa bao ba nago le mengwaga e 14 “ba diriša dipoledišano tša inthaneteng, ga ba robale gabotse, ba a hlaselwa inthaneteng, ga ba thabele ponagalo ya bona, ba ikwa ba se na mohola e bile ba gateletšegile. Se se ka diragalela kudu basetsana go feta bašemane.”

 Batswadi ba ka šireletša bana ba bona dikotsing tše bjang? Beibele e fa dikeletšo tše di šomago.

 Tsenyang letsogo. Bjalo ka batswadi, sekasekang dikotsi tša go diriša dipoledišano tša inthaneteng gomme le dire phetho ya ge e ba ngwana wa lena a swanetše go di diriša goba go se di diriše.

•   Molao wa motheo wa Beibele: “Tlwaetša mošemane go ya ka tsela yeo a swanetšego go sepela ka yona.”—Diema 22:6.

•   Go kwa mo go oketšegilego, bala sehlogo se se rego, “Should My Child Use Social Media?”

 Ge e ba o dumelela ngwana wa gago go diriša dipoledišano tša inthaneteng, tseba dikotsi tšeo di ka bago gona gomme o bone le seo ngwana wa gago a se dirago inthaneteng. O ka dira seo bjang?

 Šireletša ngwana wa gago go dilo tše kotsi. Ruta ngwana wa gago gore a lemoge le go phema dilo tše mpe inthaneteng.

•   Molao wa motheo wa Beibele: “Anke bootswa le ditšhila tša mohuta o mongwe le o mongwe goba megabaru le go bolelwa di se ke tša bolelwa gare ga lena, . . . le ge e le boitshwaro bjo bo lešago dihlong goba polelo ya bošilo goba metlae e lešago dihlong.”—Baefeso 5:3, 4.

•   Go hwetša maele tabeng ye, bala sehlogo seo se rego, “Teaching Your Teenager Social Media Safety.”

 Bea mellwane. Ka mohlala, bea melao ya gore ngwana wa gago a ka diriša dipoledišano tša inthaneteng neng le gore ka nako e kakaang.

•   Molao wa motheo wa Beibele: “Ka gona dulang le phakgametše gore kamoo le sepelago ka gona . . . ke bjalo ka ba bohlale, le diriše nako ya lena ka bohlale.”—Baefeso 5:15, 16.

•   Diriša bidio ya go hlalosa taba ka go thala diswantšho, yeo e rego Diriša Social Network Gabotse go thuša ngwana wa gago go bona lebaka la go bea mellwane.