Mokgaditswane wa agama o taboga gabonolo go tloga lefelong leo le rapamego go ya lebotong leo le emego thwii. Ge e ba lefelo leo le thedimoga, mokgaditswane o palelwa ke go ema gabotse, eupša o sa kgona go ema lebotong. Bjang? Sephiri se letše moseleng wa mokgaditswane woo.

Ela hloko se: Ge mekgaditswane ya agama e taboga go tloga lefelong la makgwakgwa—leo le dirago gore e kgone go itsetsepela—e thoma pele ka go tsepamiša mebele ya yona gomme ya bea mesela mo fase. Se se e thuša gore e taboge e eme ka tsela e swanetšego. Lega go le bjalo, ge e le lefelong la go thedimoga, mekgaditswane e na le go thedimoga ke moka ya taboga e se ya ema ka tsela ya maleba. Eupša ge e le moyeng, e kgona go sokolla mebele ya yona gore e eme ka tsela ya maleba ka go emišetša mosela godimo. Mogato wo o raragane. Pego yeo e lokolotšwego ke Yunibesithi ya California, kua Berkeley, e re: “Mekgaditswane e swanetše go fetoša mesela ya yona ka lebelo e le gore e dule e eme thwii.” Ge lefelo leo o tabogago go tloga go lona le thedimoga kudu, ke moo mokgaditswane o swanetšego go emiša mosela wa wona kudu e le gore o eme gabotse ge o fihla mo o tabogelago gona.

Mosela wa agama o ka thuša baentšeneare go hlama dinamelwa tša mohuta wa diroboto tšeo di itsetsepelago kudu tšeo di ka dirišetšwago go tsoma baphologi ka moragonyana ga tšhišinyego ya lefase goba kotsi e itšego. Monyakišiši Thomas Libby o re: “Diroboto ga di swane le diphoofolo ka go itsetsepela, ka gona selo le ge e le sefe seo se ka dirago gore roboto e kgone go itsetsepela ke kgatelopelo.”

O nagana eng? Na mosela wa mokgaditswane wa agama o bile gona ka tlhagelelo? Goba na o hlamilwe?