KE KGALE batho ba nagana gore dikere di hlamilwe ka bohlale bja motho. Go hlatsetšwe gore kgopolo yeo e fošagetše! Go utollotšwe gore sephedi se itšego se na le dikere tše di tsenelanago, e lego leafhopper ya Issus e nyenyane, yeo e hwetšwago dirapaneng tša Yuropa. *

Leafhopper e nyenyane e ka kgona go fofa lebelo la dimithara tše 3,9 ka motsotswana, e diriša matla ao a fetago a matlakgogedi ka makga a e ka bago a makgolo a mane! E ka kgona go nyamela ka ponyo ya leihlo. Gore e kgone go fofa ka tsela ye go nyakega gore maoto a yona a morago a tšweletše matla a lekanago sammaletee. Sephiri sa gore e kgone go dira se se letše kae?

Ela hloko: Borathutamahlale ba hweditše gore moo maoto a yona a morago a kopanago gona, go na le dikere tšeo di tsenelanago. Ge khunkhwane ye e fofa, dikere tše di dira gore maoto a yona a sepedišane gabotse. Go sego bjalo, e be e tla fofa ka tsela yeo e sa laolegego!

Diphedi tše dikgolo di ithekgile ka megalatšhika e le gore maoto a tšona a sepedišane ge di fofa. Ka gona, go diriša megalatšhika go be go tla dira gore leafhopper e nyenyane e se ke ya fofa ka lebelo. Ke ka baka leo e dirišago dikere tša yona tšeo di tsenelanago. Mongwadi le monyakišiši Gregory Sutton o itše: “Gantši ge go bolelwa ka dikere re nagana ka metšhene yeo e hlamilwego ke batho.” O tšwela pele ka gore lebaka la gore go be bjalo ke ka gobane “ga se ra ka ra nyakišiša ka mo go tseneletšego [mafelong a mangwe].”

O nagana eng? Na dikere tše ekego ke metšhene tša leafhopper ya Issus di bile gona ka tlhagelelo? Goba na di hlamilwe?