A RE re o sepela setarateng bošego kudu. Ke moka o a kwa gore go na le motho yo a go šetšego morago. Ge o ema, motho yoo le yena o a ema. Ge o phakiša, le yena o a phakiša. O thoma go kitima gomme o tšhabela ntlong ya mogwera wa gago. Ge mogwera wa gago a bula lebati gomme o tsena ka ntlong, o kwa o imologile.

Mohlomongwe ga se wa ka wa ba boemong bjo bjalo, eupša go na le maemo a mangwe bophelong ao a ka dirago gore o ikwe o boifa. Ka mohlala, na o lwantšhana le bofokodi bja go boeletša phošo e swanago? Na o feditše nako e telele o nyakana le mošomo eupša o sa o hwetše le ge o dira sohle seo o ka se kgonago? Na o tshwenyegile ka gore o a tšofala le gore o tlo lebeletšana le malwetši ge nako e dutše e eya? Goba na mohlomongwe go na le selo se sengwe seo se go tshwenyago?

Go sa šetšwe gore o lebeletšane le bothata bofe, na o be o ka se thabele go ba le mogwera yo o ka mo tšhollelago sa mafahleng le yo a ka go neago thušo ge o e hloka? Na o na le mogwera yo bjalo? Ee, o na le yena! Jehofa ke mogwera wa mohuta woo. Bjalo ka ge go bontšhitšwe go Jesaya 41:8-13, Jehofa e be e le mogwera wa mopatriareka Aborahama. Go temana 10 le 13, Jehofa o botša yo mongwe le yo mongwe wa bahlanka ba gagwe gore: “O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko. Ka gobane nna Jehofa Modimo wa gago ke [swere seatla sa gago sa le letona], Yena yo a rego go wena: ‘O se ke wa boifa. Ke tla go thuša.’”

Na mantšu a ga a go matlafatše? Leka go bona Jehofa a go dira seo a se boletšego ditemaneng tše re boletšego ka tšona. Ditemaneng tšeo, ga o tšwelele o sepela le Jehofa le bapelane, le ge seo se be se ka go thabiša. Ge nkabe o sepela le Jehofa le bapelane, go ra gore o be a tla be a swere seatla sa gago sa le letshadi. Eupša ditemaneng tše, Jehofa o otlolla seatla sa gagwe “sa le letona sa toko” gomme a swara “sa gago sa le letona,” go le bjalo ka ge eka o a go goga gore a go ntšhe ka gare ga bothata bjo itšego. Ge a dutše a dira bjalo, o go matlafatša ka mantšu ao a rego: “O se ke wa boifa. Ke tla go thuša.”

Na o bona Jehofa a le bjalo ka Tate yo lerato le Mogwera yo a tlago go go thuša ge o na le mathata? O na le taba le wena, o tshwenyegile ka wena e bile o ikemišeditše go go thuša. Ge o na le mathata, Jehofa ga a nyake gore o tshwenyege ka gobane o go rata kudu. Ruri Jehofa “ke thušo yeo e hwetšagalago gabonolo nakong ya ditlalelo.”—Ps. 46:1.

Batho ba bangwe ga ba robale ka baka la diphošo tša bona tša nakong e fetilego gomme ba ipotšiša  ge e ba Modimo a ba lebaletše. Ge e ba o le yo mongwe wa bona, nagana ka monna wa go botega e lego Jobo, yo a ilego a dumela gore o be a dira dibe bofseng bja gagwe. (Jobo 13:26) Mopsalme Dafida le yena o ile a ba le maikwelo a swanago gomme a lopa Jehofa ka gore: “Hle o se gopole dibe tša bofseng bja ka le melato ya ka.” (Ps. 25:7) Ka ge re sa phethagala, ka moka ga rena ‘re dirile sebe gomme re hlaelelwa ke letago la Modimo.’​—Baroma 3:23.

Mathomong molaetša wo o lego go Jesaya kgaolo 41 o be o ngwaletšwe batho ba Modimo e lego Baisiraele. Ba be ba dirile dibe tše dintši moo Jehofa a ilego a ba ahlolela gore ba išwe bokgobeng Babilona. (Jes. 39:6, 7) Lega go le bjalo, Modimo o be a naganne le ka nako yeo a bego a tla phološa bao ba tlago go itshola gomme ba boela go yena! (Jes. 41:8, 9; 49:8) Le lehono Jehofa o bontšha kwelobohloko e swanago go bao ba tlogago ba nyaka a ba gaugela.​—Ps. 51:1.

Nagana ka phihlelo ya Takuya, * yo a bego a nyaka go tlogela go bogela diswantšho tša batho bao ba sa aparago le go tsoša setho sa gagwe sa botona. Nako le nako ge a be a leka go tlogela, o be a palelwa. O be a ikwa bjang? O re: “Ke be ke ikwa ke se selo, eupša ge ke be ke rapela Jehofa gore a ntebalele, o ile a mmatlafatša.” Jehofa o dirile seo bjang? Bagolo ba phuthegong ya gabo Takuya ba ile ba mo kgopela gore a ba founele ge a ka bušeletša. O dumela ka gore: “Go be go se bonolo go ba founela, eupša ka mehla ge ke be ke ba founela, ke be ke matlafala.” Ke moka bagolo ba ile ba rulaganya gore molebeledi wa tikologo a direle Takuya leeto la bodiši. Molebeledi wa tikologo o ile a mmotša gore: “Go na le lebaka la gore ke tle mo. Bagolo ba nkgopetše gore ke go etele. Ba bone o swanelwa ke leeto le la bodiši.” Takuya o gopola ka gore: “Ke nna ke bego ke dira dibe, eupša Jehofa o ile a diriša bagolo go nthuša.” Takuya o ile a dira diphetogo gomme a ba mmulamadibogo wa ka mehla. Ga bjale o šoma ofising ya lekala. Go swana le ge Jehofa a ile a thuša ngwanabo rena yo, le wena o tla go thuša ge o na le mathata.

Batho ba bantši ba tshwenyegile ka gobane ga ba šome. Ba bangwe ba felelwa ke mošomo gomme ba thatafalelwa ke go hwetša o mongwe. Nagana kamoo o bego o tla ikwa ka gona ge o be o ka nyakana le mošomo dikhamphaning tše dintši eupša wa se o hwetše? Ge maemo a le bjalo, batho ba bangwe ba a inyatša. Jehofa a ka go thuša bjang? A ka no se go thuše go hwetša mošomo wa maleba di tloga fase, eupša a ka go thuša ka go go gopotša seo Kgoši Dafida a ilego a se lemoga ge a be a re: “Nkile ka ba lesogana, e bile ke tšofetše, eupša ga se ka bona le ge e le mang yo a lokilego a tlogetšwe a le feela, goba bana ba gagwe ba kgopela dijo.” (Ps. 37:25.) Jehofa o go lebelela o le bohlokwa kudu, gomme a ka diriša ‘seatla sa gagwe sa le letona sa toko’ go go thuša go hwetša seo o se hlokago gore o tšwele pele o mo hlankela.

Sara, yo a dulago Colombia, o ile a bona matla a Jehofa. O be a na le mošomo wa maemo khamphaning e itšego eupša o be o mo jela nako. Lega go le bjalo, o be a nyaka go šomela Jehofa ka mo go oketšegilego. Ka gona o ile a tlogela mošomo woo  gomme a thoma go bula madibogo. Eupša o be a sa hwetše mošomo wa nakwana. O ile a thoma go rekiša ice-cream eupša dilo tša se sepele gabotse, a felelwa ke tšhelete gomme a tswalela lebenkele leo. Sara o re: “Go ile gwa feta nywaga e meraro go le thata, eupša ke leboga gore Jehofa o ile a nthuša go kgotlelela.” Sara o ile a ithuta phapano magareng ga dilo tšeo motho a di nyakago le tšeo a di hlokago le gore a se ke a belaela ka tša ka moso. (Mat. 6:33, 34) Mafelelong, mothwadi wa mo a bego a šoma gona peleng o ile a mo founela a nyaka go mo nea mošomo wola a bego a o šoma. Sara o ile a re o tla amogela mošomo woo ge feela ba ka mo dumelela go šoma ka nakwana le ge a be a ka newa nako ya go dira tša Modimo. Le ge Sara a sa gole tšhelete e ntši go etša peleng, e sa le mmulamadibogo. Go tšwa phihlelong ye, Sara o re: “Ke bone Jehofa a ntshwara ka letsogo.”

Batho ba tšhaba go tšofala. Ge batho ba bantši ba fihla nywageng ya go rola modiro, ba ipotšiša ge e ba tšhelete yeo ba nago le yona e tla ba thuša go phela gabotse go fihlela ba ehwa. Ba tshwenyega le ka malwetši ao a ka ba swarago ge ba dutše ba tšofala. Go bonala Dafida e le yena yo a ilego a lopa Jehofa ka gore: “O se ke wa ntahla nakong ya botšofadi; o se ke wa ntlogela ge ke felelwa ke matla.”​—Ps. 71:9, 18.

Bjale bahlanka ba Jehofa ba ka phema bjang go tshwenyega ge ba tšofetše? Ba swanetše go tšwela pele ba bota Modimo, ba be le tumelo e tiilego ya gore o tla ba hlokomela. Ke therešo gore ge e ba nakong ya ge ba be ba sa šoma ba be ba phela bophelo bja manobonobo, ba tla swanelwa ke go nolofatša bophelo bja bona gomme ba kgotsofalele seo ba nago le sona. Ba ka hwetša gore go ja “morogo” go e na le go ja “nama ya poo e nonnego” go bose kudu, e bile go ka ba thuša go phela gabotse mmeleng. (Die. 15:17) Ge e ba bophelong bja gago o etiša pele go thabiša Jehofa, o tla go hlokomela le ge o tšofetše.

Nagana ka mohlala wa José le Rose, bao ba hlanketšego Jehofa ka nako e tletšego ka nywaga ya ka godimo ga e 65. Go theoša le nywaga, ba be ba swanetše go hlokomela tatago Rose, yo a bego a nyaka go hlokomelwa letšatši ka moka. Le gona José o be a alafiwa kankere, a ekwa bohloko. Na Jehofa o ile a otlolla letsogo la gagwe le letona gomme a thuša banyalani ba bao ba botegago? Ee. Eupša bjang? O ile a diriša Tony le Wendy, e lego banyalani ba phuthegong ya bona bao ba ilego ba rulaganya gore José le Rose ba be le lefelo la bodulo. Tony le Wendy ba be ba nyaka gore babulamadibogo ba ka mehla ba dule ntlong yeo mahala. Ge Tony a be a sa le sekolong se se phagamego, o be a bona José le Rose ka lefasetere ba feta ba eya bodireding ka mehla. O ile a ba rata ka gobane ba be ba rata Jehofa kudu, gomme seo se ile sa mo kgoma kudu. Ka ge Tony le Wendy ba be ba bona gore banyalani ba bao ba tšofetšego ba feditše bophelo bja bona ba hlankela Jehofa, ba ile ba tutueletšega go ba nea ntlo. Nywageng e 15 e fetilego, Tony le Wendy ba be ba dutše ba thuša José le Rose, bao ga bjale ba lego nywageng ya bo-80. Batšofadi ba ba lebelela thušo yeo ba e nwago ke banyalani ba ba bafsa e le mpho e tšwago go Jehofa.

Le wena Modimo o nyaka go go swara ka ‘seatla sa gagwe sa le letona sa toko.’ Na o tla otlolla seatla sa gago gomme wa swara yo a go holofetšago gore: “O se ke wa boifa. Ke tla go thuša”?