Na ge wena le molekane wa gago le boledišana ka mathata le feleletša le sa kwane go feta ge le be le thoma poledišano ya lena? Ge e ba go le bjalo, le ka kaonefatša boemo bja lena. Lega go le bjalo, sa pele, o swanetše go tseba gore mekgwa ya banna ya go bolela ga e swane le ya basadi. *

Gantši basadi ba rata go bolela ka bothata pele ba ka kwa tharollo. Ge e le gabotse, ka dinako tše dingwe go fo bolela e ba yona tharollo ya bothata.

“Ke ikwa gakaone ge ke ntšhitše sa mafahleng gomme ke tseba gore monna wa ka o a nkwešiša. Ke ikwa gakaone kudu ka morago ga ge ke boletše—gantši seo se direga ka morago ga metsotswana re boledišane.”—Sirppa. *

“Ga ke kgone go lebala ka bothata bjoo ge e ba ke sa hwetše sebaka sa go hlalosetša monna wa ka ka tsela yeo ke tlogago ke ikwa ka yona. Ke ikwa ke imologile ge nka bolela ka bothata.”—Ae-Jin.

“Go bjalo ka ge eka ke mošomo wa maphodisa. Ge ke le gare ke bolela, ke sekaseka kgato e nngwe le e nngwe ya bothata gomme ke leka go hwetša modu wa bjona.”—Lurdes.

Banna ba sekametše tabeng ya go nagana ka ditharollo. Seo se a kwagala ka ge go lokiša dilo go dira gore monna a ikwe a na le mohola. Go nea ditharollo ke tsela ya monna ya go bontšha mosadi wa gagwe gore a ka ithekga ka yena ge a nyaka thušo. Ka gona banna ba a gakanega ge ditharollo tšeo ba di neago di sa amogelwe. Monna yo a bitšwago Kirk o re: “Ga ke kwešiše gore o ka bolela bjang ka bothata mola o sa nyake tharollo!”

Eupša puku ya The Seven Principles for Making Marriage Work e lemoša ka gore “kwešišo e swanetše go tla pele ga tharollo. Pele o ka šišinya tharollo, o swanetše o tsebiše molekane wa gago gore o tloga o bona le go kwešiša seo a lebeletšanego  le sona. Gantši ga se gore molekane wa gago o kgopela tharollo—o fo nyaka go theetšwa.”

Bakeng sa banna: Itlwaetše go theetša ka kelohloko. Monna yo a bitšwago Tomás o re: “Ka dinako tše dingwe ka morago ga gore ke theetše ke ipotša gore, ‘Seo ga se a hola ka selo.’ Eupša gantši e ba e le sona seo mosadi wa ka a se hlokago—go theetšwa.” Monna yo a bitšwago Stephen le yena o dumelelana le seo. O re: “Ke hwetša go le kaone kudu go tlogela mosadi wa ka a ntšha sa mafahleng ntle le go mo tsena ganong. Gantši ge a fetša o mpotša gore o ikwa a le kaone kudu.”

Leka se: Nakong e tlago ge o boledišana le mosadi wa gago ka bothata bjo itšego, phema go lekega go nea keletšo o sa kgopelwa. Mo lebelele ka mahlong gomme o theetše ka kelohloko seo a se bolelago. Dumelelana le yena ka hlogo. Hlalosa ka boripana seo a se bolelago go bontšha gore o a mo kwa. Monna yo a bitšwago Charles o re: “Ka dinako tše dingwe mosadi wa ka o fo nyaka go tseba gore ke a mo kwešiša le gore ke ema le yena.” Molao wa motheo wa Beibele: Jakobo 1:19.

Bakeng sa basadi: Botša monna wa gago seo o nyakago a se dira. Mosadi yo a bitšwago Eleni o re: “Re ka letela gore balekane ba rena ba tsebe seo re se nyakago, eupša ka dinako tše dingwe re swanetše go ba hlalosetša seo re se nyakago.” Mosadi yo a bitšwago Ynez o šišinya mokgwa o latelago: “Nka re, ‘Go na le selo seo se ntshwenyago seo nka ratago gore o ntheetše ge ke go hlalosetša sona. Ga ke nyake gore o se rarolle eupša ke nyaka feela gore o kwešiše kamoo ke ikwago ka gona.’”

Leka se: Ge monna wa gago a akgofela go go nea tharollo ya bothata, o se ke wa phetha ka gore ga a go naganele. Go ka direga gore o leka go go thuša. Mosadi yo a bitšwago Ester o re: “Go e na le gore ke tenege, ke leka go kwešiša gore monna wa ka o na le taba le nna e bile o nyaka go ntheetša eupša ke feela gore o nyaka go nthuša.”—Molao wa motheo wa Beibele: Baroma 12:10.

Bakeng sa bobedi bja lena: Re rata go swara ba bangwe ka tsela yeo re nyakago go swarwa ka yona. Lega go le bjalo, e le gore le atlege ge le boledišana ka mathata, o swanetše go ela hloko tsela yeo molekane wa gago a nyakago gore o mo sware ka yona. (1 Bakorinthe 10:24) Monna yo a bitšwago Miguel o bea ditaba ka tsela ye, o re: “Ge e ba o le monna yo a nyetšego, ikemišetše go theetša. Ge e ba o le mosadi yo a nyetšwego, ikemišetše go fela o theetša ditharollo. Ge e ba bobedi bja lena le ka ikemišetša go ba le tekatekano, le tla holega ka moka ga lena.”—Molao wa motheo wa Beibele: 1 Petro 3:8.